رواية كبرياء ابنة الخادمه الحلقه الحاديه عشر والثانية عشرة بقلم سحر السحرتي حصريه وجديده
الحلقه 11
: قتلتها بجبني ….. قتلتها باني عمري ما كنت راجل او زوج لها ولبنتها …. كل ده عشان كنت خايف منك لكن دلوقتي لا ….. هقولها لكل الناس وفي وشك حلا بنتي من فاديه … اللي كانت بتخدم جوزها بكل حب واخلاص وانا عملت لها ايه …. شفتها بتضرب وتتهان هي وبنتها و اتشليت ما عملتش حاجه ماتت بقهرتها مني
*شاهنده مسكت في هدومه
:انت بتتجوز عليا انا …. وكمان من شغاله و بتخلف منها
*الراجل يا عيني ما قدرش بقى له 25 سنه مطاطي مصدق خرج من القمقم اللي كان عايش فيه …. نزل ايديها وضربها يمين شمال كام قلم على ما استوعب سامح ومسك ابوه يبعدوا عن امه …. وهنا عيطت وجابت منديل مسحت لامها الدم اللي نزل من شفايفها
*انا طبعا حالتي اعجز عن وصفها بحاول استوعب ابويا رجع من الموت امتى واربط الاحداث ببعض من اول ما كنت طفله
بقلمي سحر السحرتي
*شوشو بتزعق : انت بتضربني يا
*كانت لسه هتكمل صرخت صرخه هزت ارجاء الفيلا واتكلمت باعلى صوت
:باااااس انت كل همك انه اتجوز عليك مش شايفه حجم الكارثه اللي عملها ….. بسبب سوء معاملتك له و تكبرك وغرورك راح ضحيتها امي وانا …. ده جاب مراته تشتغل عندك خدامه وكان بيشوف اهانه بنته منك وساكت …. كان بيعطف عليا وكأني شحاته مش ده دورك كاب يا ليل اسود انا كنت يتيمه وابويا عايش
: يا بنتي اسمعي القصه مش زي ما فهمتي كده
*اتكلمت بغضب رهيب وعيني بتبرق بطريقه مرعبة
: بنتك ما تقولش الكلمه دي بقى لي 19 سنه يتيمه وانت ميت بالنسبه لي و هتفضل كده …. مش عايزه اعرف حكايات ولو كانت امي لسه عايشه كنت هحاسبها ازاي تقبل بوضع زي ده و ازاي تتنازل عن حقي …. لكن انا مش هتنازل عن حقي بعد كده …. هتعترف بيا قدام الناس كلها
شاهنده بغضب عارم : ده بعدك انا اقتله لو فكر يعمل كده
*شافت واحده من الغضب وشها احمر لدرجه انها بقت شبه القنبله اللي على وشك تنفجر في وشها بلعت لسانها
:انت تسكتي خالص لو سمعت صوتك هخليك دراسه لدكاتره التجميل بيحاولوا يفهموا لسانك ازاي لف حوالين رقبتك وفردة عين من عينك الاثنين طلعت بقت في وسط راسك اخرسي
سامح :حلا اهدي يا حبيبتي كل اللي انت عايزاه هيعملوه وانا معاكي وفي ظهرك عمري ما هقبل تتظلمي تاني
*ما حسيتش غير وانا راميه نفسي في حضنه و بعيط بشده يمكن قلبهم اتقطع من طريقتي
:انا كنت حاسه انك الوحيد اللي ليا في الدنيا … فهمت دلوقتي وانت بتقول لي انا اخوك مهما حصل … بس ليه ما قلتش
:كنت عايزك تستردي صحتك النفسيه اللي دمروها عشان تقدري تستحملي اللي انت هتعرفيه وبعدين داداه فاديه اتوفت فكنت مستني ياخد اي خطوه … بس للاسف ما كانش قدامنا غير الطريقه دي
شاهنده : انت معايا ولا مع بنت الخدامه
:لو سمحت يا امي حلا اختي وواضح ان طنط فاديه كانت بتخدم في بيتها فما تقوليش ثاني انها خدامه
: بيت مين ده بيتي انا
:بيت بابا يبقى بيت مراته وبنته دي حقيقه بلاش تنكريها …. زي ما كنت بتنكري ان حلا اختي في الرضاعه واهي طلعت اكثر من كده بكثير و استوعبي الصدمه لان حلا هتقعد هنا معانا
: تقعد فين
: استنى يا سامح سيب الطلعه دي ليا انا ….. انا مستنياها من زمان قوي …. شوفي يا مرات ابويا انا كان ممكن اقع وافقد الوعي واتنح زي المره اللي فاتت من الصدمه ….. بس سامح اخويا حبيبي …. سامعه اخويا … وداني عند دكتور شاطر علمني ان اي صدمه بدل ما اسيبها تكسرني اخليها تقويني …. وكنت فعلا همشي حالا …. بس ده حقي ومتمسكه بيه …فهقعد على قبلك .. وهتشوفيني … يوميا على السفره وفي كل ارجاء الفيلا هتشوفيني ..داخله ..خارجه… بنجح … وبتفوق
:مش ممكن هتقعدي هنا يا انا يا انت
بقلمي سحر السحرتي
*المره دي بابا رد :اللي تشوفيه
*اتصدمت من استسلامه المستمر بس كمل وعيونه مليانه غضب لشاهي
:هي اللي هتقعد حابه تمشي مع السلامه عايزه تقعدي في الملحق بتاع فاديه اكيد حلا مش هتمانع هي طول عمرها طيبه زي امها انت
*شاهي بتحاول تستوعب الصدمات اللي ورا بعض أولهم جواز بابا وأنه هيعترف بيا وضربه لها واخيرا طرده ليها من غير عينه ما تطرف
