حالة صدمة سيطرت على الكل وصمت غريب بعد جملتها دي ، سيف كان مصدوم ان فاتن مستعدة توصل للدرجة دي في الكلام علشان تثبت وجهة نظرها وبعدين هو ثقته في همس بلا حدود واستحالة يشك فيها ، أما همس صدمتها في كلام أمها لجمتها للحظات بعدها اتكلمت بعدم تصديق: انتِ بتقولي ايه يا ماما ؟ محمود مين ده اللي حبيته؟! ده كان مجرد جارنا وبس ، سيف
– بصلها فكملت بدفاع عن نفسها- ماما بتقول أي كلام علشان تضايقك علشان انت موافق على ملك لأخويا
سيف ما ردش وبص لفاتن بغضب
فاتن وقفت قدامه بعصبية : شوفت مجرد الكلام مش قابله ؟ ان حد للحظة يكون شاركك في حبيبتك ، مجرد الافتراض مرفوض عندك .
سيف غمض عينيه علشان ما يردش رد جارح لفاتن ، فتح عينيه وبصلها بجمود : لتاني ولآخر مرة هقولك انتِ بتخلطي الأمور ببعض ولو سمحتي ما تقارنيش حبي لهمس بأي حد تاني مهما يكون الحد ده علشان بس ما نخسرش بعض
خاطر وقف بغضب: فاتن زودتيها أوي انتِ هتبلي بنتك بمصيبة علشان ايه ؟ تثبتي وجهة نظرك ؟ ما كل واحد حر في اختياراته وكل واحد مختلف عن التاني
فاتن بإصرار: هو مش متقبل كلمة على مراته وفي نفس الوقت بيبارك لنادر ويشكر في ملك ده تسميه ايه ؟
قبل ما حد يرد سيف اللي رد بقوة : أسميه ان ارتباطه بواحدة هو اختارها ما يعنيليش أتدخل فيه ، ملك كويسة ؟ اه كويسة ، قدامي كويسة، في الوسط بتاعها كويسة ، ماضيها ايه ؟ مايهمنيش أسأل فيه وما يهمنيش أعرفه ، لكن همس لما تقوليلي انها كانت على علاقة بمحمود السمري تحديدا فانتِ كده بتهدي ثقة مالهاش حدود بيني وبينها ، بتزرعي شك بيني وبينها – جت تقاطعه بس رفع ايده وقفها بحزم- ومش اعتراضي على حبها اعتراضي على الشخص نفسه لانك عارفة كويس ان سبب انفصالنا في الأول كان الشخص ده فلما تيجي دلوقتي تقوليلي انها بتحبه فده معناه انها كدابة ، من البداية من الأول كدابة وده معناه انها مش أهل للثقة لانها أكدتلي ان مفيش حاجة بينها وبينه فهنا اعتراضي مش على حب قديم أو علاقة قديمة زي ملك ، اعتراضي على علاقة اتبنت على كدب فهمتي الفرق يا حماتي ولا لسه عندك تمثيليات خايبة تانية عايزة تقوليها تكملي بها خراب بيوت لعيالك ؟
فاتن بصتله بصدمة ورددت : خراب بيوت يا سيف ؟
رد بنرفزة : أيوة خراب بيوت لما تيجي تقوليلي مراتي كانت بتحب واحد اتسبب في انفصالنا فده أيوة خراب بيوت ، ولما تقفي في وش ابنك علشان هيرتبط بالإنسانة اللي بيحبها فده برضه خراب بيوت .
فاتن دموعها لمعت وأخدت شنطتها وبصت لسيف بجمود : همس عمرها ما حبت حد قبلك ولا اتكلمت حتى مع حد قبل كده انت كنت أول واحد في حياتها ومحمود جار مش أكتر وأخلاقه عالية وعلشان كده سمحناله يكون على صلة بينا ، وأعتقد انك عارف كويس أوي ان ده كان مجرد تشبيه مش أكتر لاني واثقة تماما انك لا يمكن كنت هتحب همس لو هي في ظروف ملك انت حبيت همس الشقية اللي انت كنت أول تجاربها حبيت براءتها فبلاش تغالط نفسك – بصت لنادر وكملت بكبرياء- وانت حر روح اخطب اللي تعجبك معاك أبوك وأختك وجوزها ، أنا مش هخرب بيوت حد بعد إذنكم .
سابتهم وجت تمشي بس همس راحت وراها : ماما استني رايحة فين لوحدك ؟
– مسكتها من دراعها وقالت بتصميم : مش هسيبك تمشي ، سيف ما يقصدش المعنى اللي وصلك بس اتضايق من كلامك مش أكتر .
فاتن ردت بحزن وهي بتحاول تشد دراعها من بنتها : يقصد ولا ما يقصدش أنا مش موافقة على ملك وكلكم موافقين روحوا معاه اخطبوهاله وسيبوني في حالي وأبوكم معاكم بيعجبه أفكاركم وكلامكم أنا دقة قديمة سيبوني في حالي .
نادر واقف بحزن مش عارف يعمل ايه ولا المفروض يكون رد فعله ايه؟!
سيف قعد مكانه بغضب؛ متضايق من حماته ومتضايق من أمه ومتضايق من كل اللي حواليه حاليا ، انتبه على أبوه بيخبطه على دراعه فبصله: نعم ؟
همسله : قوم شوف حماتك اللي زعلتها
سيف بصله بضيق : أنا اللي زعلتها ؟ أنا ؟
عز شد ابنه من دراعه وقفه : اتصرف دي في بيتك .
كلامهم كان مجرد همس ، أما همس فبصت لسيف باستغاثة : سيف اتصرف
كشر أكتر ان حتى مراته بتطلب منه يتصرف ، أبوه بصله بغضب وحرك شفايفه : اتصرف
قام وراح لحماته وقف قصادها بنفاد صبر: انتِ عاملة قلق ليه للكل ؟ هو هيتجوز انتِ ايه مشكلتك ؟ يختار صح يختار غلط هو حر ، ماهواش عيل صغير هتمشيه على مزاجك .
فاتن بغيظ : بتصدر نفسك قصادي وتزعل من كلامي ما تخليك في حالك
سيف أخد نفس طويل بحنق: لما تزعلي في بيتي مني فده حالي ، سوري ما أقصدش الكلمة اللي قلتها بس كلامك حرق دمي .
فاتن بصتله باتهام : ماتقوليش انك هتشك في مراتك علشان كلمة حد قالها
سيف نفخ بضيق ووضح: انتِ مش حد انتِ أمها فكلامك مصدق مش حد والسلام ولا مش هشك في مراتي بس ده ما يمنعش ان كلامك حرق دمي برضه .
فاتن بصتله بتذمر واعتذرت على مضض : حقك عليا يا سيف يا صياد ما أقصدش أغلط في مراتك
سيف ضرب كف بكف بنزق: على فكرة مراتي دي بنتك ها ؟ وأنا جوزها ، ننهي بقى اليوم العجيب ده واتفضلوا روحوا لميعاد ابنكم علشان كده هتتأخروا .
فاتن بعناد : أيوة سيبوكم مني وروحوا لميعادكم
سيف مسك دراعها قبل ما تتحرك من قدامه : هتروحي معاهم .
بصتله بتحدي : لو روحت هخربها عليه وأنا وانت وكلكم عارفين ده كويس فبلاش أنا أروح .
الوضع كان متأزم لحد ما عز اتكلم واقترح : طيب يا سيف روح انت ومراتك مع دكتور نادر و والده واحنا هناخد معانا أم نادر لحد ما تخلصوا مشواركم ، ايه رأيك ؟ أعتقد ده حل كويس
فاتن ردت بحرج : أنا أعرف آخد تاكسي وأروح محدش يشغل باله بيا مش عايزة أتعب حد معايا .
سلوى بود : مفيش تعب وده أحسن اقتراح ، سيف وهمس اجهزوا بسرعة ويلا كلنا نتحرك قلت ايه يا سيف ؟
سيف بص لنادر اللي بيبص لساعته كل شوية، بصله و شاورله يروح معاه فوافق علشانه .
أخد همس ودخلوا أوضتهم وأول ما قفل الباب همس مسكت دراعه وقالت بتوضيح : سيف أنا عمر ما كان في حاجة بيني وبين السمري .
سيف بصلها بعمق قبل ما يرد عليها بثقة: أنا ماعنديش شك فيكي ولو ١٪ حتى يا همس أنا بس صدمتني الدرجة اللي ممكن والدتك توصلها علشان تحاول تفرض رأيها على غيرها لكن ماعنديش شك فيكي ولو للحظة يا همس .
ابتسمت بارتياح : طيب بس قولي هلبس ايه دلوقتي ؟ في وقت نعدي على البيت ؟
بصلها واقترح : البسي چاكيت البدلة وظبطي نفسك وبس
نزلت راسها في الأرض وردت بخفوت : مامتك كانت لسه بتتريق على التيشيرت
رفع وشها وباسها خدها في الناحيتين ورد بابتسامة: ما تركزيش مع كلام أمي أوي لانها هتجننك في موضوع اللبس والشكل ، أمي مش بيعجبها أي حاجة بسهولة ، أخوكي اتأخر أوي فحاولي تنجزي .
دخل غسل وشه علشان يفوق نفسه لانه حاسس انه خارج من معركة ، طلع عدل نفسه وجدد برفانه ولبس چاكيت بدلته بدون كرافتة ، همس شاورت عليها بتساؤل: مش هتلبسها ؟
نفى بهزة من راسه : لا يا قلبي مالهاش لازمة، أسبقك ؟
ردت وهي بتسرح شعرها وتظبطه ولسه هتحط لمسات خفيفة من الميكاب : ما تستناني نخرج مع بعض ، مامتك هتفضل تبصلي من فوق لتحت على الأقل أستخبى فيك .
وقف وراها و مال عليها باس راسها وقال بلوم : مابحبكيش ضعيفة وانتِ عارفة ده كويس قلتلك ما تهتميش برأي حد فاسمعي الكلام ، هستناكي برا .
نادر انسحب ودخل البلكونة كلم ملك اللي عاتبته : هتتأخر ولا ايه يا نادر ؟
اعتذر منها : حبيبتي غصب عني هحكيلك أول ما أشوفك بس نصاية كده بإذن الله وهكون عندك اعتذري لوالدك ولأخوكي بالنيابة عني بس والله غصب عني .
ملك استغربت فسألته بتوتر : في ايه اللي حصل طيب؟ طمني كنت في عملية ولا ايه ؟
ماعرفش يقولها ايه لان دي خصوصيات أخته فاتنهد ورد باختصار: أما أشوفك تمام ؟ ما تقلقيش يا حبيبتي .
قاطعه خبطة خفيفة على الباب كان سيف فشاورله يدخل وقفل مع ملك : ملك يلا باي يا قلبي مسافة الطريقة بإذن الله .
سيف بتفهم : لو بتقفل علشاني فهخرج
نادر ابتسم : لا لا مش علشانك ، باي يا ملك
ملك استغربت : استنى يا نادر انت مع سيف الصياد ؟
نادر وضحلها : اه جاي معانا هو وهمس
سيف رفع صوته بمرح: لو مش عايزانا نيجي قولي يا باشمهندسة
ملك ابتسمت : يا خبر يا باشمهندس ده حضراتكم تنوروا ، في انتظاركم .
قفلت معاهم وبعدها الباب خبط ودخل نادر أخوها بيهزر معاها : ايه عريسك هرب ولا ايه ؟
ضحكت : لا يا سيدي لسه ماهربش ، بيقول هيتأخر شوية وجاي معاه سيف ومراته
نادر استفسر : سيف ؟
فكرته : مش سيف جوز أخته ؟
حرك راسه بتفهم : مش عارف ليه دايما بنسى الموضوع ده وكل شوية بسأل ايه قرابتهم – قعد قصادها ومسك ايديها بابتسامة- المهم انتِ واثقة يا ملك في قرارك ده وفي اختيارك ؟ نادر هو الشخص اللي هيسعدك ؟
ابتسمتله بحب وأكدت : نادر هو الشخص اللي هيسعدني ، نادر فيه حنية وحب غير طبيعيين وانت هتشوف ده بنفسك لما تقرب منه .
ابتسم بس حب يوضحلها أكتر : بس مستواه المادي يا ملك مش
قاطعته بإصرار : ما يهمنيش ، هو مستواه كويس وشغله كويس وبيتشغل في مستشفى من أكبر المستشفيات الخاصة ودكتور شاطر وبعدين شقته حلوة وقريبة من المستشفى وقريبة من هنا هي بس محتاجة شوية ديكورات وعفش جديد ، فما تقلقش من الناحية دي .
وقف بابتسامة : ربنا يسعدك ويجعله خير ليكي يا قلبي ، هنزل أشوف الدنيا جاهزة ولالا وهشوف نور أم دماغ ناشف .
الباب خبط ودخلت نور اللي سألت : محتاجة أي مساعدة ؟
الاتنين ضحكوا فاستغربت : بتضحكوا ليه ؟
نادر وضحلها : لا أصل لسه بقولها هروح أشوفك فانتِ دخلتي
قعدت على طرف السرير : نادر هيجي امتى ؟ مش المفروض دلوقتي ؟
ملك وضحت : هيتأخر شوية
أخوهم بصلهم : طيب أسيبكم أنا وأنزل لأبوكي أقوله ان الصياد جاي معاه .
نور علقت باستغراب : قصدك سيف صاحب مؤمن ؟ ليه جاي معاه ؟
نادر وملك ضحكوا تاني فكشرت : هو كل ما أتكلم تضحكوا ؟
ملك بضحك : لا بس أخوكي لسه سائل نفس سؤالك
نادر علق : ولعلمك أبوكي هيسأل برضه نفس السؤال .
ملك بصت لأختها : سيف جوز همس افتكرتي؟
نور شهقت : اه اه افتكرت ، ايه الغباء ده ؟ احنا حضرنا فرحهم وكتب كتابهم ، نسيت خالص ان همس أخت نادر
نادر بصلهم : هنزل أنا يلا مستنيكم تحت .
سابهم ونزل والاتنين قعدوا جنب بعض وملك عاتبتها بهدوء: ليه مارجعتيش بيتك ؟ كنت قبلتي عرضه ورجعتي يا نور
بصتلها وأخدت نفس طويل قبل ما ترد بجمود: النهارده ليلتك افرحي بها وسيبك مني خالص .
ملك اتنهدت باستسلام وغيرت الموضوع تماما .
همس خرجت من أوضتها وأخدت نفس طويل قبل ما توصل عندهم ، لاحظت نظرات سلوى وكأنها بالفعل بتقيمها
همس سألت بتردد : امال فين سيف ونادر ؟
عز بهدوء: في البلكونة ناديهم ويلا
همس دخلت عندهم كانوا الاتنين موليينها ظهرهم وساندين على سور البلكونة فقربت من النص حطت دراعاتها على الاتنين بابتسامة: حبايب قلبي يلا
الاتنين بصولها وسيف شدها عليه بغيرة : لو سمحتي هو أخوكي وعلى عيني وعلى راسي بس ما تلمسيهوش قدامي .
نادر ضحك وراح بايس همس على خدها بمشاكسة: طيب من وراك ينفع ؟
سيف شدها لحضنه باستنكار : ما تشوفيلك حل في أخوكي ده
همس ضحكت : ماهو حبيبي برضه يا سيف .
مسك شعرها بغيظ : حبيبك ؟ طيب مفيش مرواح معاه ، امشي يالا روح لخطيبتك اللي اتأخرت عليها دي لوحدك يلا .
نادر ضحك وبص لساعته واتعدل : اه والله اتأخرت يلا بالله عليكم
سيف مسكه من دراعه بمرح : هاجي عد الجمايل .
خرجوا كلهم مع بعض وفاتن ركبت مع عز وسلوى وخاطر ركب مع ابنه وسيف وهمس .
وصلوا وخالد خرج استقبلهم هو ونادر وبعد مادخلوا وقعدوا كلهم فايزة سألت : امال والدتك فين يا نادر ؟ خير
نادر اتوتر فسيف رد بابتسامة : هو احنا كلنا ما ننفعش ولا ايه يا ست الكل؟
فايزة بحرج : لا يا خبر ازاي بقى ، بس بطمن عليها .
رد بهدوء : هي مع والدتي في البيت عندي علشان بس تعبت شوية وماقدرتش تيجي و بعدين الاتفاق ده للرجالة وهمس هنا مكان والدتها .
خالد رحب بهم ببشاشة : يا أهلا بيكم نورتونا وألف سلامة على الوالدة .
همس سألت بفضول : امال ملك فين ؟
نور وقفت : هنادي عليها لحظة .
راحت تجيب أختها ودقايق وجت معاها ملك اللي لأول مرة تعيش الجو ده والإحساس ده ، قربت بتوتر سلمت على خاطر أول واحد وبعدها همس اللي باستها وسيف وفي الآخر سلمت على نادر اللي وقف بتوتر و نفسه لو يقدر يتغزل في جمالها أو رقتها أو حتى فستانها بس اكتفى بابتسامة وسلام .
الكل قعد والإحراج مسيطر على الكل لحد ما سيف اتكلم بمزاح: ايه يا حاج خاطر مش هتفتح الليلة دي ولا ايه ؟
الكل ضحك وهو كمل بابتسامة مرحة : وقت ما كنت رايح أخطب همس أبويا فضل قاعد نفس القعدة دي سبحان الله .
خاطر بصله بمغزى : بلاش انت بالذات تتكلم عن اليوم ده .
