كانوا قاعدين على الأرض وقدامهم حاجات كتيرة أكلوها بعدها همس سألت : نادر ، فرحك هيبقى امتى ؟
مط شفايفه بحيرة : والله ما عارف يا همس ، ملك بتقول الوضع في البيت صعب ونور طايحة في الكل وبتتخانق معاهم كلهم وشايفاهم اتخلوا عنها .
هند : إن شاء الله خير ، هتتحل بإذن الله ما تقلقش .
همس بصتلها : انتِ هتولدي امتى ؟ حاساكي حامل من زمان أوي .
هند ضحكت : زمان فين ؟ أنا متجوزة في شهر ٦ يا همس وحملت على طول فأنا يادوب حامل في الخامس أصلا يعني لسه قدامي ٤ شهور .
همس بفضول وعينيها لمعوا : حلو إحساس الحمل ده يا هند ؟
قبل ما تجاوبها نادر حذرها : همس انتِ قدامك امتحانات ودراسة وموال كبير و
قاطعته بتذمر : يوووه يا فصيل عارفة كل ده ، أنا بس بسألها مش أكتر ، وبعدين عاملين حسابنا مفيش حمل دلوقتي خالص غير حين ميسرة .
ابتسم : أيوة خليكم عاقلين دراستك صعبة والحمل مقرف سيبك من الجانب الرومانسي ، أقولك أنا الجانب الطبي
قاطعته : لا يا اخويا مش عايزة أعرف الجانب الطبي
هند ضحكت عليهم وأكدت كلام أخوها : لا بس هو عنده حق ، أنا نفسي آكل أكلة براحتي وأنا مش قلقانة أرجع بعدها ولا أنام بعمق زي ما كنت بنام .
نادر كمل : ولسه لما يكبر شوية هيخليكي بقى تاكلي الأخضر واليابس وهيخليكي مش قادرة طول الوقت وبـ
قاطعوه الاتنين : اوووه بس خلاص
همس بضيق: كرهتنا في عيشتنا يا أخي اسكت بقى .
سكتوا كلهم شوية بعدها نادر سأل باهتمام : مش هتقوليلنا يا همس مالك ؟ مش بطبيعتك
هند بصتلها وأكدت : فعلًا ماحبيتش أضغط عليكي بس انتِ مش انتِ .
ابتسمتلهم بس واضح الحزن في ملامحها : أنا كويسة مفيش حاجة ، مضغوطة بس و ورايا تسليم شيت ومع غيابي ومع تعب سيف مش عارفة هعمل فيه ايه .
هند بسخرية : وبدل ما تذاكري قلتي أهرب عند هند ؟
ضحكت همس : بالظبط – حضنت دراع نادر ودراع هند وقالت: وبعدين هو في أحلى من القعدة وسط اخواتي الاتنين ؟
ماحبوش يضغطوا عليها واكتفوا بقعدتهم مع بعض .
همس سألت فجأة وهي قايمة من مكانها : يا لهووي ده احنا خلينا الدنيا ايه ؟ مين هينظف كل ده ؟
نادر ضحك : انتِ طبعًا .
همس عينيها وسعوا بس هند طمنتها : لا مش انتِ ما تخافيش
نادر بصلها: اوعي تقولي انتِ – كمل بهزار – أو أنا ؟
همس بضحك : أو المسكين جوزها لما يرجع ؟
ضحكوا التلاتة بس هند وضحت : لا يا ستي عواطف بتبعتلي كل يوم واحدة من عندكم سواء كوثر أو أحلام ، ساعات تيجي الصبح وساعات أقولها آخر النهار فما تقلقوش .
همس ابتسمت : عواطف دي حاجة سكرة ، تحسيها فاهمة كل حاجة وأي حاجة .
هند أكدت : دي حقيقة قبل ما تتكلمي تبقى فاهماكي عايزة تعملي ايه ، المهم هتعرفي تعملي الفشار ولا هلاقيه منتشر في المطبخ ؟
ضحكوا الاتنين عليها ونادر علق بتذكر : أما كان حتة يوم ، فاكرة أمك خلتنا ننظف المطبخ كله يومها
همس ببساطة: ما انتم ما قولتوش انه بيطير ومحدش قالي غطي الحلة فجأة لقيته بيفرقع ويطير في كل حتة
هند بتهكم: طيب غطي الحلة لما طار
همس بتريقة : لا يا اختي وافترضنا انفجرت في وشي ؟ الجري نص الجدعنة وبعدين خليني ساكتة فاكرة لما شغلتي الخلاط من غير ما تغطيه ؟ ولا بتفتكروا ليا أنا بس ؟
هند ضحكت : ماما كان ناقص تخليني ألحس العصير من على الرخامة مش مكفيها هدومي اللي شربت العصير كمان عايزاني أكمل الباقي .
نادر : والله انتم مسخرة انتم الاتنين وماما دي حاجة صعبة أوي ، ما بتعديش حاجة أبدًا .
همس باستنكار : أمك صعبة وما بتعديش ؟ تعال شوف سلوى حماتي – باست ايدها وكملت بسخرية – حاجة كده فلة شمعة منورة ، يا لهوي عليها
هند باهتمام : اوعي تكوني متخانقة معاها حاساكم دايما متنشنين مع بعض
همس قعدت : لا مش متخانقين بس هي صعبة وبتركز في كل حاجة وبتحب تتدخل في كل كبيرة وصغيرة.
نادر باهتمام : وسيف فين ؟ ليه بيسمحلها تتدخل ؟
نفت بسرعة : مش بيسمحلها ، أصلًا هي بتجننه وطول الوقت يتخانق معاها .
نادر بشك : طيب انتِ بجد جاية علشان متخانقة معاها ؟
نفت : لا يا حبيبي بالعكس دي هي لما لقتني متضايقة اقترحت اني أجي هنا ، قالتلي روحي لأختك وكلموا أخوكي واتجمعوا بدون أزواجكم ونموا عليهم براحتكم ، قالت كل واحدة بتكون محتاجة من فترة للتانية تشتم جوزها وهي واثقة ان الكلام مش هيوصله فمفيش أحسن من اخواتك تشتمي ابني قدامهم .
ضحكوا التلاتة بعدها نادر علق: طيب عايزة تشتميه اشتمي ما تخافيش مش هنقوله
نادر طلع موبايله فاستغربت : بتعمل ايه ؟
نادر بهزار : مش هقوله هدخله لايف بس
جريت شدت الموبايل من ايده : اوعى
نادر استغرب انها صدقت لانه لا يمكن يعملها بس بصلها بجدية : للدرجة دي مزعلك ؟
اتنهدت وربعت ايديها بعدها بصتلهم بضيق: مش عايزة أتكلم عنه ، ينفع ؟
نادر ضمها : ينفع طبعا بس لو عايزاني في أي وقت أتدخل قوليلي .
هزت راسها بموافقة وهند كملت بتعاطف : أو زي ما حماتك قالت لو عايزة تشتميه هنسمعك .
ابتسمت و بصتلهم : ربنا ما يحرمني منكم
هند بضحك : بت مش كنتي هتعملي فشار ؟
قامت بسرعة تعملهم الفشار وترجع تقعد وسطيهم .
