الفصل السابع من رواية شمس تتحدى الغيوم
بقلمي :عبير سليم حصريه وجديده
لما يحدث لنا كل هذا كانت الأمور تجرى ونحن نسير وراءها لم نكن نسعى لأى شئ حدث ولم نسعى لتغيير القدر بل كنا مطمئنين القلب آمنين لتلك الحياة ولا ندرى أننا فى غضون ثوانى قدينتهى كل شئ تتهدم الآمال وتتحول الامانى والأحلام الجميله التى طالما سعينا إليها وتمنتها قلوبناإلى واقع اليم ليس به سوى الآلام والأحزان وأسوأ الذكريات التى نتمنى ان نزيلها من الذاكرة.ولكن ليس لنا من الأمر شئ سوى ان نتمنى من القدر ان يكون رحيما بنا ويعدل حكمه علينا
ونقول كما علمنا نبيينا الكريم عند المصائب
(اللهم اجرنى فى مصيبتى واخلفنى خيرا منها)
ياتى لوالد شمس تليفون من زوجته فيستئذن منهم بالذهاب
على وعد منه بالا يتخللى عنها مرة ثانيه
إيمان :ايه اللى انتى بتقوليه ده ياشمس تسيبي الشغل ليه وعشان مين عشان واحد مايستاهلش خايفه تشوفيه فى الشغل واللا خايفه من ايه بالظبط لا ياشمس انا مش معاكى فى القرار ده
وبعدين قرار زى ده ميتاخدش بسرعه كده ولا ينفع يتاخد فى لحظة غضب لازم تفكرى كويس ياحبيبتى ده مستقبلك
عشان مترجعيش تندمى بعد كده
شمس:هههههه هههههه اندم حندم على إيه واللا إيه انا لو فتحت باب الندم مش حخلص ياايمان
انا ندمانه على حاجات كتييير اوى عملتها لناس طلعت متستاهلش
سناء:تقومى بقى تسيبيله الجمل بما حمل مش كده وتفرحيه فيكى عاوزة تسيبي شغلك ياشمس ده اسمه كلام بردو
ده مفيش حاجه حتسليكى وتهون عليكى اللى انتى فيه لحد ماربنا يعوضك خير غيرشغلك ياحبيبتى
شمس:خلاص ياخالتو انا مفيش حاجه فى الدنيا كلها ممكن تعوضنى عن اللى حصل ولا تمحى الحزن اللى جوايا
انا فى نار جوايا نار عمرها ماحتنطفى حتفضل قايده العمر كله.
إيمان :شمس اللى انتى بتقوليه ده حرام وياس من رحمة ربنا
وانتى مؤمنه ياحبيبتى كل ده قدر من عند ربنا بيحطنا فى ابتلاءات و اختبارات عشان يشوفنا حنصبر واللا لاء.
شمس الحزن هو الحاجه الوحيده اللى بتبدأ كبيرة ومع الوقت بتصغر وتتنسى ووقتها حتندمى على اى قرار اخدتيه واتسرعتى فيه لازم تهدى وتفكرى كويس ياحبيبتى قبل ماتاخدى قرار زى ده
شمس:أنا عمرى ماياست من رحمة ربنا ياايمان بالعكس ياايمان انا مؤمنه جدا بربناوواثقه و متأكده ان ربنا حيجيبلى حقى وحينصرنى وحينتقملى من اى حد ظلمنى
بس الإختبار صعب جدا علية االضربه جامده اوى ولازم أقوم واقدر اقف تانى بس بعيد بعيد على اد مااقدر
وانا اخدت قرارى خلاص ومش حرجع فيه تانى انا كل اللى عاوزاه منك تقدميىلى استقالتى وتجيبيلى ملفى من الشركه مش عاوزة منك اكتر من كده وانا حقدم فى اى شركه تانيه.
سناء:ايوة ياشمس بس اى شركه تانيه حيعاملوكى على انك جديده معاهم لكن انتى بتتعاملى أحسن معامله وواخده وضعك فى الشركه كويس ده انتى فيها من وانتى فى الكلية ياحبيبتى يعنى انتى كده حتضيعى كل السنين دى عالفاضي.
شمس:مش مهم ياخالتو حبدا من اول وجديد فى اى مكان تانى لكن رجوع للشركه تانى مش راجعه ومش حدخلها برجلى تاني وده اخر كلام عندى.
إيمان :طب ممكن نأجل كلام فى الموضوع ده دلوقتى
انتى تعبانه ياحبيبتى استريحى وبعد كده نتكلم براحتنا
شمس:لاء ياايمان انا قلت اللى حيتنفذ
سناء:حرام عليكى ياشمس ليه يابنتى ليه بتعملى فنفسك كده
شمس وهى منهارة من البكاء:عشان مش عاوزة اشوف نظرة شماته فى عين حد ولا عاوزة ألمح نظرة شفقه فى عين حد ولا حطيق حد يتغمز علية بكلمه ويقول اللى سابها خطيبها قبل الفرح باسبوعين اهيه ولا حقدر اشوفه هو شخصيا مش حقدر مش حقدر ياناس حسوا بية بقى انا انكسرت انكسرت اوى حسه انى بقيت مية حته وعاوزة الملم اللى فاضل منى
انا عاوزة ابقى كويسه عاوزة اقدر اقف على رجلى تانى عاوزة انسى انسى لكن طول ماهو ادامى حنسى ازاى حعمل ايه حشتغل معاه فى نفس القسم زى الاول ازاى حاخد منه الشغل وادخله للمدير ازاى ححط عينى فى عينه ازاى ازاى انا مش حقدر استحمل قلبي مش حيستحمل انتوا ليه مش مقدرين اللى انا فيه ليه
ليه مش حاسين بية حرام عليكم حرام والله حرام
إيمان :خلاص ياحبيبتى خلاص ياشمس اهدى حبيبتى اهدى واعملى اللى يريحك اهم حاجه عندنا راحتك انتى بس المهم تبقى كويسه وترجعيلنا تانى
شمس :ان شاء الله حفوق وحبقى كويسه بس وانا بعيده عنه
