ابتسم : على العموم برضه متشكر لوقفتك معايا ومع إيان .
ابتسمت : اطمن عليه وشوف هتروح المستشفى ولا الشركة
وضحلها : هروح الشركة شوية لكريم وبعدها ربنا يسهل .
نزل وأول ما سما شافته وقفت بارتباك : بحب الأطفال
ابتسم لارتباكها والولدين جريوا عليه فقعد قصادهم على الأرض : كلنا مش انتِ لوحدك .
قعد معاهم دقيقة قبل ما يقف بابتسامة ممتنة: متشكر يا دكتورة انك جبتي خالتو وجيتوا ، أمي بتحبها كتير .
ابتسمت : وهي كمان ، أصلًا قالتلي – قلدتها – انتِ يا بت لو ما أخدتيش اجازة و وصلتيني هروح لوحدي .
ابتسم بمرح : وعرفتي تاخدي اجازة ولا ؟
طمنته : لا أخدت الحمد لله – حست بإحراجه وارتباكه فوسعت من طريقه تماما – روح شغلك ما تقلقش علينا .
هز دماغه ونبهها : طيب في سواق خاص لو حبيتي تتحركي أو تروحي أي مكان
شكرته وهو انسحب على الشركة بعدها .
سلوى صحيت من نومها ، دخلت المطبخ تجهز الفطار و طلبت من عواطف تصحي سيف علشان ما يتأخرش ، عواطف بلغتها ان سيف نزل الشركة من بدري وحتى عز كمان نزل معاه .
قعدت محبطة انها هتفطر لوحدها وهي بتفكر ازاي ترجع همس البيت .
سيف في الشركة في مكتبه كان مخنوق ومتضايق ، دخل عنده بدر اللي وقف استقبله بعدها كان هيسأله عن همس لكن تراجع فبدر فهم وابتسم وحاول يتكلم بشكل طبيعي : معلش اتأخرت النهارده شوية علشان بس وصلت همس الجامعة قبل ما أجي على هنا .
سيف ابتسم بامتنان بس بعدها هزر : لو متخيل ان ده سبب هيغفرلك تأخيرك فتبقى غلطان سيادتك .
بدر مثل الصدمة: تصدق أنا غلطان ، بعد كده هقولها تطلب أوبر بما ان مدير الشركة رخم بالشكل ده .
سيف بضحك : قصدك أبويا رخم ؟ هبلغه رأيك فيه .
بدر بسرعة : أبوك مين يا عم انت عايز تلبسنا في الحيط بأي طريقة ولا ايه ؟ وبعدين آخر معلوماتي ان سيادتك رئيس مجلس إدارة الشركة والمدير التنفيذي يبقى سيادتك المدير .
سيف اتنهد بضيق : ياريتني ما كنت ، أنا مش عايز الحياة دي يا بدر ، أنا عايز أعيش حياة بسيطة مع الإنسانة اللي بحبها وبس ، مش عايز كل ده .
بدر بصله بتفهم : بس انت مش كده ، لا انت عايش حياة بسيطة ولا ينفع تعيشها أصلًا ، وزي ما قلتلك وهفضل أقولك بص وراك وشوف الناس اللي في رقبتك وانت هتكمل وهتقف كل ما تتعب .
قبل ما يخرج وقفه بتردد : همس ما قالتش هترجع امتى ؟
بدر حرك دماغه بنفي و نصحه : ما تخليش الزعل يطول بينكم يا سيف .
نادر في المستشفى فوجئ بخالد حماه بيزوره ، قعدوا مع بعض في الكافيتريا، خالد قال بحرج : طبعا انت أكيد مستغرب أنا جايلك ليه ؟
نادر بسرعة : يا خبر يا عمي حضرتك تيجي في أي وقت وكان ممكن تتصل بيا وأنا أمر على حضرتك أول ما أخلص
ابتسم بود : طيب من غير لف ولا دوران أنا مش حابب موضوع تأجيل الفرح بس غصب عننا اتأجل
نادر بتفهم : عمي حضرتك مش محتاج تبرر أي حاجة ليا أنا شايف بعيني ومشارك في اللي بيحصل .
خالد بصتله بامتنان ؛ هو بيحترم نادر وكل يوم احترامه بيزيد قدام عينه فقال بهدوء : وده العشم يا ابني بس بمجرد ما والدة مؤمن تخرج من المستشفى تحددوا ميعاد الفرح مباشرة ، مالهوش لازمة التأجيل ، نور وقصتها مش هتنتهي قريب ودي مشاكل مستمرة فعرفني أول ما ست سناء تخرج ونحدد بعدها مباشرة .
نادر قلبه اتنطط من الفرحة بس ماحبش يظهر ده وحاول يتكلم بعقلانية : طيب ونور ؟ دي أختها و
قاطعه خالد بتعب : نادر يا ابني نور موالها طويل ومش هينتهي ، مستعد تفضل سنة مثلا لحد ما يحكموا في قضية الحضانة اللي رفعتها على جوزها ؟ ولا الملحمة اللي هتبدأ بينهم ؟ مستعد تستني ظرف كل واحد يعدي ؟ طيب هل قدامك حل تاني ؟ ملك من حقها تفرح وتعيش مش تستني ظروف كل واحد تتحسن ، نور أخدت فرصتها وحياتها والدور على ملك ، أنا ظلمتها كتير طول عمرها مش هستمر في ظلمي ليها ، هعملها أكبر فرح وهخليها تفرح لان دي أبسط حقوقها يا نادر .
نادر حس براحة وامتنان لخالد انه مش هيأجل فرحهم أكتر من كده .
بعد ما خالد مشي نادر قام يطمئن على سناء بحيث يطمن قلبه ان فرحه قرب .
همس بين كل محاضرة والتانية تروح تقعد قصاد مكان سيف اللي بيركن عربيته فيه ، قعد جنبها اصحابها وبيتكلموا كلهم ويهزروا ، هالة بس اللي فاهمة ان في حاجة مضايقة همس ومخلياها ساكتة كده .
انتبهت على محمد بيكلمها فبصتله بتيه : قلت ايه ؟ معلش ما أخدتش يالي
أحمد بهزار : انتِ مش معانا أصلًا يا همس من بدري ، مش الدكتور الحمد لله أحسن ولا ايه ؟
ردت بسرعة : اه الحمدلله أحسن أيوة
خلفاوي بارتياح : خضيتينا يا بنتي لما لقيناكي مسهمة كده قلت يكون تعبان لسه ، امال فيكي ايه طيب طالما جوزك بخير ؟ في حاجة حصلت ؟
ابتسمت بحزن واتنهدت : لا مفيش بس فرح أخويا اتأجل علشان شوية مشاكل كده وده مضايقني
اتكلموا كلهم شوية عن الفرح وبعدها همس بصت لمحمد عبدالمقصود : انت كنت بتقول ايه ؟
بصلها بحيرة فابتسمت و وضحت : كنت بتسألني من شوية عن حاجة
افتكر فضحك : اه صح كنت بقولك ما تقولي لجوزك وتستخدمي سحر الحب وخليه يجي يدينا السكشن هو النهارده مش باشمهندس حامد
همس اتمنت لو توافق وتاخد دي حجة علشان تكلمه بس بعدها اتراجعت وحاولت ترد بشكل عملي وهزار في نفس الوقت : والله يا ابني ولو استخدمت ايه طالما هو في الشركة وظروفه لا تسمح فمفيش طريقة هتنفع معاه ، بعدين لو عنده وقت مش هيتأخر أصلًا .
محمد بإلحاح: ما تتصلي به واقترحي طيب ، مجرد اقتراح وشوفي هيقولك ايه ؟
هالة اتدخلت علشا تنقذ صاحبتها : يا محمد بلاش تضغط عليها ، بطلوا تعتبروا همس مرات دكتور سيف واتعاملوا انها صاحبتنا همس وبس ، حتى لو من باب الهزار بلاش تحرجوها أو تسببوا ليها أي مشاكل مع جوزها، يعني انت ممكن تشوف دي حاجة بسيطة لكن تتسبب في مشكلة بينهم بدون قصد .
همس بصتلها بامتنان وحب وابتسمتلها أما محمد بص لهمس باعتذار : همس بجد مش قصدي أستغل علاقتك به أنا بس قلت الموضوع كاقتراح مش أكتر والله
همس بصت لزميلها بابتسامة : عارفة يا محمد بجد أنا علاقتي بيكم من سنين مش لسه هعرفكم النهارده، بس زي ما هالة قالت خلوني معاكم همس وبس مش مرات سيف ، خلوا الأمور طبيعية زي ما كانت
هبة بهزار : يعني نتكلم عن الدكتور الحلو ونتغزل فيه براحتنا ؟ – همس بصتلها بصدمة فضحكت وكلهم ضحكوا – مش بتقولي نتعامل معاكي انك صاحبتنا مش مراته ؟ ولا هو في جانب وجانب ؟
كشرت لانها ما فكرتش كده فمحمد قلبها هزار : أيوة هي قالت يبقى تتحمل اختيارها ، سيف دخل قايمة الدكاترة اللي ينفع ننم عليهم- بص لهبة – أو نعاكسهم براحتنا ودي همس صاحبتنا مش مراته .
همس بصت لهالة اللي رفعت ايديها : أنا مالي بتبصيلي ليه ؟ ماهو قرري يا انتِ مراته يا صاحبتنا لكن شوية كده وشوية كده مش هينفع ، اختاري هنا وسطنا نعاملك على أساس ايه ؟ صاحبتنا همس ولا نحط في الاعتبار انك مرات الدكتور سيف ؟
بصتلهم كلهم بعجز وهي مش عارفة تاخد قرار فــهبة سألتها : ها ؟ همس صاحبتنا ولا همس الصياد ؟
السؤال كان صعب بس فجأة افتكرت كل تفاصيل خناقها مع سيف وقسوته عليها و كلامها له انها ندمت على حبها له ، بصت لاصحابها وأخدت نفس طويل قبل ما تقول بحزم: أنا همس خاطر وهفضل عمري كله همس خاطر وده مش هيتغير حتى بجوازي من سيف .
