نور بنرفزة : أيوة جبان ، طول عمري بشوفك عصبي وجاد وما بتعملش حساب لحد ليه دلوقتي بقيت بتعملهم ألف حساب ؟ ليه خايف منهم بالشكل ده ؟ علشان الشركة والشغل ؟
نادر بعدم تصديق: بعمل لمين حساب ؟ أنا لو يهمني حد فالحد ده انتِ ، فوقي لنفسك واسمعي بتقولي ايه
زعقت بغضب: أنا فايقة وعارفة نفسي وعارفة عايزة ايه لكن اهتماماتي مختلفة عنكم ونظرتي للأمور مختلفة
بصلها بتهكم : وايه هي اهتمامات سيادتك المختلفة دي ها؟ ونظرتك دي ايه ؟
وضحت بقوة : إيان وإياد مش اخوات لا كانوا ولا هيكونوا
مؤمن شد دراعه من ايد كريم وقرب منها بتحدي : ومين اللي هيمنع ده ؟ علشان بس فضولي
بصتله بتحدي مماثل : أنا يا مؤمن ، مش هعمل كريم ومؤمن تانيين ، أمك كانت أضعف من انها تقف في وش أبوك وتقوله لا ابني في حضني بدل ما يرميك لغيرك تسلي ابنهم وتكون وصلة بينه وبين العالم ويتنازل عنك لأخته وبدل ما يبقى ابن عاصم الدخيلي بقى مجرد تابع لابن المرشدي وسكتوه واقنعوه انهم اخوات وابنوله ملحق زي الخدم وادوله كام سهم يسكت بيهم ، فلو أمك سكتت أنا مش هسكت .
حالة صمت تام سيطرت على الكل لدرجة ان حتى النفس مش مسموع بعد كلام نور ، مؤمن قطع الصمت ده بسؤاله المترقب : انتِ قولتي لأمي الكلام ده ؟
عاصم وقف و الكل تباعًا وقف وخالد اتمنى لو يقدر يتحرك ياخد بنته من هنا أو يخرسها بأي شكل لكن رجليه ما طاوعتهوش يمشي لعندها وسمع بنته بترد بكل الغضب اللي جواها: اه قلتلها اني بكره كل ست ضعيفة سواء أمي اللي اتجوزت راجل ماقدرش يحميها ويحمي عيالها ولا أمك اللي رمت ابنها لغيرها واتنازلت عنه
مؤمن حاول يسيطر على أعصابه لان أبوها وأمها وأخوها ناس بيحترمهم ، بص لنادر أخوها جنبها وتمتم : أنا آسف يا نادر
نور استغربت أسفه ويادوب هتتكلم بس القلم اللي نزل على خدها من مؤمن خرسها و وقعها على الكرسي وراها وقبل ما تستوعب اللي حصل سمعت مؤمن بيقول باحتقار: انتِ طالق يا نور ، طالق ومش هتشوفي ابنك تاني و وريني القوة بتاعتك دي هتعملي بها ايه ؟ وإيان وإياد هيكبروا اخوات غصبا عن أنف الكل ، وكريم ومؤمن لسه ما اتخلقش اللي ممكن يفرقهم عن بعض أو يشوه العمر اللي عاشوه والعلاقة اللي بينهم ، لسه ما اتخلقش فاهمة ؟ ودلوقتي اتفضلي من غير مطرود من هنا مش عايز أشوف وشك في أي مكان تاني .
بص وراه لخالد وقال باحترام: عمي أنا آسف جدًا بس حضرتك مكانك محفوظ أنا بحترمك وبقدرك ويعز عليا بجد أقول كلام زي ده لكن وجودها هي غير مرغوب فيه – بصلها باشمئزاز – اطلعي برا المستشفى وبرا البلد كلها وانسي ان ليكي ابن أصلًا .
نور وقفت باستيعاب وصرخت بكره : هرفع عليك قضية حضانة
رد ببرود : اعملي ما بدالك بس اتفضلي من هنا
نور بصت لأبوها اللي أخيرًا لقى صوته وقال بحزم : نادر خد أختك من هنا لو سمحت كفاية قلة أدب منها لانها مش عاملة احترام لحد لا كبير ولا صغير والظاهر انها اتجننت – بص لعاصم باعتذار – حقكم عليا أنا من جنانها وربنا يطمنا على الحاجة ويقومها بالسلامة يارب والباقي كله مقدور عليه .
نور وقفت قصاده بغضب : بتعتذرلهم ليه ؟ انت هتفضل تعمل حساب للدنيا كلها إلا احنا لحد امتى ؟
خالد زعق فيها: بعتذرلهم لاني ماعرفتش أربيكي ، ماعرفتش أربيكي بجد
نور بتهكم : اه كنت مشغول بتربيتها
بصت ناحية ملك فمسك دراعها بقوة : للأسف ماكنتش جنبها ياريت كنت جنبها بس بالرغم من كده إلا انها رافعة راسي دايما لفوق غير انتِ يااللي وطيتي راسي ودلوقتي بتسأليني بعتذر ليه ؟
بصتله بعصبية : لو حد وطى راسنا فالحد ده هي – بصت لأمها باتهام – لما راحت قتلت واحد و
قاطعتها المرة دي صفعة خالد على خدها وسط ذهولها، بص لابنه بأمر : خدها من هنا كفاية قلة أدب ، طلعها برا ، انتِ لا يمكن تكوني بني آدمة عاقلة ولا طبيعية.
نادر شد نور اللي حاولت تعترض أو ترفض تتحرك بس شدها بعنف ، ملك قربت منهم تمسك دراعها وتكون جنبها بس نور بصتلها وزعقت بحقد: ابعدي عني علشان بكرهك انتِ أخدتي مني أبويا وانتِ اللي عرفتيني عليه انتِ
نادر شدها بغضب : كفاية بقى واسكتي .
شدها لبرا وهي فضلت مكانها، جوزها قرب منها حط دراعه حواليها بمواساة: اعذريها هي مش في وعيها ومش عارفة بتقول ايه .
سندت على كتفه بحزن فضمها وهمس : أنا جنبك ما يهمكيش حد تاني .
مؤمن وقف جنب كريم بصمت تام سند على الحيطة زيه وبص للأرض ومرة واحدة كريم سمعه بيسأله : هي قالت الكلام المتخلف ده قبل كده ؟
رد بإيجاز : قالته مرة
مؤمن بصله باستيعاب: ساعة ما طردتني من مكتبك ؟ صح ؟ سمعته و … وايه ؟ فكرت في ايه يا كريم ؟ ان عندها حق ؟ اني تابع ليك ؟ ولا فكرت ازاي ؟
كريم رفع وشه بصله باستنكار : لا طبعا مافكرتش كده
مؤمن بانفعال خفيف : امال فكرت ازاي ؟ أنا لحد دلوقتي مش عارف أبرر موقفك ولا رد فعلك يومها، اليوم ده كنتم كلكم متغيرين – بص لناهد ولحسن ورفع صوته – كلكم فعايز أفهمكم انتم فكرتوا ازاي ؟
عاصم اتدخل : مش وقته يا مؤمن
بص لأبوه بإصرار: لا وقته الكل متجمع والكل موجوع
ناهد أول واحدة وقفت وبررت: خفت يا مؤمن
بصلها باستغراب : خفتي من ايه ؟
بصتله بحزن: أكون ظلمتك وماعرفتش أكون ليك أم ، يعلم ربنا اني عمري أبدًا ما فرقت بينك وبين كريم بس برضه خفت أكون ظلمتك .
كريم بتوضيح : كلنا مش انتِ لوحدك ، كلنا خفنا نكون أنانيين لدرجة اننا ما شوفناش ان حقك تعيش جنب أبوك وأمك واننا أخدناك من وسط أسرتك ، خفت أكون أناني لدرجة انك تهد بيتك علشان …. – بصله بأسف وكمل – في مثل بيقول ومن الحب ما قتل ، أنا ماعنديش ذكرى واحدة في حياتي انت مش فيها وللأسف مش عايز ذكريات جديدة ما تكونش انت فيها ومش عارف هل دي أنانية ؟ ماعنديش اخوات بس انت كنت ومازلت كل حاجة ، أخ ، صاحب ، شريك ، كل حاجة ومش عارف لو انت مش في حياتي كان ممكن يبقى شكلها ازاي ؟ فقلت أو فكرت أبعدك تاخد قرارك لوحدك
مؤمن سمعه بهدوء بعدها بصله وسأله : انت ليه باصص لنفسك بس يا كريم ؟
بصله باستغراب وعدم فهم فوضح : يعني ليه متخيل ان انت اللي محتاجني ؟ وانت اللي عايزني أفضل موجود ، وانت وانت وانت …
كريم بحيرة : لان أنا اللي كنت محتاجك فعلًا
ابتسم بحزن : وهل انت شايفني الشخص المثالي أوي اللي هيضيع عمره كله لمجرد انك محتاجني ؟ أنا مش قادر أفهم ليه كلكم باصين من ناحية واحدة بس ؟
محدش فيهم كان فاهمه وكريم سأل : مش فاهمك يا مؤمن
عاصم هنا اللي رد : قصده يا كريم انك زي ما كنت محتاجله هو كمان كان محتاجلك ، يعني العلاقة دي كانت متبادلة وزي ما كنت محتاجله هو محتاجك بالظبط ولولا اني عارف ده ماكنتش سمحتله يسيبنا ويفصل نفسه عننا
مؤمن كمل : بالظبط ده اللي واقع منك ، عمري ما حسيت اني منتمي للبلد هنا وعمري ما فكرت ان دي حياتي وده آخري أكبر وأستقر هنا فأنا زيك كنت عايز أخ وسند ليا وعايز أخرج من البلد دي وعايز أسافر برا وعايز شغلي ده وشركتي دي وعايز حياتي دي بحذافيرها ، أنا عمري ما ندمت لحظة على سفري معاك سواء واحنا أطفال برا مصر أو دلوقتي ، أبويا قالي هفتحلك شركة زي المرشدي جروب واعمل حياة لنفسك مستقرة بس أنا بالفعل حياتي مستقرة فانت مش بتتفضل عليا ولا بتستغلني زي ما فكرت، أنا عشت حياتي بالطول والعرض وبالشكل اللي أنا عايزه وبالطريقة اللي عاجباني وده اللي نور ماقدرتش تفهمه لكن ما تخيلتش أبدا ان انت بالذات مش فاهمه
كريم بصدق : فاهمه كويس
