باوعلي ضحك
اندرت عليه : چا ناقصتك اني وتضحك عليّ ؟
– لا والعباس مو قصدي
دتعاي منا اغسلي رجليج بس غسلي
مشيت لمحل الانشائية
رفع الباب فتحه .. وكالي : هذا البوري غسلي رجليج بيه
– وشلون ارد حافية وهم اتطين !؟
– هسه دغسلي وخل اشوفلج بلكي عايفلي نعال تكرمين هنا تروحين بيه لهيلتج
فكيت البوري وذبيت جواريبي وكمت اغسل رجليه من الطين ..
طلع وهو يكلي : خوية بيتكم قريب لو بعيد ؟
– لا قريب بيت دكان الحجي ابو يوسف
-هاه انت من بيت حجي ابو يوسف ! شو ما شايفج !؟
-بت اخوه
-يا هلا ومرحبا خوية، ما طولج من بيت الحجي دخذي شحاطتي روحي بيها للبيت وعود وديلياها بيدي اي واحد
– وانت تضل حافي ؟
– اكعد بمحلي لبين ما توديلي الشحاطة شسوي ما لكيت النعال تكرمين خوما تروحين هيج ؟
-نعم الله عليك خوية الله ينطيك
بس العلاليك بلا امر عليك
– اي
اطاني علاليگي ونزع شحاطته من رجله
واني لبستها، شو رجلي فاتت كبل نص رجلي طلعت من الشحاطة لو باقية رجلي طامسة بالطين ولا طامسة بشحاطته
قياس رجلي ٣٨ والشحاطة قياس ٤٤ .. صرت فلم
هو باوع لرجلية شطحت ونزلن من الشحاطة جنهن مشط
شو هذا الله ذب عليه ضحك ، انداريت اباوع عليه حچه : علي العباس ما بقصدي اضحك عليج بس هي بعد
وضحك ..
– جا خوية هي ضلت عليك
كمت امشي واقبقب بالشحاطة
انداريتله : ادري شحاطة قبقاب رحمة لاهلك
– افا فوك ما عايفتني حافي تعيبين على شحاطتي ؟
ضحكت على ضحكته وهزيت ايدي ومشيت
واقبقب وبيدي العلاليك وامشي كوا جن بيه كساح حجيت ويا روحي : يا من دهيرة الطكتك كون على هالقبقاب
رد : هاه هاي عليّ ؟
-خوية مو عليك شني معلك اذنك يمي ..
هز ايده عفته ومشيت لحد ما وصلت بيت عمي يمكن نص الفرع كعد على صوت الشحاطة
حطيت علاكتي بغرفتي والمسواك بالمطبخ
ونظفت الشحاطة وحطيتها بعلاكة وصحت على هدى : هدى سويسو وين
ما جاوبتني
احاجيج
اندارت عليه باوعتي ودارت عني بمعنى ما تريد تحجي وياي
اني هم عفتها ومشيت لغرفتي اخذت الكلبيات الخيطتهن امس ومشيت صاح علي عمي : ها صبا رديتي؟
– اي عمي بس راح اطلع معتاز شي ؟
-وين رايحة
-شحاطتي انكطعت براس الشارع ورجال الله ينطي ابو انشائية اطاني شحاطة كالي ارجعي ودزيلياها بس سويسو ماهو وادزه، هل راح ارد بنفسي ارجعها
-ديلا لا تبطين
-ان شاءالله ، بس اكلك عمي صدك رسول وينه ؟
-طلع بشغله عليش ؟
-مو كال على السكيفة يحيطها بنايلون خوما تخر عليه اليوم مثل ليلة امس
-ما ادري عنه خابري وشوفي !
-زين عمي اودعناك
-الله وياچ
مشيت واني اطلع تليفوني خابرت على رسول
رد : ها صبا
-رسول وينك ؟
-طالع بفاتحة صارت عد واحد صاحبنا خطية امه ماتت
-يا خطية الله يرحمها جا اخذ راحتك خوية عسبالي اخابرك ع السكيفة
-بس اخلص الفاتحة ان شاءالله اسويلجياها
-يطيك العافية خوية
كاعد احجي انكطع الخط رصيدي خلص
تنهدت بحسرة
رسول طيب وخوش ولد وصاحب فزعة
بس مشكلته بين الحجي والفعل يحتاج فد سنة سنتين
ووذرة السان تروح من الملحة يلا يكوم للسالفة
عجوزي … يخلصها بهسه وفد شوية
مشيت على كيفي وعبرت ورحت للإنشائية
طبيت الزلمة كاعد يحجي بالتليفون .. اشرتله وحطيت العلاكة مال الشحاطة هز راسه ، هميت اريد اطلع شفت رولة مال نايلون ورولة مالت سيم حاطهن بالباب .. اندرتله : بيش مترة النايلون ؟
حجه : ان شاءالله خل اشوف الزبون بعدين اخابرك الله كريم عود نروحله ..
سده واندارلي : ياهو التريدينه
-نايلون مترة ابيش
-اكو نوعيات .. اكو بالف واكو بالف ونص المترة واكو بالفين
-وشنو الفرق بيناتهن ؟
-القوة المتانة مالتهن الزينة ما تنشگ بساع انت المن رايدتهن ؟
-اغطي بيها السكيفة مالتي حتى ما تخر بالمطر
– اذا سكيفة اخذي ام الالفين خاطر ما تنشك ولا تتأثر بالشمس تفيدج ، بس شكم مترة تريدين
-والله خوية ما ادري
-انت مو كاعدة ابيت الحجي ؟
-اي
-جا شتسوين بالسكيفة وانت خطار
-مو خطار كاعدة عد عمي وهم الله ينطي انطاني مساحة من بيته بس امس بالمطر السكيفة كامت تخرخر
– وعمچ مكعدج بسكيفة ما عده غرف ؟
تنهدت : هسه بيش تحسبلياهن خوية
– غير اعرف كم مترة محتاجة ؟
– ما ادري يمكن عشر مترات
– يعني ب٢٠ الف
– يا دهر ومنيلي الـ ٢٠ نزل بعد
– هي شكدها الغرفة ؟
– تطلع تلاثة بتلاثة
– واذا تلاثة بتلاثة شلون ١٠ مترات؟ لازم بفيتة تقيسين شكد تحتاجين ويحتاج زلمة خوية هاذ مو شغل نسوان ينراد واحد يقيسلج ويجي ياخذ ويصعد ع السكيفة يشدها خو ما انت شمعرفج بهالأمور
– والله يا خوية ما ادري .. الله كريم عود اشوف رسول مشكور
– تريدين اجيج من اسد المحل اقيسلج واسويلجياها ؟
– تگدر ؟
– ان شاءالله بس خبري الحجي وخلي يخابرني وبعيني
– الله ينطيك العافية ومشكور ع الشحاطة
– الله يستر عليج خوية
مشيت للفرع وكفت اباب الدكان مال عمي كتله : عمي هذا ابو الانشائية اللي براس الشارع تعرفه ؟
– حازم ابو علي شماله ؟
– حاجيته على مود النايلون للسكيفة كال خلي يخابرني الحجي واني اجي اسويها ، فدوة عمي خابرله فد شوية بلكت الله ويجي يسويها ، رسول صارت عده فاتحة بسنة ما يسويها والله وبلياها اضل بالضيم
– هسه خل اخلص صلاة واخابرله ، وين رايحة شو واكفة ما اتطبين
– اريد اروح لوفاء بس انطيها غراض موصيتني عليهم وارد
