لزمت الالبوم تباوع وبتها نزلت كامت تلعب بغراض الخياطة
صاحت بيها : هش تعاي ولج من غضب الله كون على راسج
-عوفيها يمعودة صدك جذب لا ادعين
بقت مستمرة تجر بيها والطفلة تريد تلعب جذبها شكل البلك والنمنم … كتلها : عليج العباس عرفيها خية جاهلة وتريد تلعب ، دكومي خل اخذ قياسج
جريت الشريط واخذت قياسها والجاهلة تلعب
وهي اختارت فصال كتلها ب٧ كالت : لا هواي ب٥
-يحتاجله الفصال هاذ هواي شغل والله مو مال خسمة
-خمسة ومشيها عليج الله ما عدي غيرها علي الحسين جيوبي يغني بيهن داخل حسن
-هههههه هاهية بعيني
شالت الخمسة انطتنياها
دخلت علي هدى مرت رسول ابن عمي : صبا ما تجين تعاونيني بالمطبخ شوية شني ما خلصتي
– هسه بس اكمل المرة وبعيني
كاعد نحجي غصت الجاهلة وهي تبلع من البلك
تراكضنا الها وامها تشيل بيها وتمد ايدها بحلكها تريد اتطلعها والطفلة نطت من البجي
جريتها من عدها وكمت اضرب على ظهرها طلعت الخرزة من بلعومها وشهكت البنية وشالتها امها كتلتها
؛ دعوفيها عليج العباس خطية ما عليها شي جهال خواتي دومهم من يجون هنا هم يبلعون بهالخرز ونكلبهم ونطلعهن متعودين
-مو جاهلة تكول ملچ الكاع ما تشيلها كتلتني بوكاحتها خية خل اروحن بعد، عود اشوفلج خبر من ام وسام .. وانت هم خابريني ع الخياط لو كملتي اريدنها للجمعة كون مخلصة خاف اروحن لعيالي دشاديشي ذني عتكن مو مال اروحن بيها
-بعيني بس اخلصها ادزلج رسالة تودين عليها
-ان شاءالله ، اودعناج خية
– كل الهلا بيج يبعد گلبي .
راحت المرة واني رجعت بسرعة كلت بس اجرخ الثوب بيدي بسع خاطر اروح اعاون هدى مرت رسول بالمطبخ .
خلصت ومشيت للمطبخ هوسة .. بس ماكو احد
هستوني طبيت جان هدى تصير وراي وشايلة الصينية
المواعين فارغة : شني تعيشتو ؟
-جا ننتظرج ؟
-لا بالعافية
-دغسلي القوري وحطي الجاي يتخدر بين متخلصين اماعين خل اروح اخض جسمي
خدرت جاي ووغسلت المواعين ودزيت واحد من الجهال على جبن ب٥٠٠ من دكان عمي خاطر اتعشى بيه .. وشلت الصينية ومشيت للدوانية
دخلت عمي وعمتي والجهال كاعدين بالدوانية
كعدت وصبيتلهم الجاي وكتلها : هدى جيس الخبز وينه لعد شو ما لكيته !؟
-ضميته بثلاجتي خوما ابقي منا للصبح! يكضي غير وتعاي هم اعجني واخبزي! بيه حيل اني يومية عجن وخبز ؟
– ليش مو اني العجنت وخبزت اليوم ؟
– وشنو تعايرينا !؟
-هسه خية ما اعايرج بس اريدلي خبزة اتعشى !
– اي جان دزيتيلج على صمونتين بربع هاذ وينه الفرن دزي بيد الجهال
حجت عمتي : ااااالله الاحد هسه رادتلها خبيزة ادز من الفرن ليش جا مو عدنا خبز دطيها
لوت خشمها ما راضية وكامت تصيح : سويسووووووو روح جيبلها خبز امشيييي
وكامت راحت لغرفتها
صبيت الجاي وشربت وصبيت مرت الثانية وجزت روحي والخبز بعده ما جاي ..
حجه عمي : شكثر تشربين جاي تكول زلمة مو مرة .. بسج
استهضمت
خبز ما اطوني ويحاسبوني على استكانين جاي !؟
عيوني تلامعن لميت الصينية وشلتها باوعت غرفة هدى مطفية الضوا وسادة الباب .. ومغلسة على كرصة الخبز
عفتها ورحت لغرفتي
مو غرفة هي .. الحوش مال بيت عمي جبير بنص البيت
اخذتلي زاوية منه وسكفتها وحطيت جينكو وسويتلي معزل حتى انام واكعد واخيط واشتغل بيه
لان ما اكدر انام براحتي والولد موجودين يفترون بالبيت
بس بهالمعزل محد يفك عليه البردة ويفوت يعرفوني اذب حجابي واتفرع واخذ راحتي .
دخلت كوم الهدوم بكل مكان .. حتى على دوشكي شلتهن كومتهن ع السلة وكعدت اصفن بدنياي ..
اتذكرت عيشتي ويا طليقي
ما ادري ليش كل ما يضيق صدري اتذكر ذيج الايام واختنك اكثر
زوجني ابوي واني بعمر الثلثطعش ..
كالوا عود عد الزلمة تلحك .. راد يخلص من همنا
الله رحمة جان يصيح ( البنية هم ) اني وخواتي اثنين
باول قسمة واول واحد يطلبنا ينطينيا
ما يفكر زينة مو زينة ترتاح البنية بيها ما ترتاح ..
المهم البنية تتزوج ويصيح البنية مكانها ابيت رجلها اول ما تحس كبرت زوجها من تضل عدك تكسر عينك
جانت عدة افكار رجعية اتوارثوها اخوتي
تاليته من اتمرض اخوتي بالشغل ومحد فارغله سوينا جدول اني وخواتي كل يومية وحدة من عدنا تروحله بالبيت تخدمة واداري واترد .. وسمعنا واتحملنا مشاكل شكثر من عيالنا جيف كليوم والاخر نروح الاهلنا واتحملنا وجرعنا المر حتى ما نعوف ابونا مريض .
المهم اتزوجت واحد اسمه (عدنان ) واني ما اعرف معنى الزواج
وحتى ما اعرف شنهو يعني ما لاحكة
من طولت عدهم ست اشهر وما لحكت ( تنزل عليها الشهرية) اخذتني عمتي ام طليقي للدكتورة حتى تكشف علي
من كشفوا علي عرفوا اني ما عندي رحم حتى تنزل عليه الشهرية .. البنية ( عاجر ) يا ويل حالي شصعب ذيج الايام .. من دروا بيه عاجر وما اخلف
كاموا يكعدوني وهم يعايروني وانام وهم يعايروني
ويمنون عليه بلكمتي جيف اكل ومعيشيني عدهم واني عاجر ما اخلف ..
ضل ١٠ سنين ما اخذ عليه مرة مو معزةٌ بيّه بس شغل ما جان عنده، واني اشتغلت بالخياطة وحبيت هالشغل ذبيت روحي عليه من ضيمي وعدنان معتمد عليه ياخذ مني مصرف نوام ما يكعد الا الظهر .. منين يجيب ويتزوج عليه ولو اتزوج منو تصرف عليه بعد ؟
لحد ما صار بديه اطحين وفتحلا عربانة فلافل واسترزق منها
شافتلا امه مره من كرابتهم .. وطلكتني منه لان ما عدهم مكان يتزوج بيه غير غرفتي ، كالتلي : اني اريد اشوف بزر ابني كبل ما اموت وانت عاجر ما تخلفين واحنا ما عدنا مكان روحي لاهلج بعد اني رايدة ازوج ابني
الامانة لله هو بالبداية ما رضى يطلكني
كاللها خليها وياج بالغرفة بلكت اجمع وابنيلها غرفة تكعد بيها .. بس عمتي ما رضت كالتلها انت تتزوج تصرف على مرتك وع الجهال اليصيرون عندك لو تحير بالعاجر الـ الله ذابها عليك .. فك ركبتك من فگرها ماكو غيرها فگرك.
عاد كلي :روحي لاهلج اني هم حقي اتزوج ويصير عدي جهال اني ما افيدج .. رمى عليه يمين الطلاك وذبني ابيت اخوي
صح ما جانلي زلمة وما يصرف علي
بس العشرة ما تهون عشر اسنين مو شوية
كعدت واكلت ونمت وضحكت وياه وفتحت عيني عليه .. ومالي غيره واله جانت معزة بكلبي من ذبني حيل انكسرت وانهضمت .
ضليت عد بيت اخوي فترة .. ادزله رسايل واتوسله يردني
بس ما جان يرد على رسايلي ..
واخوي جان منتظر خبر
ما جان رايد كعدتي عنده
شلون مطلكة يحسبني فضيحة ابيته
يكول شگل لنسابتي اختي اطلكت وذبوها علي
اني ما اتقبلج خابري وشوفي شلون تقنعينه خاطر يرجعج لذمته ، بس ما رجعني عاد اخوي سواله عركة وياي واجا عمي حتى يحل المشكلة اخذني وخلاني ابيته عسى الله يهدي طليقي يردني اله او شوف شتزوج ويفتكون مني وبقى هذا وضعي …
بس اني يوم السمعت بعدنان اتزوج وسواها صدگ وما رداني
بجيت لحد ما خويت ومات كلبي وانغسل بدموعي من خلگ الله كلهم .. لا تطيبلي نفس بزلمة ولا اثقلي باحد ..
ليش اچذب على روحي اني عاجر
الزلمة اليتوددلي شرايد مني ؟
اعمرله بيت ؟ لو اخلفله جهال ؟
كاع صبخة اليتوددلي ما رايد غير يتونس بيه ويذبني من يمل
واغم روحي لو خليتها ونسة لواحد .
متمددة على فراشي وذابه ايدي على كصتي وعيوني بالسكف وبالي سرح يفكر والهموم اتلال اتلال على كلبي
شلون تخلص ؟
شيفكها وشيحلها ويا ناس
لا رايديني ولا جارعين
عاجر ومطلكة ولا ام ولا اب
ياهو اليحمل حملي وياهو اليريدني ؟
قدمت على راتب مال رعاية اجتماعية ولهساه ما طلع ..
هم حظي هذا وين ما احطها سودة مصخمة
نمت على بطن فارغة
