أخدها في حضنه جامد لان بالفعل لما بيفتكر الوقت اللي اتحرم فيه منها بيبقى مش عايزها تبعد عن حضنه لحظة واحدة حتى .
فاتن في بيتها جرس الباب ضرب فقامت تفتح وفوجئت بنادر قدامها ، فضلت باصالة فترة بعدها فتحت الباب ودخلت فدخل وراها : انتِ مقاطعاني يعني ولا ايه ؟
فاتن حاولت ترد ببرود : وأقاطعك ليه ؟ انت مش غريب هعزمك تدخل
وقف وراها بحزن: لو عايزاني أمشي همشي على فكرة
التفتتله بحدة : ما تفترضش بمزاجك وتقولني كلام ما قلتهوش ، ده بيت أبوك وبيتك وعمره ما اتقفل في وش حد علشان يتقفل في وشك .
خاطر خرج على الصوت وأول ما شاف ابنه سلم عليه بسعادة وباسه بعدها شده وقعده جنبه : طمني عنك وعن أخبارك وشغلك وشقتك ودنيتك كلها ، احكيلي
نادر بص لأمه بمشاكسة: شايفة الاستقبال ؟ اتعلمي
لفت وشها بتهكم ومش عاجبها ابنها أو حتى زوجها ، نادر اتكلم كتير هو وأبوه لحد ما سأله : أخبار ملك ايه ؟
ابتسم بهدوء : كويسة ( بص لأمه بتردد وبص لأبوه وكمل ) عايزين نحدد ميعاد للفرح .
خاطر ابتسم أما فاتن فاتضايقت و وقفت : هقوم أعمل
خاطر فهمها فقاطعها : اقعدي وما تقوميش ابنك عايز يحدد ميعاد فرحه
بصتله بغيظ منه : ما تحدد ميعاد انت حر انت وهو طلعوني أنا برا حساباتكم
نادر وقف وراح عندها : وهو ده اسمه كلام برضه يا ماما ؟ يعني ايه نطلعك برا حساباتنا وانتِ الخير والبركة ؟
ردت بسخرية : لا يا أخويا عندك أبوك أنا لا ، أنا مش موافقة على الجوازة انت مش مهتم برأيي وقلت دي حياتي فانت حر دي حياتك لكن ما تلزمنيش أنا أتقبل حاجة مش عايزاها .
نادر بص لأبوه اللي متنرفز من مراته وبصلها بنزق : هو احنا هنفضل في الموال ده لامتى ؟ ماخلاص خطبها وعايزين نحدد ميعاد الفرح فبتتكلمي في ايه انتِ؟
ردت بضيق : ما قلت أدخل انت اللي وقفتني، حددوا براحتكم انتم الاتنين حرين ولا كلم أخواتك وظبط معاهم ، شوفوا ظروف بعض واتفقوا لكن أنا خرجوني برا الليلة دي .
سابتهم ومشيت ونادر قعد جنب خاطر بحزن ، خاطر ماهانش عليه يزعل ابنه فقال بهدوء: شوف يا ابني حدد مع ملك الميعاد المناسب وأمك سيبها عليا بإذن الله هتقتنع ، احنا كلنا وراها المهم سعادتك انت والإنسانة اللي اخترتها .
نادر بص لأبوه بحزن : ازاي أهتم بسعادتي وأنا عارف انها زعلانة مني ؟
خاطر ربت على كتفه : هي مش زعلانة منك هي بس متخيلة انها بتمنع عنك أذى ، حبيبي هي أم والأم ممكن تكون شايفة وجهة نظر عيالها مش شايفينها ، فحاول تعذرها .
قام وقف : هحاول أعذرها .
أبوه استغرب وقوفه : هتدخل تريح في أوضتك شوية ؟ لحد ما أمك تجهز الأكل
نادر اعتذر : لا همشي أنا كنت جاي في السريع وعندي نبطشية بالليل
خاطر مسك دراعه : انت مش هتيجي وتمشي زي الغريب كده ، اتصل بالمستشفى واعتذر والصبح اتكل على الله لكن مش هتسوق الطريق ده كله وترجعه تاني .
نادر ربت على ايد أبوه : معلش مش هينفع اعذرني .
خاطر وقفه وطلب منه يستنى شوية ودخل أوضته عند فاتن وقفل الباب وهمس بلوم : ابنك ماشي
بصتله باستغراب : ماشي فين ؟
⁃ ماشي على القاهرة مش سيادتك قلبتي وشك قدامه اهو سايبهالك وماشي ، مبسوطة كده ؟
زعقت بصوت هامس : بقولك ايه أنا قلتلكم هو حر يعمل ما بداله عايزين مني ايه تاني ؟ أحبها ؟ مش هعرف ، الحب ده من عند ربنا وأنا مش قابلاها سبحان الله أنا حرة لكن مش هتجبروني أقبل واحدة ، هو بيحبها الله يسهله
خاطر مابقاش عارف يقولها ايه ولا يقنعها ازاي فقال: طيب سيبك من كل ده قومي اعمليله لقمة ياكلها ولا دي كمان صعبة عليكي ؟
قامت : الأكل جاهز دقيقتين ويبقى على السفرة يلا
طلعوا الاتنين بس لقوا الصالة فاضية والاتنين بصوا لبعض فعلقت : تلاقيه دخل أوضته يغير هدومه
خاطر راح بسرعة وفتح الباب لكن الاوضة زي ما هي فاضية ظلمة زي البيت كله ما بقى ظلمة بعد ما فضي من عياله التلاتة ، حس بوجع في قلبه ماكانش عايزه يمشي زعلان كده ، كان جاي وأكيد فرحان بتحديد ميعاد فرحه بس كسروا فرحته .
قعد على السرير بتاع ابنه في أوضته ولحظة ولحقته فاتن : لقيته يا
فوجئت زيه بالأوضة فاضية وبصتله بسخط: معقول مشي من غير حتى ما يسلم علينا ؟ ولسه بكرا مش هيعبرنا خالص وهي تبقى عنده بالدنيا وما فيها وينسى أبوه وأمه و
قاطعها خاطر بزعيق فيها وغضب هي أول مرة تشوفه : بس بقى ، بس اسكتي ، انتِ ايه ؟ ابنك جاي فرحان عايز يحدد ميعاد فرحه وبدل ما نحضنه ونباركله كسرتي فرحته ومشيتيه زعلان مكسور الخاطر وجاية تقولي ينسانا ويحبها ؟ طيب يا شيخة يارب ينسانا فعلا ويحبها وتغنيه هي عن الدنيا واللي فيها هدعيله ليل نهار ينسى أمه الي كسرت فرحته وينبسط في حياته يمكن يا شيخة ترتاحي وتبطلي تدخلي في أمورهم ، كرهتيهم في حياتهم وهم هنا وكنتي مجنونة على جوازهم ودلوقتي بتكرهيهم في حياتهم لما اختاروا ، اهدي بقى بدل ما هيفضل البيت ده فاضي وبدل ما نفرح بعيالنا وعيالهم وأحفادنا يتنططوا حوالينا هيفضل فاضي وظلمة كده .
ونكمل بعدين
توقعاتكم
بقلم / الشيماء محمد احمد
شيمووووو
