كان قاسم يجلس مع صديقه كريم و كان صديقه يحاول ان يعالج جرح قاسم الذي احدثه الفتي في كتفه و كان يجلسوا في الصيدليه بعد ان اغلق كريم الباب حتي ياخذوا راحتهم فكان قاسم غاضب جدا
كريم بعتاب : يعني يوم ما تتخانق تتخانق مع بلطجي الشارع يا قاسم عايز تودي نفسك في داهيه و تدخل الأقسام
قاسم بغضب شديد : متستفزنيش يا كريم انا عفاريت الدنيا بتطنط في وشي كان لازم نروح القسم و احبسه
و تولع الناس كلها و مش مهم كلام الناس و انهم حاولوا يهدوا الموضوع و خلاص ….
كريم بسخريه : ما تحبسه يا حبيبي هو كده عقاب ده بيروح يحشش هناك ده هو لو بات في بيته يوم بيحس انه غريب و بعدين ما انتَ يعتبر كنت هتفتح دماغه و خرشمت وشه لو رحت هتتحبسوا انتم الاتنين و انتَ مش وش كده هو بالنسباله مش هتفرق …
بجد يعني انا عايزه افهم ام محمد دي ازاي كانت جايبه ده عريس لهدير
قاسم بغضب شديد : متفكرنيش انا الدم غلي في عروقي ملقتش نفسي غير و احنا بنتخانق و ماسكين في بعض … لما قال انها صايعه معايا في الرايحه و الجايه و قال كلام كتير مش عايز افتكره ابن الكلب ده ….
كريم بمرح حتي يخفف من حده الجو : علي فكره ابويا هيخصم القطن و الحاجات دي من مرتبك ده انا لو خت فلوموكس بيحاسبني عليه
قاسم بانزعاج و نبره هادئه لا تقارن مع الثوره التي تقام بداخله : احنا في ايه وله في ايه تفتكر عمها عمل ايه معاها …. انا عرفت من ساره انها رجعت و قولتلها حاولي انك تروحلها انا مش هينفع اطلع هناك دلوقتي خالص
كريم بصراحه مطلقه : والله يا قاسم الواحد يتوقع انه يعمل اي حاجه فيها الوضع كان صعب جدا ده اتحرجوا اوي و مكنوش عارفين يقولوا ايه هو و ابنه حتي ابوك مكنش عارف يقوله ايه انا بصراحه متوقعش يعمل معاها ايه
قاسم بانزعاج من تفكيره اذا احد ضرها : ازاي يعني محدش يلومه مهما عمل ؟؟؟ و بعدين لو حد غلطان ممكن يكون انا او عمتها لكن هي ساذجه جدا انها تتعاقب هدير لسه صغيره و هي في ظروف نفسيه او حتي عائليه متسمحش لحد انه يفكر ياسي عليها
كريم بجديه : هو عمها يا قاسم و اكيد مش هيكون اسي عليها حتي لو اضايق هي بنت اخوه و عيله في بعض في الاخر …. احنا صحاب صح يا قاسم و اخوات كمان و من و احنا في الابتدائي سوا و انتَ اخويا فعلا
قاسم بتاكيد : اكيد يعني يا كريم
كريم بتفسير : انا اخ وحيد علي تلت بنات و لو واحده عملت كدا منهم والله العظيم لاقتلها قبل ما ابويا يعملها ….
قاسم بانزعاج من هذه السيره : عارف يا كريم متنرفزنيش دلوقتي علشان انا علي اخري وربنا انتَ و اخواتك شي و ظروف هدير شي تاني مينفعش انها تتقارن بحد انتَ جنب اخواتك
و ابوك معاهم اخواتك معندهمش نقص اسمه وجود راجل في حياتهم مش بمعني حب او كده بس عندهم حد واقف في ضهرهم … حاسيين يعني ايه اب و اخ و عيله كامله و اخوات و ام … هدير كل ده مش موجود عندها
كريم بهدوء : خلينا نتكلم بالعقل انا صاحبك و اخوك و برضو هدير اختي و لو احتاجت حاجه مش هتاخر عليها ابدا و اي خدمه هعملها ليها علشان احنا جيران و زي اختي ..
بس مينفعش اني افضل ملازمها اربعه و عشرين ساعه اسلم عليها لو لقتها في الشارع …. و لو جت هنا تشتري علاج لعمتها تجيب اي حاجه اوجب معاها او مع اي واحده بس الموضوع زاد بالنسبالك يا صاحبي ..
قاسم بانزعاج : انا معملتش حاجه غلط يا كريم متكلمنيش زيهم علشان هقفل منك بجد و هقوم امشي اغور في اي حته …
كريم مازال مستمرا في الحديث : احنا شباب زي بعض يمكن انتَ معندكش اخوات بنات و لو اختك عايشه مكنتش هتوافق بكده اكيدد و متحاولش تبرر الموضوع كان غلط
انا مقدر كويس ان نيتك ناحيه هدير و انها انسانيه بس انا اللي فاهم كده امك ممكن افهم كده و عمتها ممكن تقدر ده .. بس مش كل الناس هتفهم ده .. يا شيخ ده اللي بيعمل حاجه غلط بيداري و يخبي مش بيوصلها و ياخدها لغايت بيتها و كلام في البلكونات قدام الناس ده اللي بيعمل حاجه غلط مبيعملش كده يا جدع
لكن انتَ المفروض بتعمل خير من وجهه نظرك و بتقف جنبها لانها وحيده بس انتَ قدام الناس عملت الاسوء من الغلط انتَ عملت صح من وجه نظرك انتَ و هما حسبوه غلط و لما الصح في وجهه نظرك انتَ يتقارن بالغلط يبقي عمره ما كان صح …
قاسم بتفسير : عارف ان كل ده كان غلط و انا حاولت اقلل كل الحاجات دي بقالي فتره بس هدير بتمر بحاله نفسيه صعبه و مينفعش اختفي و امنع عنها كل حاجه مره واحده ..
محدش يعرف من اهل هدير ان هدير عندها فوبيا من الاماكن العامه او الزحمه و الاماكن الجديده … محدش يعرف ان هدير شايله في قلبها ايه غيري انا اعرف هدير بتفضل ايه في لبسها في اكلها في طريقه حياتها كلها
و اكتر واحد عارف مين الناس اللي هما في حياه هدير و اكتر حد عارف ان هدير لو بعدت عنها هضيع حرفيا لازم هدير تتاقلم علي حياتها الجديده و يكون ليها اصحاب و مجتمع جديد قبل ما انا اختفي من حياتها لازم تروح لدكتور نفساني هدير مليانه بالعُقد اللي تخليها تعمل اي حاجه تهرب من واقعها ..
انا معملتش بطوله بس معملتش ذنب يا كريم انا عملت اللي ضميري خلاني اعمله لبنت عندها عشر سنين كانت ماشيه بتعيط يوميا و هي رايحه المدرسه حتي و هي رايحه مع عمتها …. انا اكتر واحد عارف هدير شايله في قلبها قد ايه من ابوها و عارف مين الناس اللي بتحبهم و اللي بتكرهم
انا حياه هدير صحيح اني ساعدتها تقفل علي نفسها بشكل بشع بس للاسف انا مقدرتش ابعد مره واحده هدير الناس اللي بتثق فيهم يتعدوا علي الصوابع لو انا بعدت مش هيكون كويس عليها ابدا و فعلا انا قللت اختلاطي بيها عن الأول
كريم بهدوء : ممكن هدير متقدرش تبعد عنك للظروف دي كلها او انك تخرج من حياتها …. بس هل ياتري انتَ هتقدر تبعد عنها لو بقت كويسه و انسانه طبيعيه ؟؟؟
اكمل كريم حديثه فهو لا يريد ان يسمع اجابه لهذا السؤال فيكفي ان يجيب قاسم في كراره نفسه علي هذا
– انا مش شيخ جامع و لا بعرف اذوق في الكلام يا قاسم زيك و يمكن لساني مش حلو زيك في المواضيع دي يعني انا و لا عندي خبره في الحياه لاني زيي زيك و نفس سنك و لا عندي حصيله اجاوبك عليها في الدين و الموضوع انسانيه و كل حاجه بس انتَ
بدمرها و دمرت نفسك ده امك كانت هتموت و هي بتصوت بسببك لو الانسانيه هضرك و تضرها بلاش منها و بعدين في حالات اسوء من هدير بمراحل محتاجين ان حد يعاملهم بانسانيه و مش هنروح بعيد كام واحده
في الشارع ارمله و عايشه لوحدها وله كام واحده في المنطقه مطلقه و رايحه يوميا بعيالها المدرسه و مفيش حد واقف جنبها اخري لو شفتها اسلم عليها و ابن عمي اللي لسه في اعداديه يشيلها الحاجات لغايت فوق …
في كام ام في الشارع عايشه هي و بناتها لوحدهم في كام ست معديه الستين و عايشه لوحدها و بتقوم تروح مشاوريها بالعافيه محتاجه اللي يونسها
شوف كام واحده تقابلها في الشارع ملهاش بيت و لا ماؤي هدير لاقيه البيت اللي يحتويها و قاعده بين اربع حيطان هدير ليها اب هدير ليها عمه بتهتم بيها و في كليه
و لاقيه انها تاكل لو الموضوع انسانيه يبقي كل واحد هيمشي مع عشر بنات بحجه انهم اخوات و خلاص بقا تبقي سلطه و الاحسن بقا لو عايزين نعمل انسانيه في ناس محتاجه المساعده اكتر من هدير و مشفتكش اهتميت كده و بعدين لو هدير صاحبت ولد و راحت و جت قدامك و هتقولك اصله اخويا هيبقي الشي ده عادي بالنسبالك
قاسم بانزعاج و لكن بنبره منخفضه فلم فقط قوته : في ايه يا كريم متعصبنيش انتَ كمان انا مفيش حد احتاجني و سبته او اني اتخليت عنه سواء هدير او اي حد غيرها و بعدين انا عارف بعمل ايه لكن مش عارف اي واحد غيري يستغل ظروفها ازاي الناس نيتهم وحشه و واحده بتفكير هدير ممكن يضحك عليها في اي لحظه …
كريم بهدوء : فعلا اديك بتقولهاا بنفسك الناس نيتها وحشه…. و انا اشهد بده طول عمري انك مسبتش حد بس اشهد برضو … ان مفيش حد اتعمقت بتفاصيله حتي لو طلب منك المساعده زي هدير … انا مش عايز اضايقك بس اللي حصل النهارده ده كان متوقع من بدري و متلومش … علي الناس مش عيب انك تعترف انك غلطت لما حاولت تساعد بس للاسف انتَ ضريتها و ضريت نفسك كلها كام يوم و الناس هتنسي
و لا كان حصل حاجه المهم اللي جاي انتَ لازم تعرف ان هدير زيها زي اي شخص تاني و لو انتَ شايف انك حمتها و حبتها كاختك فانتَ قضيت واجبك و زياده معاها
و لو حكايه الفوبيا و العقد النفسيه دي و الكلام ده اعتقد مفيش اطيب من مدام هاجر انك تتكلم معاها لما الامور تهدي و تصارحها لو ده الموضوع اللي مضايقك اعتقد طنط هاجر مش هتسكت و هتوديها لحد متخصص في حالتها
