كريم ساب أمل واقفة مكانها ومشي وهي بتلعن غباءها اللي وصلهم للدرجة دي وهو ندم انه اتنرفز عليها بالشكل ده ، كان ممكن يحتوي الموقف بشكل أفضل من كده ويعذر غيرتها عليه بشكل ألطف بس ليه الغباء ده وايه مصدره مش عارف !
أمل دخلت تاني الجناح والكل لاحظ حزنها بس محدش علق عليه وزينب فضلت تلاعب الولدين علشان تلطف الأجواء بدل الصمت اللي سيطر عليهم .
منبه موبايل سيف رن ، همس صحيت وقربت منه تصحيه ، همست بنعاس : حبيبي موبايلك .
سيف فتح عينيه على موبايله فمد ايده قفله وأخد نفس طويل قبل مايقول بإرهاق : هو ما ينفعش نفضل على السرير كده وما أقومش منه ؟
همس ابتسمت واتعدلت وبصتله : ينفع طبعا انت صاحب الشركة كلها فلو انت مش هينفع تغيب مين اللي ينفع ؟
ابتسم وحط ايده على خدها : ياريت كل حاجة بسيطة بالشكل ده يا روحي .
رجعت مكانها على صدره وتمتمت : انتم اللي بتعقدوها ، خليك شوية وبعدها انزل .
حط ايده حواليها ضمها وسألها : صاحية من بدري ولا لسه صاحية ؟
جاوبته : صحيت على موبايلك .
قال وهو بيلعب في شعرها : طيب كملي نومك ، بكرا هتصحي بدري غصب .
ابتسمت واتعدلت بصتله بحماس : هنروح مع بعض بكرا؟
ابتسم لحماسها وبعد شعرها اللي نازل على وشها ورد برفق: هنروح مع بعض أكيد ، كل يوم مش بكرا بس ، يعني ممكن أيام بسيطة ما أروحش معاكي بس عامة اه .
بصتله بسعادة وحماس للسنة دي : ياريت تكون عندي انت أول محاضرة وندخل المدرج ايدينا في ايدين بعض
ضحك للتخيل: أدخل شايلك أحسن ايه رأيك ؟
ابتسمت بس بعدها لاحظت انه بيتريق عليها فضمت حواجبها بعبوس: وفيها ايه يعني ؟ مش مراتك ؟ حد له عندنا حاجة ؟
شد خصلة من شعرها فتأوهت : بطل رخامة وإلا هعاقبك
ضحك جامد ورد بمشاكسة : عاقبيني طيب وريني هتعاقبيني ازاي يا قمري ؟
حط ايديه تحت راسه وبصلها باستمتاع في انتظار عقابها ، لقاها قربت منه وقعدت فوقه سندت على صدره وقربت من وشه وقالت بتهديد : همنعك تروح شغلك النهارده وهحبسك في الأوضة دي لحد – فكرت لوهلة وكملت – لحد الصبح بس علشان عايزة أروح معاك الجامعة .
ضحك بعدها علق بسخرية: ده عقابك ؟ تحبسيني معاكي هنا ؟
أكدت بتحدي : اه هحبسك
شدها تاني من شعرها فاستغربت
وضحلها بمشاكسة: بزود مدة العقاب
ضحكوا مع بعض بعدها قال بغزل: لو هنتحبس أنا وانتِ في مكان ويفضل مقفول علينا ده كدا بقى جنة يا روح قلبي وأجمل جنة ممكن أتمناها .
ردت بلهفة وهي بتقرب منه أكتر : طيب ايه المانع ؟ ليه تفضل واحشني على طول ولحد امتى هفضل مستنياك وبتمنى أشبع منك ؟
ضمها لحضنه ورد بحب : يارب العمر كله يا همس نفضل نحب بعض لدرجة ان حتى مرواح الشغل ده بيخلينا نوحش بعض .
بصت لساعته في ايده وسألته : مستعجل ؟
بص زيها لساعته ورجع بصلها بابتسامة : معاكي ساعة اؤمري عايزة تعملي ايه ؟
ابتسمت ولفت ايديها الاتنين حوالين رقبته : مجرد اني أفضل في حضنك وأحاول أشبع منك الساعة دي .
ابتسم بعشق ودخلها أكتر لحضنه ولعالمهم الخاص اللي لحد الآن بيكتشفوا كل يوم حاجة جديدة فيه بتعلقهم ببعض أكتر .
بعد فترة سيف بص لساعته واتحرك علشان يقوم فمسكت دراعه برجاء: خليك شوية تاني
باسها وبعد: كده يادوب آخد دش وننزل وبعدين في ندوة هنحضرها كلنا مع كريم .
اتعدلت وهي بتشد الغطا عليها وسألته بفضول : ندوة ايه ؟ ينفع أحضر ؟
بصلها بتفكير : ينفع ليه لا؟ الساعة ٢ تكوني جاهزة هعدي عليكي أو لو ماقدرتش نصر هيجيبك عندي
سألته باستغراب لانها ماتوقعتش يوافق : ندوة ايه أصلا ؟
وضحلها وهو بيطلع هدومه وهي شدت التيشيرت بتاعه لبسته وقامت وراه: ندوة عاملاها ناريمان الغندور معرفش تسمعي عنها ولا لا بس هتعمل كورسات كمبيوتر بتعلم فيها برمجة وتخصصات تانية وطلبت من كريم يحضر الافتتاح ويتكلم عن البرمجة وطبعا عزمت باقي المجموعة علشان نتبرع للمشروع اللي هي بتعمله لانها عاملاه بشكل خيري ومصاريف الكورسات هتبقى رمزية للطلبة .
سألته بفضول : طيب ناريمان دي هتستفيد ايه أصلا ؟
وضحلها : اللي عرفته ان المركز اللي فتحته ضخم ومش هيبقى تعليم كمبيوتر وبرمجة بس دي هي كمان أستاذة لغة فرنسية فاللي هيروح هيلاقي مركز متكامل بيدي كورسات في مختلف المجالات ولما يتحط اسم زي كريم المرشدي معاها ده هيرفعها للسما يا حبيبتي ، سمعة كريم في البرمجة معروفة في المجال ده فهي استعانت به وطلبت منه يدرّس ويديها من وقته ساعتين أو أربعة في الأسبوع بس رفض لكن هيرشحلها حد من عنده وعلى ما أعتقد أمل مراته هي اللي هتهتم بموضوع الكورسات .
سألته بفضول أكبر : طيب احنا هنروح ليه ؟
رد بهدوء : لانها كلمتني وافتكرت اني هوافق بما اني بحب التدريس ودكتور جامعي بس ماعنديش وقت ولا دماغ ليها فطلبت مني على الأقل أشارك معاها في احتفال الافتتاح ونتبرع للمركز بتاعها .
همس : هتتبرع بكام ؟
ابتسم لفضولها وأسئلتها اللي مش بتنتهي : مش هتبرع بفلوس يا حبيبتي هتبرع بأجهزة كمبيوتر ، هنغطي احتياجها من الأجهزة .
همس بدهشة لانها تخيلت هيتبرع بكام ألف كحد أقصى : سيف ده الجهاز الواحد بيتكلف من ١٠ ل ١٥ وده العادي جدا انت هتتبرع بكام جهاز ؟
قرب منها باس أرنبة أنفها : ممكن حبيب قلبي ما يشغلش باله بالأمور دي ؟ التبرعات دي حاجة أولًا لله وثانيا اسم الشركة مكتوب على كل جهاز فده بيفيدنا مش بيضرنا فهمتي ؟ أنا كده هتأخر .
سابها واتحرك علشان يدخل ياخد الشاور بتاعه وهي قعدت مكانها فبصلها: هتفضلي قاعدة كده كتير ؟
ابتسمت بعدم فهم: انت عايزني أعمل ايه ؟ أطلع برا ؟
ما اتكلمش بس مدلها ايده مسكتها فشدها معاه .
سلوى بتشرف على الفطار ، نزل عز قعد على السفرة وبصلها : عيالك محدش فيهم صحي ؟
بصتله وقعدت جنبه : مش عارفة بس أعتقد صحيوا وتلاقيهم دلوقتي هينزلوا .
طلب قهوته فناولتهاله مع ساندوتش صغير ياكله ، ونزلت آية انضمتلهم وبمجرد ما قعدت سلوى سألتها : هتروحي الشركة ؟
بصتلها لوهلة قبل ما ترد بسؤال : انتِ مش عايزاني أروح ؟
ردت بعدم رضا : ما ترديش سؤالي بسؤال هتروحي ؟
آية متضايقة منهم وده ظهر في ردها المتحفز: هروح إلا لو مش عايزيني أروح براحتكم .
عز بصلها ومد ايده مسك ايدها بحنان: يا حبيبتي وروح قلوبنا كلنا وحتى أخوكي احنا لما بنتكلم معاكي فده لاننا بنحبك وتهمنا مصلحتك وبس ، خناقنا معاكي حب ليكي وانتِ لازم تكوني فاهمة ده كويس .
آية بصت للأرض بحزن : أنا مابقيتش متحملة خناق مع سيف كل شوية وتفسيره لأي تصرف مني غلط
عز رفع راسها ورد بعقلانية: بطلي تديله الفرصة انه يفهم تصرفاتك غلط ، طول عمركم انتم الاتنين الكل بيحسدكم على علاقتكم ايه اللي جرى ليكم ؟
آية اتنهدت بضيق : حازم اللي جرالنا وسيف ماعندهوش استعداد ينسى اللي حصل .
سلوى اتدخلت باتهام : لانك برضه مصممة تغلطي تاني سواء مع باسم أو مع سبيدو ، ابعدي عن اصحابه طالما ده بيضايقه .
آية لسه هتزعق مع مامتها بس قاطعهم صوت سيف نازل وفي ايده همس ، صبح عليهم فردوا عليه بس بمجرد ما قعد عز وقف وقال باقتضاب : ابعتيلي قهوتي الجنينة يا سلوى .
سيف نفخ بضيق وبص لأمه : هو لسه زعلان ؟
بصتله باستغراب : وهو انت كنت صالحته علشان تسأل لسه ولا خلاص ؟
وقف وبصلهم بقلة حيلة: لو صوتنا علي اتدخلوا .
سلوى بتحذير : سيف
بصلها وابتسم : حاضر
خرج لأبوه قعد قصاده فلف وشه بعيد بس سيف شد الكرسي قربه منه وقال بأسف : حقك عليا أنا آسف اني عليت صوتي بالليل .
عز ما ردش فسيف مسك دراعه وقال باستمالة: ايه يا حاج وبعدين ؟ أنا بتكلم
عز بصله بغيظ : عايز ايه مني دلوقتي يا سيف ؟
سيف بحرج : عايزك تقوم تفطر معانا ده أولا وثانيا تعذر غبائي امبارح ماكانش قصدي أي كلمة من اللي قلتها .
بصله بحزن: بس انت كل كلامك كان صح أنا اللي اديت حازم حجم أكبر من حجمه وأنا اللي دخلت عصام وأنا اللي
سيف قاطعه : حازم كان صاحبي وأنا كنت عارف انه حقود شوية بس قلت اتغير لما اشتغل معانا وبقى له مرتب كويس وعصام كان تعبان وفضل يلف حواليك كتير فأي حد كان هيتصرف زيك فما تلومش نفسك .
عز بصله كتير قبل ما سيف يكمل بندم : ولو في حد غلطان امبارح فالحد ده أنا ، أنا اتنرفزت على آية فعلا ومااديتلهاش فرصة تشرح أو تتكلم وبعدها اتنرفزت على حضرتك فحقك عليا بجد .
عز بتردد : وأختك اللي قلت هتقطع معاها دي ؟
سيف أخد نفس طويل : انت عارف كويس جدا اني بحب آية وكل كلامي خوف عليها لكن عمري أبدا ما في يوم هتخلى عنها أو أبعد عنها وده وعد وعهد عليا طول ما أنا عايش ما تخافش عليها .
عز بصله بشك فسيف أكد : ما تقلقش عليها ، يلا قوم نفطر بقى وانسى تخلف ليلة امبارح .
جوا سلوى قاعدة ولاحظت ان همس شعرها مبلول ، حاولت تفضل ساكتة بس ماقدرتش فعلقت بجمود : همس بعد كده تنشفي شعرك كويس قبل ما تنزلي ما ينفعش تخرجي بشعرك مبلول كده وتعرفينا كلنا انك واخدة شاور انتِ وجوزك .
همس بصتلها بصدمة قبل ما ترد بحرج : حاضر .
حست انها مخنوقة؛ حماتها فعلا مش بتعدي أي حاجة وبتعلق على كل حاجة ، فكرت تقوم تطلع أوضتها بس سيف هيرجع ومش بعيد يتخانق مع أمه وكفاية امبارح اتخانق مع أبوه واهو بيصالحه ، كانت باصة للأكل ومش قادرة تاكل بالرغم من انها كانت جعانة .
انتبهوا كلهم على دخول سيف وعز وقعدوا معاهم على السفرة ، سيف لاحظ ان همسته باصة للطبق قدامها وشاردة تماما .
آية وقفت : الحمدلله أنا رايحة الشركة .
سيف وقفها : انتِ رايحة ندوة ناريمان ؟
نفت : لا ماليش في الندوات والجو ده ، انت عايز مني حاجة؟
سيف نفى بهدوء : لا روحي خلاص الشركة على الأقل تكوني موجودة لاني هروح ومش عارف هرجع امتى .
سابتهم وهو رجع بص لهمسته اللي زي ما هي، أخد كرواسون وحط فيه جبنة زي ما كانت بتعمل في شهر العسل وناولهالها فابتسمتله ابتسامة خفيفة وأخدتها منه .
نادى على عواطف اللي جت بسرعة فسألها : فين الشاي ؟ همس مش بتشرب قهوة الصبح بتشرب شاي فيكون جاهز على السفرة وما تنسيش النعناع
عواطف بسرعة : دقيقة واحدة يا ابني بس ماكنتش أعرف هتصحوا بدري ولا لا وإلا كنت جهزته .
سابتهم ودخلت المطبخ وهمس بصت لسيف بإحراج : مش لازم يا سيف ممكن أشربه بعد الأكل عادي .
بصلها : حبيبتي زي ما متعودة تعملي اعملي، وبعدين هي دقيقة وهتعمله مش حاجة صعبة يعني .
عواطف رجعت بالشاي حطته قدام همس : اتفضلي يا عروستنا الحلوة .
همس شكرتها وأخدت منها الشاي .
أكلت وبصت لسيف بابتسامة : الجبنة دي حلوة أوي .
سيف ابتسم بلطف: بالهنا يا حبيبي ، هروح أنا الشركة وانتِ قرري هتيجي ولا ايه ولو هتيجي زي ما قلتلك الساعة ٢ تكوني جاهزة .
قام وبصلهم : أنا رايح الشركة لو في حاجة كلموني .
راح لأمه باس خدها وعواطف جابت شنطته اللي فيها اللاب وادتهاله فشكرها : اه صح عواطف الجبنة اللي عجبت همس دي مش عايزها تخلص من البيت اعرفي نوعها وتبقى موجودة على طول
عواطف هزت راسها بموافقة وسيف كمل : وكمان النعناع
ابتسمت بمشاكسة: حاضر ما تقلقش عليها انت محسسني انها بنتك الصغيرة مش مراتك .
سيف بتأكيد : لانها فعلا بنوتي الصغيرة ، خلي بالك منها بقى وبعدين هي ما أكلتش كويس مش عارف ليه ، شوية كده اديها كرواسون وجبنة واعمليلها شاي وطلعيه عندها فوق .
قالت بابتسامة: يا ابني روح شغلك بقى وأنا ههتم بها خلاص .
ابتسم وخرج بص لهمس اللي قامت وراحتله وخرجت معاه لبرا فضمها لحضنه برفق : ايه مالك ؟ ايه اللي ضايقك ؟
ابتسمت بنفي : مفيش يا حبيبي خلي بالك من نفسك بس
بص لعينيها وسأل بشك: بجد مفيش ؟ كنا نازلين مبسوطين ايه اللي قفلك كده ؟
حافظت على ابتسامتها : مفيش صدقني
مسك خدها بابتسامة : حبيبتي اللي بعرف أقرأها كويس متضايقة بس هسيبك براحتك دلوقتي ولما أرجع هعرف منك ايه اللي ضايقك .
باسها كذا مرة ومش عايز يسيبها بس قاطعهم حمحمة مامته فهمس بعدت عنه بسرعة وقالت قبل ماتنسحب : هسيبك أنا وهكلمك فون .
الاتنين راقبوها لحد ما دخلت ، سيف بص لسلوى باستفسار : في ايه ؟
سألته بفضول : صالحت أبوك ؟
سيف : أيوة مش قعد وفطر ؟! كله تمام ما تقلقيش ، المهم صح همس مالها ؟ كانت مبسوطة فوق والأمور تمام ايه اللي حصل وأنا برا ضايقها ؟
سلوى كشرت هل معقول اتضايقت علشان قالتلها تنشف شعرها ؟ بس هي قالتها عادي .
سيف لاحظ انفعالات وشها فسألها باتهام : قلتيلها ايه ؟
بصتله باستنكار : وليه بتفترض اني قلتلها حاجة تضايقها ؟
سيف أخد نفس طويل ورد بوضوح : لاني عارفك كويس وعارفها هي كمان فقلتيلها ايه ؟
سلوى بعصبية : ماقلتش يا سيف بس طلبت منها بعد كده تنشف شعرها ما تسيبهوش مبلول وقلتلها مش لازم نعرف كنتم بتعملوا ايه في أوضتكم .
سيف بص لأمه بذهول ومستغرب ازاي متخيلة ان الكلام في حاجة زي دي ما يضايقش أو ازاي مستغربة ضيق همس
سألها بعدم تصديق : انتِ بجد قلتيلها كده ؟
ردت بتأكيد : أيوة فيها ايه ؟
سيف حاول ما يتعصبش ويزعل أمه زي ما زعل أبوه امبارح فرد بغضب مكتوم: انتِ بجد مش شايفة ان كلامك يضايق ؟
سلوى نفخت بضيق : يوووه يا سيف ايه في كلامي يضايق اديتها نصيحة أو علقت على حاجة معينة مش قلت أهتم بها وأحبها ؟ ده حبي .
سيف باستنكار : ده الحب ؟ امال شغل الحموات يكون ايه لو ده الحب ؟ حبك انك تحرجيها بكلامك ؟ بعدين هي حرة ، شعرها وهي حرة فيه ، تنشفه ، تبله ، تولع فيه هي حرة يا أمي، بطلي تتدخلي في أمور خاصة بينا ، بلاش توصليني بجد لقرار اني أسيب البيت يعني لو مش هناخد راحتنا في البيت اللي هنعيش فيه يبقى نمشي منه ، هي مش خارجة علشان تنشف شعرها وبعدين أنا قلتلها تنزل به كده علشان اتأخرت ويادوب نفطر فما تيجيش انتِ تضايقيها .
ردت بغيظ منه : يعني شعركم انتم الاتنين مبلول ده معناه ايه يا سيف ؟ بلاش التصرفات دي أختك لسه بنت و
قاطعها بحزم: أختي ، انتِ، أبويا، كلكم محدش يتدخل في حاجة بنعملها أنا وهمس جوا أوضتنا ولو هتفضلي تراقبي تصرفاتنا وهزارنا وكلامنا يبقى نروح شقتنا لكن هتتعاملي معاها بالشكل ده يا أمي لا
سلوى : سيف أنا
قاطعها : ما تقوليش سيف ، بطلي تضايقي همس يا أمي ، وما تنسيش انها صغيرة في السن وخبرتها معدومة وطبيعي تتعامل ببراءة وتغلط وتتهور وانتِ سبق وقلتي هتعتبريها بنتك مش تقفيلها على الواحدة!
سلوى بتبرير: أنا ماوقفتلهاش أنا بس
قاطعها بجدية : دي مش نصيحة ده نظام – سكت و ماعرفش يسميه ايه فكمل – معرفش ده ايه بس ده شغل حموات ، لانك لو مش هتتعاملي كحما يبقى لما تشوفينا نازلين مبسوطين ايدينا في ايدين بعض تفرحي وتحمدي ربنا ان ابنك مبسوط ومراته في حضنه لكن لما تعلقي على حاجات زي دي فهي دي تصرف الحموات لان شوية شوية هتقفليها منك وهتفضل هي في أوضتها بعيدة عنك .
سلوى بتراجع: خلاص مش هنصحها تاني ومش هتدخل تاني ينفع نفض الموضوع ده ؟
هز راسه بموافقة واتمنى تنفذ كلامها وماتتدخلش تاني في حياته هو ومراته، استأذن وسابها وراح الشركة وأول حاجة عملها كلم همسته واطمن عليها وقالتله هتروح معاه الندوة .
