البنات بعدوا عنهم و وقفوا عند الباب منتظرين ياخدوا حاجتهم وسيف قرب من همس منتظرها تتكلم بس هي ساكتة فهو علق : مش خلصنا من الموضوع ده يا همس وقفلناه ؟ في ايه بقى ؟
بصتله بإصرار : في اني مش عايزة البس حاجات غالية تاني لاني مش حابة أمشي وانا خايفة حاجة تقع فأتفهم غلط تاني
بصلها باستنكار: تتفهمي غلط؟ وأنا امتى فهمتك غلط؟ وبعدين حتى لو حاجة ضاعت فداكي ياهمس ، لو سمحتي بلاش تحسسيني اني بشع للدرجة دي علشان سوء تفاهم حصل
همس بعناد: مش هقدر يا سيف ، أنا آسفة بس كرامتي تمنعني اني أقبل هديتك مش هبقى مرتاحة وأنا لابساها ، كفاية اوي خاتم الجواز .
بصلها بغيظ : انتِ ليه غاوية تنكدي علينا ؟ هتستفيدي ايه؟ من امتى قلبك بقى اسود بالشكل ده
ردت بتهكم: من ساعة ما اتهنت
رد بهدوء: محدش يقدر يهينك ياهمس ، محدش يقدر مسك كتافها وباس راسها بعدها سند على دماغها وكمل: علشان خاطري بطلي جنان واقبلي هديتي المتواضعة عايزين ننزل
بعد يشوف رد فعلها لقاها بتبصله بتفكر بعدها ردت : جاوبني على سؤالي الأول يا سيف ، ليه اشتريته؟ أنا ما طلبتوش وما نطقتش حرف فليه ؟
بصلها : يفرق معاكي في ايه السبب ؟
ردت باندفاع : لا يفرق يا سيف ويفرق كتير اوي كمان ، اقولك انا ليه جبته ؟
بصلها بتهكم : ليه يا نابغة هاه ؟
ردت : بغض النظر عن اسلوبك بس انت جبته علشان تقول لبابا ولماما أنا جايب لبنتكم هدية سعرها معدي الاربعة مليون فـ ١٠٠ ألف ايه اللي بتتكلموا فيها ، انت بتخرس الكل بأسلوب شيك وبهدية غالية بالشكل ده .
نفخ بضيق وايديه في وسطه : انتِ شايفة ان دي شخصيتي يا همس ؟ هجيب حاجة بالسعر ده لمجرد اقول لابوكِ ٱنا معرفش ايه ؟
علقت بنرفزة : طيب قولي ليه اشتريتها ؟ جاوبني اجابة تقنعني ليه جبتها ؟
زعق زيها : علشان عنيكي لمعت يا همس أول ما شوفتيه ، هو ده ليه ؟ نظرتك له ، خطفك أول ما شوفتيه ، كان لازم اشوف ايه اللي خطفك بالشكل ده والراجل قال ان مفيش غير قطعة واحدة اتعملت منه فمقدرتش أشوف غيرك لابسه فاشتريته ، كده جاوبتك ؟ اقتنعتي ؟
بصتله بذهول : لا طبعًا ، هو كل ما عنيا هتلمع بحاجه وتعجبني هتشتريها ؟
استغرب وبكل بساطة : طبعا هو انتِ عندك شك في ده ؟
دورت وشها بعيد : سيف لو سمحت اتكلم بجدية شوية
وقف قصادها : امتى من يوم ما عرفتيني للنهاردة عجبتك حاجة وما عملتهاش علشان مستغربة ده دلوقتي ؟
علقت بتهكم : اه زي فستان فرح هند
مسك درعها : ايوه زي فستان فرح هند عجبني ومقدرتش اسيبه جبته ليكي وساعتها برضه فهمتيه غلط ، هنفضل هنا الليل كله صح ؟
اتنهدت : مش هقدر ألبسه ، مش عايزة ألبسه ، هنعمل ايه ؟
سيف بصلها بتفكير وبعد شوية نطق : عندي اقتراح حلو أوي
بصتله باهتمام : اتفضل
جاوبها : البسيه – جت تعترض بس وقفها – البسيه وبعد الفرح هاديه لأمي
بصتله بذهول وعلقت بتريقة : وانت متخيل ان سلوى هانم هترضى تاخد طقم أنا لبسته ؟ مامتك لا يمكن تقبله
سيف ابتسم بخبث : هتقبله وأنا عارف بقولك ايه
همس بتحرك راسها برفض : ازاي ؟ مامتك مش هتلبس حاجة حد لبسها قبلها لا يمكن ، مش هتلبس ورايا
سيف ابتسم وصحح جملتها : محدش هيقول انها بتلبس وراكي يا همس علشان دي سلوى الصياد
همس بعدم فهم لوهلة : امال هيقولو ايه ؟
جاوبها ببساطة وهو عارف انها هتتجنن عليه باجابته : هيقولو انه بتاعها وهي سمحت لمرات ابنها تلبسه في فرح أخوها – أضاف ينرفزها أكتر – تعطفًا وذوقًا منها يعني
همس وشها اتغير وسيف حس انها ممكن تخبطه بأي حاجة حوليها لانها بتقرب منه بغيظ واضح : وانت هتسمح ان مراتك حد يلبسها عطفًا وذوقيًا ؟ هاه يا سيف يا صياد ؟
سيف بتحدي : ده اختيارك انتِ يا روح قلبي مش اختياري، انا اشتريتهولك انتِ ومش هرجعه فيا انك تلبسيه وتحتفظي بيه أو تهاديه أو تولعي فيه ده اختيارك .
همس بصاله بغيظ وهي بتحاول تاخد قرار : ولو قولتلك مش هلبس أي حاجة ؟
سيف بهدوء مجننها : هقولك براحتك بس ساعتها اللي هيتقال نفس الكلام اللي امي بتقوله وبيضايقك يا همس ، هتلاقي كل صفحات المجتمع بيتكلموا ازاي مرات سيف الصياد طالعة بالشكل ده واعتقد انتِ متخيلة ايه اللي هيتقال بالظبط
همس بنرفزة : يعني أنا لازم احط جزمة في بوقي واحافظ على ال image ( صورة ) بتاعة سيف الصياد صح ؟
سيف صحح جملتها : لا يا حبيبتي ٱنا ال image بتاعتي محفوظة كويس اوي فانتِ لازم تحافظي على صورتك انتِ وسط المجتمع اللي دخلتيه، اللي هيتكلم وهيكتب هيتكلم عنك انتِ مش ٱنا ولا عيلتي .
همس فضلت واقفة قدامه بتحاول تاخد قرار وهو منتظرها فهي لفت بعنف ورفعت شعرها : اتفضل يا سيف لبسهولي بس معلومة صغيرة بعد الفرح أنا هتبرع بيه
سيف بصلها في المراية وبكل هدوء : ده بتاعك يا روح قلبي بعد الفرح اعملي ما بدالك فيه ، تحتفظي بيه ، تهاديه ، تتبرعي بيه انتِ حرة .
قفلها العقد على رقبتها وطلع الاسوره فهي شدتها من ايده بغيظ : أنا هلبسها لوحدي .
حاولت تقفلها وكل مرة بتفلت من ايدها لانها أولًا متعصبة وثانيًا متغاظة وهو معلقش منتظرها تنجز ، موبيله رن فبصله ورفعلها الموبيل : اخوكِ بيرن ، وبعدين ؟
بعصبيه مدت ايدها : اتفضل اقفلها
رد على نادر : دقيقتين يا نادر وهنكون عندك معلش
قفل معاه وقفلها الأسورة بعدها طلع علبه صغيرة من جيبه ناولهالها : الحلق والخاتم اتفضلي
اخدت الحلق و وقفت قدام المراية بس وقعت من ايدها البريمة فشبه صرخت : يوووه البريمة وقعت
سيف بص للارض : يا الله منك يا همس
الاتنين نزلوا يدوروا عليها في الأرض وانضملهم الثلاث بنات واخدوا كذا دقيقة لحد ما واحدة من البنات لقتها
فسيف اخدها منها : تعالي واياكِ تنطقي حرف واحد
همس كشرت و وقفت قصاده مصدرة خدها له فهو لبسها أول فردة وبعدها الفرده الثانية بصلها وعلق : شكلك مش حلو على فكرة وانتِ مكشرة بالشكل ده
بصت لعينيه : انت رخم وأنا مخصماك لاخر الفرح
ضحك بغيظ منها : اتعبي يا بنتي من الخصام بجد اتعبي
لبسها الناحية الثانية بعدها همس بصت للبنات : انتو هتمشوا ولا قاعدين ؟
⁃ هنمشي
همس اقترحت: خليكم قاعدين يعني ٱي حد يحتاج أي حاجة تساعدوه وهتبقى سهرة حلوة ومربحة ايه رأيكم ؟
البنات وافقوها وقرروا يفضلوا معاهم وخرجوا كلهم ركبوا الاسانصير مع بعض وسيف شدها عليه وبيهمسلها : لعلمك الطقم تحفة عليكي
كشرت وبصتله : لعلمك مش حباه
ابتسم وبص قدامه : كدابة
خرجوا منّ الأسانسير وبمجرد ما ظهروا كذا حد وقف قدامهم بيصوروهم ، همس ساعتها من جواها حمدت ربنا انها سمعت كلامه ولبسته في الآخر لانها نسيت موضوع الصحافة ده .
انضموا للباقين وفاتن قربت من سيف : هو ده اللي بسرعة ؟
سيف بدفاع : بنتك متعبة ودماغها ناشفة .
ملك مع أبوها اللي سلمها لنادر ودخلوا القاعة وايديهم في ايدين بعض ، موسيقي سلو رقصوا عليها أول رقصتهم .
وبعدها بدأت فقرات الفرح في تتابع والكل مبسوط وبيهزر .
سيف أخد همس ورايح ناحية أبوه وأمه واخته سلم عليهم وبيسلموا على همس وسلوى أول ما شافت العقد عنيها لمعت وبصت لهمس : تحفة العقد ده – بصت لسيف باستنكار – جبته منين ده ؟ وصيت عليه من بره ؟
سيف ابتسم : جبته عادي يعني وبعدين أنا عندي كام همس يعني ؟ – بص لهمس – بس هو مش داخل دماغها اوي ولا ايه يا همس ؟
