شمس :ايمان انتى رحتى فين ياحبيبتى انا دورت عليكى ورحت التويلت اشوفك ملقتكيش
إيمان :كنت عند البشمهمدس يزيد ياشمس
شمس :ايمان مالك ياقلبي انا اول مرة اشوفك كده هى الجذمه دى ضايقتك اوى كده؟ يابنتى ملكيش دعوة بيها دى مش شبهنا
إيمان :مفيش حاجه ياشمس عادى كبري دماغك
شمس :اكبر دماغى عنك انتى ياايمان ده انتى اختى ياايمان
تحتضنها شمس بكل حب فتبكى ايمان فى حضنها وكانها ام لها تبكى بقهرة مما قاله لها عمر.
بينما فى الداخل كان يزيد يتحدث لعمر
عمر:يزيد انا لو وجودى فى الشركه مش مرغوب فيه انا ممكن امشي واشتغل فى اى مكان لكن مينفعش ان موظفه فى الشركه اكلمها ومتردش علية مينفعش ابقى قليل اوى كده ومليش وجود
يزيد:اقعد ياعمر بص ياعمر انا عاوز افهمك حاجه انت زيك زيي انا وعلى بالظبط لكن انت هنا لسه جديد ملحقتش تعرف مين الكويس ومين الوحش.
انا مش بدافع عن ايمان لكن انا بقول الحقيقه ايمان موجوده فى الشركه من سنين طويله يعنى بنت الشركه زى مابيقولو عمرها مااذت حد ولا زعلت حد منها بالعكس دى خدومه جدا ومتقدرش تشوف حد فيه حاجه او محتاج مساعده وتبخل عليه وياما اشتغلت حاجات مش من اختصاصها لمجرد انها بتحب الشغل وبتحب تقدم المساعده لكل اللى حواليها.
قلبها أبيض زى الحليب عمرها ماشالت من حد ولا كرهت حد عسل وسكر وخفة دمها مش على حد يمكن بس انت واخد منها موقف عشان دايما تغلس عليك لكن صدقنى لو قلتلك انها بتعمل كده من باب الدعابه مش اكتر مش حتصدقنى
اما بالنسبه لمياده فهى مش ملاك زى مانت فاكر بالعكس دى بتفكر فى كل خطوة بتخطوها كويس اوى وعارفه هى بتعمل ايه بالظبط ولو مكنتش هى اللى جرت شكلها ايمان عمرها ماكانت ابدا حتمد ايدها عليها
ولو فى حد المفروض انه يمشي من المكان ده تبقى مياده مش ايمان
انا بس صابر عليها لكن ودينى لو حطتها فى دماغى ماحخليها تفضل فيها يوم واحد.
عمر:يعنى انت عاوز تقول انى ظلمت ايمان
يزيد:ظلمتها وهينتها وجرحت كرامتها اوى
وايمان على الرغم من انها بتموت فى الضحك والهزار لكن بتصعب عليها نفسها اوى لو حد لمس كبرياءها او هان كرامتها وخصوصا لو كان ادام حد.
انت لسه ماعرفتش مين هى ايمان ياعمر وصدقنى يوم ماتعرف ايمان انت نفسك حتعزها زى انا مابعزها واكتر كمان
ايمان اللى زيها عمله نادرة مش موجوده فى زماننا ده
🌺فى داخل مكتب ايمان وشمس🌺
يدخل عليهم وهو حامل مج كابتشينو:ممكن العسل بتاعنا يتنازل ويتواضع ويقبل يشرب مج الكابتشينو ده من ايدي
كانت شمس وايمان غير مدركتين لما يحدث
إيمان :حضرتك بتكلمنى انا
عمر:وهو احنا عندنا عسل فى الشركه غيرك اكلمه
ايمان وهى مقموصه:لا شكرا مش عاوزة وبعدين حضرتك صاحب الشركه اللى من حقك تطردنى ميصحش تقدملى حاجه.
عمر:حقك علية متزعليش والله ماكنت فاهم اللى حصل خلاص بقى ميبقاش قلبك اسود انا لما شفت البنت متبهدله فى ايدك طبيعى جدا اقول انك انتى الظالمه.
انا اسف ياستى متزعليش بقى وبعدين هو احنا لينا بركه فى الشركه غيرك يامضحكانا ومشهيصانا
شمس:خلاص بقى ياايمان البشمهندس جايبلك الكابتشينو لحد عندك قلبك ابيض بقى
ولو انى بقى زعلانه منك يابشمهندس
عمر :ليه بس ياشمس
شمس:يعنى الكابتشينو لايمان بس طب وانا يعنى مليش نفس انا كمان
عمر:لا ياستى انا وانتى وسيف اللى حيدخل علينا حالا:القهوه بتاعتنا جايه دلوقتى
إيمان :امال اشمعنى انا اللى جبتلى كابتشينو
عمر:عشان انا سالت فى البوفيه وعرفت انك اكتر حاجه بتحبيها الكابتشينو
إيمان وهى تبتسم وكأن شيئا لم يحدث:ماشي مننحرمش شكرا ياباشا
عمر:يعنى صافى يالبن
إيمان :حليب ياقشطه بس عارف وربنا لو هزاتنى قدام حد تانى ماحيحصل كويس
عمر:خلاص خلاص ياربي عليكى بتقلبي فثانيه.
شمس:حبيبتى يامونى ياعسل انتى فتضحك الاثنتان فيتاكد عمر من كلام يزيد عن طبيعة إيمان التى لاتحمل ضغينه ولا يعرف الحقد طريقا لقلبها
💖💖💖💖💖💖💖💖💖💖💖💖
فى داخل الجامعه
عهد:بقولك إيه يانونتى ماتيجى نغير النادى اللى رحناه ده
حنين :تصدقى كنت حقولك كده بردو مش عارفه مش عاجبنى مش حسه انى لقية نفسي فيه
بس خفت اقولك تقولى انى بقول كده عشان عاوزة ارجع عند كمال تانى
عهد:والله العظيم انتى هبله
حنين :طب حنروح فين طيب ده احنا لفينا على معظم الجيمات وكابتن كمال هو الوحيد اللى ارتاحنا عنده.
عهد :مش عارفه حشوف بصي حدور كده واسأل ويمكن ربنا يسهل ونلاقى جيم كويس
حنين:طب قوليلي مفيش عندك اخبار جديدة
عهد :ولا قديمه ولا جديده عاليه مش مديانى فرصه اقرب من عمر نهائى ودايما معايا وبصراحه كده انا حسه ان عاليه معاها حق وانى مش فى دماغه خالص نادر لما بيفتح معايا كلام ولا مرة سالنى عامله ايه اخبار المذاكرة إيه
ده انا حتى مرة بقولله ماتيجى معايا الجيم قاللى انا عندى اجهزة رياضيه بلعب عليها وخلاص احرجنى اوى
حنين :طب وانتى ياعهد متضايقه
عهد :امال حفرح يعنى ياحنين ده انا كل مابشوفه قلبي بيرفرف كده ببقى عاوزة اجرى عليه واقولله بحبك وربنا بحبك بس حعمل ايه انا كان كل املى انه حتى ياخد باله منى ويبقى فيه بريق امل لكن ده مفيش نهائي وانا تعبت ومش عارفه اعمل ايه
ماتقوليلي اعمل ايه ياحنين؟
حنين :مش لما اعرف انا الاول اعمل ايه فى اللى انا فيه
عهد:انتى لسه بتفكرى في كمال ياحنين؟
حنين:ايوة ياعهد بفكر فيه ومش قادرة انساه غصب عنى مش بايدي كمال فيه كل المواصفات اللى بتمناها بجد بس للاسف هو مش بيحبنى ولا حتى شايفنى
عهد:معلش حبيبتى كلنا فى الهوا سوا
وياعالم بكرة ربنا كاتبلنا ايه؟
💖💖💖💖💖💖💖💖💖💖💖💖
بعد مرور عدة ايام تسير الأمور بشكل هادئ وتبدأ العلاقه فى التحسن بين عمر و شمس وإيمان وتبدأ بعض الامور تتضح أمامه
بدأ عمر يشعر بالالفه بينهم وفى وجودهم حتى انهم احيانا كانوا يتناولون الفطور سويا
فى داخل الشركه فى أحد الايام
تحديدا فى غرفة الاجتماعات يتواجد يزيد وعلى وعمر وسيف وشمس وعمار الكاشف
حيث يتم توقيع العقود بين الطرفين والاتفاق على ميعاد بدء تنفيذ المشروع الخاص بعمار الكاشف
يزيد :مبروك يابشمهندس عمار
عمار:مبروك لينا كلنا يابشمهندس يزيد وان شاء الله تكون فاتحة خير بيننا وميكونش اخر مرة
يزيد:ده أكيد طبعا
عمار:تمام يعنى ان شاء حنبدا الشغل بعد شهر بالظبط
يزيد :ان شاء الله يا بشمهندس نكون خلصنا التصميمات وبقى كل شئ جاهز ان شاء الله وفى الوقت المحدد حنبدا فى التنفيذ بأمر الله
عمار:تمام ومين من مهندسين الشركه اللى حيكون موجود اثناء العمل بالمشروع
يزيد:البشمهندس عمر والبشمهندسه شمس ان شاء الله.
يتفاجا عمر وشمس من هذا الأمر الذى لم يعلم عنه شئ احد من قبل
شمس :أيوة يابشمهندس بس مش حينفع
عمار:ليه يابشمهندسه ده شغل
شمس: اصل انا عمري ماخرجت برة اسكندريه وكل المواقع اللى كنت بشرف عليها كانت بتكون هنا فى اسكندريه.
يزيد :وجه الأوان انك تخرجى وتتعلمى ياشمس يبقى ايه المشكله
شمس:المشكله ان خالتو ممكن متوافقش
فيضحك عليها الجميع
على:ايه العسل والبراءة دى ياناس ثم يتحدث الى عمار بزمتك يابشمهندس عمرك شفت ادب وأخلاق بالشكل ده
عمار وهو ينظر لشمس باعجاب :بصراحه لاء
كاد عمر ان ينفجر من الغيظ ومن نظرة عمار واعجابه الواضح على معالم وجهه بها
شمس :بشمهندس حضرتك عارف انى مقدرش اخطو اى خطوه من غير موافقة خالتو ولو هى قالت لاء، يبقى اسفه لحضرتك مش حينفع وبعدين ممكن اوى البشمهندس سيف يسافر مع البشمهندس عمر وانا افضل هنا
عمار وقد شعر بانفعال شمس فى الحوار:بشمهندسه شمس معقوله تبقى مهندسه وناجحه ومجتهده كده وعمرك مااتحركتى غير باذن خالتك يعنى مكنتيش بتسافري فى رحلات مع اصحابك فى الجامعه مثلا
شمس :انا لا وربنا عمر ده ماحصل انا عمرى مااتحركت خطوة من غير اذنها وهى طول عمرها بتخاف علية اوى ولما كنت ببقى عاوزه اتفسح كانت دايما تاخدنى انا وايمان وتفسحنا المهم تكون معانا وانا كبرت على كده وعمرى مابيت برة البيت ومش عارفه بس اكيد هى مش حتوافق
عمار:تسلم خالتك وتسلم تربيتها ليكى وربنا يحميكى من كل شر
يزيد :ايوة بس احنا لسه بردو موصلناش لحل
شمس :مانا قلت لحضرتك سيف يروح مع البشمهمدس عمر
يزيد:سيف مينفعش ياشمس سيف ملوش علاقه بالتنفيذ وبعدين انا بحتاجه معايا هنا فى الشركه
على:طب ممكن نأجل الكلام فى الموضوع ده بعدين المهم بقى نحتفل بتوقيع العقود واللا ايه
عمار:ان شاء الله ححتفل بيكم لما تشرفونا فى شرم
على:لا ده احنا حنقوم كلنا عشان انا حاجز الغدا فى اوتيل
عمار:مفيش داعى لده كله انا لازم ارجع شرم انا بقالي فترة هنا فى اسكندريه والأمور هناك محتاجه وجودى
يزيد:تأخير ساعتين مش حيضر يابشمهندس
عمار:والله مش حينفع يابشمهمدس وبعدين خيرك سابق
انا حستئذنكم وعلى اتصال ان شاء الله
واتمنى يابشمهندسه انك تغيري رايك وتشرفينا مع البشمهندس عمر
يسلم على الجميع ويقوم على ويزيد بتوصيله الى باب سيارته الخاصه
ثم يعودان الى داخل الشركه
على:شكل فكرتك مش نافعه
يزيد:متبقاش متشائم اصبر بس
على :يابنى انت مشوفتش اصرارها ازاى انها مش حينفع تسافر
يزيد :انا عارفك لما بتنوء فى حاجه اهدى كده وان شاء الله مش حيحصل غير اللى فى دماغى
بس بقولك ايه تعالى نقعد فى مكتبك وناديلي إيمان
على:ماشي يامعلم
بينما داخل غرفة الاجتماعات
شمس:مالك يابشمهندس شايفاك ساكت من وقت الاجتماع ومتكلمتش ولا كلمه
عمر:ايه لا والله بس لقيت مفيش داعى للكلام
يعنى انتى ياشمس كل مشكلتك ان خالتك متوافقش بس
شمس:بص يابشمهندس انا والدتى اتوفت وانا صغيرة وربنا عوضنى عنها بخالتو
عمر:واضح انك بتحبيها أوى
شمس :لولا وجودها فى حياتى الله أعلم كان حصللى إيه
المهم دلوقتي انا مش عاوزة البشمهندس يزيد يزعل منى ومش عارفه اعمل إيه
عمر:سيبيها على ربنا انا متاكد انه حيلاقيلها حل
شمس :طب تمام وانا حقوم ابدا فى التصميمات
عمر:ماشي ياشمس وانا حعمل تليفون واحصلك
تخرج شمس بينما يسرح عمر فى التفكير فيها:ياااه معقوله لسه فى حد بيعمل حساب اهله بالشكل ده
انتى ليه مصرة تخلينى كل يوم اتعلق بيكى اكتر من اليوم اللى قبله لا لا اتعلق بيها ده ايه من امتى عمر المهدى فى واحده قدرت تعلقه بيها
بينما فى مكتب على
تجلس ايمان امامهم وهم منتظرون ردها
يزيد:مالك ساكته ليه ماتردى
إيمان :وانا اعملكم ايه خالتها استحاله توافق انا عارفاها كويس استحاله حترضى ان شمس تسافر وتقعد كذا يوم لوحدها دى ممكن يحصللها حاجه
على:يادى النيله يعنى الترتيبات باظت بقى كده واحنا اللى بنقول عليكى حلالة العقد
إيمان :طب انا اعملكم ايه هو انا كنت شارلك هولمز واللا المفتش كرومبو انتوا فاكرنى ايه
مانا عماله اهوه اشتغل على اخرى واسيبلهم المكتب واطلع برة واشوف وش اللى متتسمى قدامى كل شويه واقول ماشى معلش عشان خاطر عيونهم واروح اجيب فى قهوة ونسكافيه لما قربت اشتغل فى البوفيه مع العمال اعملكم ايه اكتر من كده
قربى بينهم ياايمان حاضر
سيبيهم يقعدوا مع بعض شويه ياايمان حاضر
اعملكم ايه تانى
كان يزيد ينظر اليها وهو منتظرها تنهى حديثها
يزيد:هاه خلصتى الشويتين بتوعك
إيمان :اه
يزيد :قولى اللى عندك ياايمان
ايمان :لا حول ولا قوة الا بالله والله خااتها ماحتوافق سناء، دى انا حفظاها
يزيد:ايمان اخلصى واتكلمى حتشلينى
ايمان:يالهوي الف بعد الشر عنك ان شاالله مياده
على :ههههههههههه
يزيد:قومى ياايمان من وشي مش عاوز اشوفك
ايمان:فى حل واحد مفيش غيره هو اللى حيخللى سناء توافق على سفر شمس
على:ولما هو كده ساكته ليه من الصبح
يزيد:مكنتش جبتك وقعدتك قدامى لو مش متأكد انك حتحليها
ايمان :انى اسافر معاها
