خاطر بص لفاتن: اعملي طيب بسرعة حاجة لسيف ياكلها، انتِ سمعتيه بنفسك بقاله كذا يوم ما أكلش.
سيف وقّف فاتن قبل ما تتحرك: مش هاكل أي أكل، البسوا ويلا نتحرك لو سمحتوا، ست الكل مش هقدر بجد آكل أي حاجة دلوقتي.
همس بصت له: ما أكلتش ليه من الصبح؟ مش قولت الدكتور طمّنك والأشعة كويسة؟
سيف بصلها بتهكم: مش يمكن عشان كنت بدور على مراتي من الصبح ومش عارف لها طريق؟ ولا يمكن عشان لسه تعبان ومفعول الحقن اللي أخدتها الصبح لسه معداش؟ اختاري يا همس السبب اللي يعجبك.
همس علقت بتهكم مماثل: مش يمكن علشان تحملني أنا ذنب عدم أكلك وتعبك؟ ده السبب اللي يعجبني.
سيف بصلها بذهول من كلامها: تصدقي اه، أنا اللي قولت للدكتور يكتبلي الحقن اللي كانت بتطلع روحي حرفيًا علشان أحملك ذنب عدم أكلي، جبتي التايهة سيادتك.
همس هترد بس خاطر زعق: وبعدين؟ ما تعملوا اعتبار لينا، همس اتفضلي البسي هدومك، الراجل قالك متأخر.
همس بغيظ: أنا لابسة حضرتك اتفضل البس.
خاطر: طيب اتفضلي شوفي أمك لو بتعمل حاجة، ساعديها خلينا نتحرك بسرعة يلا اتفضلي.
اتحركت بغيظ وبعدها سيف طلع للبلكونة اتصل بكريم: كريم معلش لو ينفع ممكن تأجل الاجتماع ده ساعة أو نص ساعة بس؟
كريم باستغراب: ليه يا سيف؟ مش هينفع.
سيف بضيق: معلش مضطر يا كريم، أنا في المنصورة وقدامي بتاع ساعتين في الطريق فشوف انت، أوصل متأخر ولا لو ينفع نأخره ساعة واحدة.
كريم بتفكير: طيب هشوف هعمل ايه وأكلمك بس خير، ليه المنصورة؟ مش اتجوزنا والحمد لله ونصنا التاني في بيتنا؟ ليه رجعنا نتنطط تاني؟
سيف بضيق : غصب عني يا كريم معلش، لما أشوفك ابقى أقولك بس شوف هتعمل ايه وبلغني وأنا مسافة الطريق.
قفل معاه واتصل بعواطف وعمل كذا تليفون لحد ما خاطر طلع وبلغه إنهم جاهزين، بس قبل ما ينزلوا فاتن طلعت معاها طبق صغير وبصت لسيف: تاكل دول قبل ما ننزل؟
سيف بص للطبق وبصلها: ست الكل تسلم إيديكي بس صدقيني مش هقدر آكل أي حاجة دلوقتي وخصوصًا إننا نازلين، اعذريني بجد.
فاتن بإصرار: دول يدوب شوية لسان عصفور وحتة فرخة صغيرة وبعدين هيريحوا معدتك.
سيف بعد مجادلة محبش يزعل فاتن فأخذ كام معلقة منها بالعافية وهي أكلته معلقتين بالعافية.
نزلوا كلهم وبدأت خناقة جديدة مين يركب جنبه قدام ما بين خاطر وهمس اللي بتقنع أبوها يقعد جنب سيف وهو بيقولها هيقعد جنب مراته لحد ما سيف شبه زعق: وبعدين؟ هنفضل كده كتير؟ عمي لو سمحت اتفضل الموضوع مش مستاهل كل ده.
خاطر بص لسيف: الموضوع فعلًا مش مستاهل كل ده، أوعي يا همس كده.
همس رجعت خطوة لورا وهو فتح الباب وركب جنب مراته ورا وبص لبنته: ادخلي جنب جوزك ويلا اتحرك يا سيف.
سيف اتنهد ودخل قعد مكانه وهمس اضطرت تركب بصمت تام، سيف دور عربيته وقبل ما يتحرك مسك سلك الشاحن: اتفضلي اشحني موبيلك.
طلعت الموبيل من شنطتها وحطته على الشحن وانتظرت كام دقيقة يفتح بعدها بتهمس: هتشوف سيادتك الرسالة اللي بعتها.
فتحت الموبيل وفتحت الواتس وبتوريه الرسالة بدون ما تشوفها الأول: اتفضل.
سيف بص للرسالة وبصلها وعكس اتجاه إيدها: اتفضلي انتِ شوفي رسالتك.
همس بصت لموبيلها واتفاجئت بدايرة حمرا صغيرة جنب الرسالة معناها فشل في الإرسال، كشرت وبدون ما تبصله: حظك أعملك ايه يعني؟ بس علشان تصدق إني بعتلك رسالة.
سيف علق بهدوء: بعد كده مفيش حركة لأي مكان برسالة يا إما تتأكدي إني رديت عليها أو تكلميني بشكل مباشر يا همس.
همهمت بتهكم ومعلقتش، وسيف كمل طريقه بيحاول يسوق بسرعة علشان يوصلوا في ميعاده. كريم اتصل بيه بلغه إنه عرف يأخر الاجتماع ساعة واحدة فحاول ينجز.
شوية وسيف وقف على جنب فكلهم بصوله باستغراب وخصوصًا إنه بيفك الحزام وهينزل، فخاطر استغرب: في إيه يا ابني؟
سيف بسرعة: مفيش، ما تشغلش بالك يا عمي.
نزل من العربية للرصيف وبعدها بدأ يرجع الأكل اللي أكله كله وفاتن ساعتها ندمت إنها ضغطت عليه. همس بصت لأمها: قولتلك بلاش تأكليه هو لسه تعبان.
فاتن ضربتها على كتفها: ولما انتِ عارفة إنه تعبان مشحططاه وراكي ليه؟
كلهم بصوله وهو راجع للعربية، قعد مكانه واستقر للحظات قبل ما خاطر يسأله: تحب أسوق أنا يا سيف وتريح انت؟
سيف بصله في المراية: لا يا عمي أنا دلوقتي كويس.
فاتن بحرج: معلش يا سيف مكنتش أعرف إن الأكل هيتعبك كده؟ بس كان لازم تاكل حاجة تسندك.
سيف اتحرك وشوية اضطر يقف تاني والمرادي خاطر نزل معاه ووقف جنبه: سيف يا ابني انت تعبان خلينا نروح أي …
قاطعه سيف: أنا كويس يا عمي صدقني، ده من الآثار الجانبية للحقن اللي كنت باخدها والموضوع هدي تمامًا بالشكل ده. أنا كنت الأول برجع كل أربع دقايق دلوقتي علشان أكلت بس فبمجرد ما معدتي فضيت ههدى، ما تقلقش، اتفضل يلا أنا بجد كويس.
ركبوا تاني والمرادي ما وقفش لحد ما وصلوا شقته: يلا بينا.
