فات لوقت ولحق وقت فطور قبل لا يجي نضت نجري دخلت للبيت يامس لقاني غير قاعدة مع خته ورجليا يبانو ديت زوج صفاعي فما بالك مقابلتهم هاك لعبتها نبدل فلفراش زعم دخل حط ظهره على خزنة و قعد يشوف من بعد نطق.. خرجتي من لبيت نتي… مارديتش ني نهدر معاك وزاد فصوته.. واه خرجت… وخرجتي هاك… سكت… ني نهدر مع جدك… لا بغيت تهدر معاه روح للمقبرة وهدر معا جدي الله يرحمه… قدم وخرمج فراش بيده.. خرجتي هاك ولا لا مانعاودش لهدرة… واه خرجت هاك. خرجتي هاك.. واه كيما راك تشوف… قعد غير يخزر ويشوف.. تسمى خرجتي هاك قتيلي.. ايا علياا من قبيل ني نعاود في كلمة واه ماعجبكش الحال الله يسهل عليك رودني هاك يا جاهل تقول عمرك ما شفت طفلة قعد يضحك… هادي لهدرة علياا انا لبنات لي عرفتهم كثر من شعر راسك شفت وشبعت وعفت ودرت كل شي ني نقولك فصح بصح تبغي صح مكانش كي الحلاال ونتي مالغري خطرتك لولة بصح تقنعي وتشبعي كثر من لي مجربة سيرتو فوحد العفسة درتيها … اقسم بالله لا عفت روحي نتا تهدر وانا نزيد نعيفك ماراكش حشمان تهدر دي لهدرة قدامي وليااا تجبدلي في صحاباتك مخنزات كون ديت وحدة كيفك علاه جيت لوحدة مشي من نيفو تاعك واذا راك حاسب روحك بهدرتك دي راكي طيح بيااا ولا تذل وتغير فيااا نقولك حاجة انا طيح روحك قدامي وما يطيحش نيفي نيفي تاع زداج ونخاف يطيح يتكسر على جال واحد كيفك دي كاش دعوة شر ندعات علياا باه ربي طيحني فيك ونتا دعوة خير ندعات عليك ربي جابني ليك
…. زيدي كاش مانسيتي.. وقتي غالي ومانضيعهش عليك روح عليا حمبوك.. زاد بدا ينارفي فياا وانا قاتلااته بلبارد بصح من داخل نغلي نغلي باغية نطردق هو خرج وانا بلعت موراه وقعدت نبكي نبكي نبكي وصلت بيه يجبدلي فلمخنزات تاوعه ويقارن بيناتنا فحق مايطلب سماح زاد عليااا كرهت كون غير عيشة بولحية ولا هم دا راجل كرهت لمن نحكي ونشكي دروك مانجمتش نشكي لربي ربي نعرفه غير في همي وانا صلااة تالية ومانصليهاش صح دنيا كانت غارتني وقفت عند تاقة وبديت نبكي وندعي ونطلب فربي من بعد مسحت عينيا وقعدت فبيتي كي شفت روحي شوية ريحت نوضت وقفت وخرجت قعدت معاهم عيطتلي ماما هدرت معاها من صوتي عرفتني مانيش مليحة بصح مابغيتش نزيد عليها نشوفو دا شي لوين يوصل اذا قعد هاك مشي انا لي نصبر بقيتها على خير ورجعت قعدت معاهم
قعد لبرود تاعه من جيهتي شهر كامل وفلعلاقة قاعد في نفس العنف تاعه وتجاهل ليوم صباح كنا راقدين حسيت روحي حابة نتقيا والوجع فكرشي نضت نجري كيما كنت خرجت بلعت لباب وبديت نتقيا عرفتها ليغاقل جايتني كي تجيني مرات ندخل لسبيطار على جاالها تجيني بتقيا نمرض فيها انا موالفة ماما طيبلي تيزانة وتقعد معايا حتى يروح لوجع ودروك وين راهي صاي بديت نحن لدارنا غسلت وخرجت نطل اذا كاش حد فايت ماكنتش لاابسة كي مالقيت حد فت نجري دخلت لشمبرة شيعتي تزوجت ها هو راجل لي طيحني ربي فيه راه راقد كنت لاابسة غوب قصيرة نحيتها لبسة بيجامة وضربت تقاشير لركبة درت اوان خفت لا تجيني وتمسخني دخلت لبلاصتي كان عاطيني بظهره دخلت فيه قاع حطيت راسي مورا ظهره وغميت روحي تقولو ميت راهم دافنينه كي شفته بدا يفطن خرجت يدي من الغطى وبديت نضرب فيه بشوية فراسه .. رقد ولدي رقد رقد مكان والو دي غير انا يماك واالله لا راجل زاد عليها ورقد غمضت عينيا على بالي وجع تاعي كي داير اوموا نرقد شوية وداك لي صراا كون مشي هو بدا يجبد في روحه والله ما نفطن كيما كنت عاودت قلبت روحي وكملت رقادي جا لجيهتي مسلي راسي وراح من موراها مافطنتش حتى ططبت لعجوز ودخلت جات تنوض فيا مريضة قاتلي نطيبلك حاجة حامية مليحتلك هزيتلها براسي وهي مسكينة راحت ورجعت جابتلي تيزانة شربتها ودخلت لبلاصتي قعدت عند راسي تمسحلي في شعري وتقولي راك تريحي من بعد ناضت جابتلي حاجة منعرت شا مدخلة فيها حاااامية وقاتلي ديريها في كرشك صغيرة يتنحى عليك لوجع كنت نحوس غير يروح عليااا لي تقولي عليها نديرها عليها غفيت رقدت صونا تلفوني رجعت نضت لقيتها ليلى سقست عليا مسكينة انا نهدر حتى نحل لباب لقيته هو كيما كان جاني ديراكت مسني فراسي … ريحتي. هزيتله براسي بدا يشوف فكرشي . من بعد دخل يده .. واش راك دير. شا راكي مدخلة تماك جبدها.. واش هادي… كرشي كانت ضارتني… هاذي شا بغات ديرلك زعم نتي… تخفف شوية لوجع قلعها ورماها ودار يده ويديرلي فمساج لكرشي… جيت نهدر حتى نسمع في الو نسيت قاع بلي كنت نهدر مع ليلى.. طلع راسه شاف فيا وفتلفون وخطفها قالها هياا من بعد روحي لتهي بدارك وحطي داك تلفون شوية
14
