رجع رن رقمو ليرجعني للواقع , واقع فقدو , رديت بعصبية
– شو بعد بدك مني , خلص حل عنيييي…
– ليان أنا مشتاقلك كتير خليني شوفك ونحكي شوي وحياة أغلى شي عندك ليان ·
سكتت شوي وبعدا تنهدت بتعب , كنت غرقانة فيه لآخري بس بنفس الوقت موجوعة منو كتير
– كرمالي ليان
= طيب
اتفقنا نتقابل بالكافيه يلي تقابلنا فيه آخر مرة من خمس سنين !!
رحت ولقيتو قاعد بنفس المطرح , رحت لعندو تماما متل السيناريو يلي صار قبل خمس سنين بس طبعا بفرق كتير كبير ووجع أكتر
– مرحبا
= كيفك
– منيحة طول ما انت بعيد
= بس انا ماني منيح بغيابك وعيونك بيحكو انك مانك منيحة عيونك يلي ختفت منهم ابتسامة الفرح وكل هاد بسببي أنا بعرف , بس أنا ولا بعمري دايقتك لا بقصد ولا بدون قصد بس هالشي كان اجباري وكنت بتمنى تتفهميني وضلي مـ,ـعي ليخلص ..
– المطلوب ?!
= إيمتى تعلمتي تصيري بلا قلب
– من وقت تركتني وحلو إنك لاحظت لإن مني شايفة سبب لوجودك
= تحررت يا ليان
– ليش كنت مسـ,ـجون هههههههههه
= يلي كان رابطني بديما أمي , وإمي
سكت شوي ليمنع دمعة كانت ع وشك تطلع من قفصها , ما بعرف ليش مانع حالو من إنو يبكي ويطلع يلي بقلبو
= إمي ماتت ليان من كم شهر , وأنا طلقتا لديما ورجعتلك
– يعني انت حتى ما حاربت كرمالي لقول عمل شي لحتى سامحو , لك انت عاساس فترة قصيرة تتجوزها مش تنطر لتموت امك , يعني لو ما ماتت هلأ ما كنت جيت , وبدك تفهمني إنك ما قربت عليها كل هالفترة ??
= ليان البنت معها سرطان وشفقت عليها
– خليك معها وتركني بحالي خلصنا بقى
وتركتو ورحت لبرا , ركبت سيارتي ورجعت عالبيت , عتزلت غرفتي ما بقى بدي اي شي من هالدني , بس عم أبكي وأشتاق واتوجع هي حياتي من بعدو , خمس سنين ما قدرو ينسوني ياه , كنت معتزلة كل شي وعم أبكي ,, الشي يلي ما عملت غيرو لمدة تلات ايام , كانت سارة كل يوم تجبلي صنية الاكل , وتطلع الصنية متل ما جابتها ما مأكول منها شي , كنت اشرب المي بالعافية , كإنو كنت عم عاقب حالي ع كل شي ما عملتو , باليوم التالت من رجوعه أو من بعده ما عاد في فرق , قمت غيرت تيابي وقررت روح لعندو , عاتبو بهدلو قلو اديش مشتاقتلو اي شي لمهم شوفو , ركبت سيارتي ورحت ع بيتو دقيت الباب ونطرت شوي ما نفتح رجعت دقيت و ذات الشي , لفيت ضهري وكلي خيبة لإن الشي يلي جيت كرمالو ما رح اقدر اعملو وما بعرف اذا رح اقدر ارجع اعمل هالشي ولا لا , وفجاة نفتح الباب , بس شافني تلبك كتير , متل الطفل الصغير وقت يغلط ويخاف من امو
– ليان !!
-كنت جاية لنحكي شوي
” حبيبي مين عالباب ? ” هالصوت الأنثوي كان جاي من جوا , دفشتو بكل القوة المتبقية جواتي وفتت لشوف مصدر الصوت , كان في وحدة بغرفتو ومنا مرتو لان مرتو شفتا عالصور , كان في كاسات خمر بالغرفة , كان بعدو واقف مصدوم مكانو , تطلعت فيه بقرف وركضت لبرا ,, ركبت سيارتي ومشيت باقصى سرعة كنت بدي اهرب بدي روح لمطرح بعيد , مطرح كون فيه بس لحالي , ليش رجع ليش ?? , رجع ليشوه صورتو اكتر قدامي رجع ليزيد صفحتو سواد رجع ليزيد لجروح يلي بقلبي , كنت عم ابكي والرؤية عندي منا واضحة أبدا , وفجأة حسيت سيارتي خبطت بشي قوي , وسمعت صراخ وأصوات كتير منا واضحة صوت طفل صغير عم بنادي امو , وبعدا صوت ناس عم يحاولو يطلعوني من السيارة و بعدا ما عاد حسيت بشي..
