سكريبت حواء_تتنفس بقلم رُلى_كوجك وااقعية الجزء_الآۆلْ_والاخير

(( بعد مرور عامين ))
رجعت على بيتي بتعب بعد ما مريت على امي وسلمت عليها.. لأنو بيتي صار كتير قريب على بيتها بعد ما انتقلت.. نظرة الناس يلي معي بالشغل ما كانت شفقة.. لأني مسحت هالنظرة من قاموس يلي حواليي.. كانوا ينظرولي بالمرأة يلي بينضرب فيها المثل.. طبخت باطرش.. ابني عامر كتير بحبو.. وحطيت جنبو شوية مخلل ولبن.. وصلوا ولادي من المدرسة.. اكلوا ودخلوا على غرفتن ليناموا.. شلت الاكل من عالطاولة وعملت فنجان قهوة.. رحت عالصالة قعدت لحالي وبدأت اتذكر كلشي.. من وقت ما توفى زوجي لحد هلأ.. محاولات بيت حمايي انهن ياخدوا الورتة لهلأ دائمة.. ما بعرف كيف مستحملين.. لولا ولادي كنت تركت كل المصاري ورحت.. بعد شوي اجا لعندي ابني نذير..
نذير: كيف امي
ريهام: الحمدلله.. كيفك انت كيف دراستك
نذير: تمام ماشي الحال
ريهام: خير ابني في بتمك حكي
نذير: اي ماما..
حك راسه بخجل بعدين رفع راسو لعندي
نذير: امي.. اناا بدي اشتغل
ريهام: حبيبي لي هيك عم تحكي.. انا منقصة عليك بشي؟ أي شي بدك ياه بجبلك ياه
نذير: لا مو هيك امي.. انتي امانة المرحوم ابي.. ما بصير تتعبي هيك وتطلعي تشتغلي.. انا بعد المدرسة بشتغل أي شي بيعيشنا
ريهام: حبيبي نذير ما عاد بدي اسمع منك هالحكي.. انا لما عم اطلع عم انبسط كتير انو أحوالنا عم تتحسن.. لأني اخدت عهد ما المس الورتة.. هي الكن
ابتسم نذير بألم وطلع لبرا.. نزلوا دموعي يلي كنت حابستن.. ابني هيك عم يفكر.. مسحت دموعي لما دق الباب.. اجت بنتي نايا لتفرغ طاقتها عندي بدأت تحكي شو صار معها بالمدرسة وانا ماعم اسمعها.. كنت عم فكر بحكي نذير
نايا: بعد ما بعدوها عن لانا صارت تسبها وتسب مديرة المدرسة
برأيك مين معو الحق؟
ريهام: ……………..
نايا: ماما وين صفنتي
ريهام: اي حبيبتي معك معك
نايا: خلص امي انتي عنجد تعبتي.. روحي ريحي حالك
حطيت ايدي على راسها بحب ورحت على غرفتي.. تغرقت مخدتي بدموعي.. هي مو أول مرة.. من اول ما توفى زوجي ما نشفت مخدتي ولا يوم.. بعد فترة نزلت اختي من الامارات.. كتير انبسطت فيها وبولادها.. عالأقل غيرنا جو.. ولادي كتير تسلوا مع ولادها وصارو يضحكوا دائما.. تمنيت لو يضلوا هون دائما مشان ولادي ما تفارقهن الضحكة.. اجا يوم الوداع.. خلص رح يروحوا مرة تانية ويتركونا.. كتير زعلت.. اخواتي التلاتة برا البلد.. ودعناهم ورجعنا عالبيت.. زعلوا شوي ولادي بعدين مشي الحال.. بس يلي لاحظتو انو نايا كتير زعلت على أرجوان بنت اختي.. بآخر فترة كتير كانوا يحكوا وقريبين من بعض..

—————————

وبيوم دق الباب.. اتطلعت من العين الساحرة لقيت بنت حمايي سمية.. و ولادي لساهن بالمدرسة.. صارت تدق بقوة وانا عملت حالي مو بالبيت
سمية: ريهام افتحي.. بعرف انك بالبيت.. افتحيلي يلاا..
بعد ثواني سمعت صوت ابني عامر عالدرج.. حكوا شوي برا بعدين فتح الباب ودخلها..
سمية: شو ليش ما فتحتي الباب من الأول
ريهام: ما سمعت الجرس..
دخلتا عالصالة وطلعت
ريهام: اهلين عمورة.. شو وينن نذير ونايا..
عامر: تحت عند البقالية
ريهام: ماشي
دخلت فورا عالغرفة ودقيت للبقالية وقلتلو يعطيني نذير..
نذير: الو
ريهام: نذير
نذير: اي امي
ريهام: ليك بتاخد نايا وبتروحوا على بيت جدكن.. ما تطلعوا لفوق
نذير: ليش شوفي امي
ريهام: عمتكن سمية هون.. وبدها ترجع تحاول تحكي معكن وتعطلكن.. فمابدنا وجع الراس
نذير: طيب امي سلام
عملت فنجانين قهوة واخدتا عالصالة
سمية: شو وينن نذير ونايا
ريهام: مابعرف لسا ما اجوا
سمية: ايه منستناهن
ريهام: مابعرف كأنو مطولين.. مافي داعي تعذبي حالك
سمية: لا ولو.. لاعذاب ولا شي.. بس معلش كاسة مي
هزيت براسي وقمت لجيبها
لما رجعت لقيت سمية ماسكة سوارتي الدهب بايديها وعم تتفحصها
ريهام: احم احم
وقعت السوارة من ايدها لما شافتني
ريهام: خير سمية في شي
سمية: اه؟.. لا لا مافي شي.. بس عم قول سوارتك حلوة
ما رديت عليها.. مافيني جاملها وقلها مقدمة.. لأني ما هضمتا…وهي راس المشاكل كلها.. انا بعمري ما كرهت حدا لأنو هاد مو من طبعي.. اخدت السوارة ولبستها.. انتظرت سمية شي ساعة بعدين راحت.. دقيت لولادي مشان يجوا.. وحطيت الغدا وقعدت استناهن

———————–

مرت كمان سنتين ولسا ازعاجات بيت حمايي دائمة.. ورجعت نزلت اختي وولادا.. رح تخلي ابنا يضل عم يدرس هون.. كتير فرحت انو رح يكون في رفيق موثوق لابني وهيك ما بضل وحيد.. بس بناتا نزلوا فترة اسبوع.. أرجوان كانت كتير متغيرة.. شخصية تانية.. تفاجأت فيها وما توقعتا بهاد النضج.. كتير حاولت بطرق غير مباشرة افهم شو يلي غيرها بس ما قدرت اوصل لهالشي.. كتير انبسطت مع بنتي نايا.. دائما بيحكوا سوا وبيتسلوا.. رجعوا سافروا ورجعت موجة الحزن صابتنا لأنو بعد اختي سافروا امي وابي على مصر.. بس فترة وتخطيناها.. يومي كان شبه روتين ممل.. بروح عشغلي.. برجع عالبيت بعمل غدا وبنظف لبين ما يجوا ولادي.. براجعلن دروسهم.. ومنحكي شوي بعدين بحط راسي وبنام.. وبيوم رحت عشغلي ودخلت على مكتبي.. واجا لعندي المحامي عدنان…
المحامي: السلام عليكم
ريهام: وعليكم السلام
المحامي: الصراحة انا عم استقبل تهديدات من قِبل الاستاذ سمير
ريهام: على شو عم يهددك ؟
المحامي: بدو مني اترك هالقضية
ريهام: مشان يشتري محامي تاني ويزبطلو الوضع.. مو؟
المحامي: اي.. وللصراحة انا مابدي ادخل لهالقصص هي
ريهام: بشو هددك؟
المحامي: امور خاصة اختي
ريهام: طيب يعني بدك تترك القضية؟
المحامي: اي
صفنت شوي بعدين فتحت شنتايتي وعطيتو حقو للمحامي وراح.. ونبهتو انو ما يقول انو هو ترك القضية
بعد مرور يومين
ريهام: مرحبا
سمية: 😒😒
نذير: كيفك عمتو
سمية: عايشين
ريهام: هاد المحامي الجديد سامي
سمير: كيف يعني الجديد
ريهام: لأنو يلي هددتو انت ماعاد بدو يكمل معنا.. فجبت واحد جديد
سكت سمير لما الكل اطلع فيه.. طلعت حماتي من غرفتا
ام سمير: اهلين بنتي ريهام.. كيفك
ريهام: اهلين مرتعمي.. تمام الحمدلله.. وانتي
ام سمير: الحمدلله..
كانت حماتي غير عن ولادا.. طيوبة كتير ومحبوبة بين الكل
أم سمير: خير ريهام مين هاد
ريهام: هاد المحامي الجديد
ام سمير: شو ليش وينو المحامي عدنان
اجيت لاحكي بس قاطعني سمير
سمير: ماعاد بدو يشتغل معنا
ام سمير: ايواا.. طيب انا فايتة اعمل قهوة
ريهام: مافي داعي تعذبي حالك مرتعمي.. انا جاية بس 10 دقايق
ام سمير: على راحتك بنتي
دخلت لجوا على غرفتها وبعدها بثواني نطق احمد
أحمد: كيف بتهدد محامي العيلة انت
سمير: اسكت ما تحكي.. انا بعرف اتصرف
أحمد: لك هاد المحامي كان يتعامل معو ابي الله يرحمو وهلأ انت خليتو ينفر منا
سمير: لك اسكوت بقا سكووت.. وانتي.. كيف بتجيبي محامي بدون ما تقليلنا
نذير: عمي ما تحكي مع امي بهالطريقة
سمير: ما ناقصنا غير فصعون يتفهمن علينا
انا بعرف نذير فورا بيفور دمه.. لهيك حبيت لف الموضوع
ريهام: خلص ابني اتركن
طلعنا وطلع معنا المحامي.. طبعا انا شرحت للمحامي الوضع لأني مو حابة يتركني بنص الطريق.. وهو وافق
ريهام: ابني ما بصير تحكي هيك مع عمك
نذير: لك امي ما شفتيه كيف حكى معك
ريهام: ولو كان ابني.. نحن شو بدنا من هالدنيا غير رضا الله.. بيضل عمك هاد.. ماشي حبيبي؟
نذير: خلص امي امرك
نزل باس ايدي وطلع
ريهام: الله يرضى عليك
مر 3 ايام على هالقصة بعدين اجاني اتصال من سمية
فصلت اول مرة بس رجعت اتصلت..
ريهام: الو
سمية: لكك معلمة ولادك الخباثة.. روحي ضبي ولادك.. لك مين هنن ليهددونا
سكتت للحظة وماعدت افهم شي
ريهام: سمية اول شي احترمي حالك وتاني شي.. شو عم تقولي
سمية: ايوا هلأ اعملي حالك البريئة يلي ماعرفانة شو عاملة
ريهام: اذا بدك تضلي تحكي بهي الطريقة لبقا تتصلي
فصلت بوجها وحطيت ايدي على راسي
ريهام: ياا ولاد.. يا ولاد.. تعوا لهون

—————————

اجوا ولادي وهنن عم يركضوا
نذير: شوفي امي شبك
ريهام: شو عاملين
نايا: يعني شو بدنا نعمل
ريهام: شو عاملين لبيت جدكن
نايا: امي مشان الله قطعتيلي دراستي مشان هالسؤال… يعني شو بدنا نعملن
عامر: امي شو صاير
نذير ما نطق ولا حرف.. اكتفى أنو ينزل راسو
ريهام: اطلعوا لبرا
اجا بدو يطلع نذير
ريهام: نذير خليك هون وسكر الباب وراهن
سكر الباب وأشرتلو يقعد عالكنبة وقعدت مقابيلو.. قلت بهدوء
ريهام: ماما نذير خبرني شو عامل
نذير: ………………
ريهام: لا تضل ساكت.. خبرني بس حابة اعرف
نذير: امي انا مليت من إلحاحهم علينا.. فقررت اخلص من هالشي
ريهام: شو عملت؟!
نذير: امي.. وقت رحنا مع المحامي.. شغلت مسجل الصوت بموبايلي قبل ما ندخل.. ووو.. وسجلت الحكي يلي صار أنو عمي سمير هدد الاستاذ عدنان.. وانا سألت وعرفت انو اذا صار تهديد بيحبسوه مدة من 3 ل 6 أشهر
ريهام: …………..
نذير: بعتو لعمي سمير وقلتلوا اذا بيعود بيحكي معنا بخصوص الورتة رح سمع هاد التسجيل للشرطة.. عصب كتير عليي وصار يبهدلني بأبشع الألفاظ
ريهام: ……………
نذير: امي احكي لا تضلي ساكتة هيك
ما قدرت اتحكم بدموعي..
رحت لعندو وضميتو
ريهام: ابني ليش هيك عملت
نذير: امي.. انا كل يوم بشوف كيف مخدتك مغرقة دموع.. كل يوم بشوف تعبك معنا ومن بيت جدي.. كل يوم بشوف فيكي الانسانة العظيمة يلي لازم اقتدي فيها.. ما قدرت خليكي هيك.. ما قدرت
بكيت من كل قلبي.. ابني صف حادي عشر ومن هلأ حامل هم كبير على كتفو.. كانوا نايا وعامر واقفين عالباب وعم يبكوا بصمت.. مديت ايدي الهن واجوا لعندي .. ضميتن كمان وقضينا هديك الليلة عم نبكي سوا
فقت تاني يوم وفيقت نذير
ريهام: ابني.. انت عنجد ناوي تبعت هاد التسجيل للشرطة؟
نذير: لا امي.. مستحيل اعمل هيك.. هاد بس كان تخويف
ريهام: طيب جيب ال CD يلي عليه الصوت
نذير: حاضر امي
غاب شوي وبعدين اجا.. طلعت عالبرندة وكسرت ال CD.. بعدين رميت الشقف ليختلطوا مع حبات الهوا و يلامسوا الأرض..
ووقتها اخدت قرار نهائي.. ما كان عندي حل غير الهروب.. مع انه بعرف كتيير منيح انو هاد مو اسلوب حكيم لنحل الأمور.. بس هروبي فتح عليي باب الجنة من أول وجديد..

—————————–

خبرت اختي نادين وقلتلها بدنا نجي عالامارات ولادي عارضوني بس انا لقيت انو هاد الصح.. سحبنا مال الورتة و بعد اسبوع طلعنا عالامارات بدون ما نخبر بيت حمايي.. لما وصلنا استقبلونا اختي وبناتا.. مافي متل هوا سوريا.. بس كنت مضطرة.. كتير أصرت عليي اختي نام عندا بس ما كان بدي احجز حريتا.. حجزت بفندق انا وولادي لبين ما نلاقي شقة مناسبة نستأجرها وتكون قريبة على اختي
بعد يومين لقينا شقة وقعدنا فيها.. وتالت يوم نزلت دور على شغل.. ساعدتني اختي حتى لاقي وفعلا لقيت شغل بشركة ممتازة وبراتب عالي.. داومت أول يوم كان كلشي غير.. مكاتب منظمة ودقة بالمواعيد.. انا تأخرت خمس دقايق ونبهتني مديرة الشركة انو ما اتأخر.. بعد ما داومت بالشركة عنجد تغيرت.. صرت كتير منظمة بمواعيدي.. فيق بكير ونام بكير.. سجلت ولادي بنفس مدرسة بنت اختي ليكونوا سوا.. كان دوامي من الساعة 8 للساعة 1 الظهر.. برحع عالبيت بجهز الغدا لبين ما يجوا ولادي عالساعة 1 ونص.. ومن حسن حظي كانت الشركة قريبة على بيتي.. عالساعة 3 العصر كنت انزل آخد دورات ثقافية تعليمية.. كانت دورات منوعة ومفيدة كتير.. منها طرق التعامل مع بعض الناس.. وعالساعة 4 روح على مسجد لتحفيظ القرآن.. برحع عالبيت الساعة 6.. بلاقي ولادي مخلصين دروسهن وعم يحكوا سوا.. كتير كنت انبسط لما شوف علاقتهن قوية.. عالساعة 8 المسا كنت طبق يلي قالولي اياه بالدورة.. لازم تعطي ولادك عالأقل ربع ساعة.. يحكولك فيها كلشي وانتي تحكيلن.. مشان تضلي قريبة منهن.. ما لازم تعصبي عليهم كتير.. حتى يعطوكي ثقة كاملة ويأمنوا على كل أسرارهن معك.. ولادي كتير حبوا هي الفقرة.. بدال ربع ساعة عملوها ساعة.. كلنا منسمع لبعض ومننصح بعض.. ابني نذير نجح عالباكلوريا (( ثاني عشر )).. بنتي نايا نجحت عالعاشر.. ابني عامر نجح عالسابع.. كانوا من الأوائل عالمدرسة.. نايا تغيرت كتير.. صارت كتير تحب الأشغال الفنية بعد ما نصحتا بنت اختي أرجوان بهالشي.. صارت فنانة بكل معنى الكلمة.. صارت كتير مرحة بالبيت.. هون كان النا حرية كاملة.. محدا بيتدخل بحدا ابدا.. وهاد الشي ريحني وريح ولادي كتير..
انا أخدت عهد اني ما ألمس مصاري الورتة ورح كون عند وعدي.. طول فترة إقامتي بالامارات كنت اخد جزء من راتبي وخبيه على جنب… خلص ابني الباكلوريا وقرر ينزل يدرس جامعة بسوريا لأنها هون غالية..
ريهام: لا مارح ننزل الا لما تكون مهندس وترفع راسي
نذير: امي كيف بدنا ندفع كل هالمصاريف..
ريهام: لا تخاف انا حاسبة حساب هالشي
بدأت طالع المصاري يلي خبيتا وطلعت بتكفي كل سنوات الجامعة وبتزيد.. ما استغنيت عن فكرة اني خبي جزء من راتبي.. مشان وقت الحاجة.. أحوالنا تحسنت كتير.. ودائما كنا نخصص مبلغ بسيط للفقراء ونبعتهم لسوريا.. الصدقة ما بتنقص من المال.. بالعكس بتبارك فيه وبتزيده.. الصدقة بتنقي الروح.. مجرد تشوف ابتسامة على وجه محتاج انت يلي رسمتها.. هاد انجاز عظيم.. رح يغرز شعور حلو كتير بقلبك
_______________________
(( بعد نصف سنة ))