تتركهم منار وتصعد لنور …
منار : نور ، نونو ، حبيبي .
يتجاهلها نور وكأنه لا يسمعها !!!
منار ” تبتسم ” : بحبك قوي وانت زعلان .
نور : وعلشان كده بتزعليني !!!
منار : انت اللي زعلتي وانا اهو اللي طالعة اصالحك وجايبالك خبر حلو قوي هيفرحك خالص .
نور ” يبتسم ” : طيب صالحيني الاول .
منار : لما تسمع الخبر انت اللي هتثالحيني .
نور : طيب قولي شوقتيني قوي .
منار : بسام ابن خالتك النقض اتقبل وله جلسة بعد شهرين وممكن يخرج .
نور : بجد ؟؟
منار ” بابتسامة ” : ايوه ، حتي انزل اسأل طنط شهد .
نور : وانتي فرحانة كده ليه ؟!!
منار ” بدهشة ” : فرحانة علشان عارفة ان الخبر ده يفرحك .
نور ” باستنكار ” : متأكده ؟؟
منار ” بسخط ” : قصدك ايه ؟؟
نور : لأ مفيش ، انا نازل لماما .
بعد ايام
يذهب سلطان لابنته للأطمئنان عليها …
سلطان : ازيكم يا ولاد عاملين ايه ؟
غرام : الحمد لله بخير ، حضرتك اخبار صحتك ايه ؟
سلطان : الحمد لله كويس .
باسل : يارب دايما ، ربنا يطمنا عليك يا عمي .
سلطان : وعاملة ايه في الحمل ؟ خلي بالك من نفسك كويس .
غرام ” تضحك ” : اكتر من كده !!! ده انا اخدت اجازة من الشغل ، وباسل مش بيخليني اعمل اي حاجة في البيت .
باسل : انا معنديش اهم منك يا غرام .
سلطان : الفترة الاولي بس علشان الحمل يثبت .
غرام : ربنا يخليكم ليا يارب .
سلطان : ويخليكي ويسعدك يا بنتي ، لسه مامتك مش ردت عليكي في الموضوع اللي كلمتك فيه ؟؟
غرام : الحقيقة يا بابا ، ماما ردت عليا وقالتلي …
سلطان : قالتلك ايه ؟
غرام : قالتلي انها عايزة قسيمة الطلاق .
سلطان : يعني رفضت ترجعلي ؟؟
غرام ” بخجل ” : ايوه .
سلطان : وانتي مش حاولتي تقنعيها ؟؟
غرام : حاولت يا بابا ، لكن بردو رفضت .
سلطان : انا مش عارف اقول ايه !!!!!
غرام : متزعلش مني يا بابا ، ماما معذورة .
ينظر لها سلطان بدهشة !!!!
غرام : ايوه يا بابا ، متزعلش مني ماما تعبت قوي واي ست في مكانها مستحيل توافق ترجعلك مع احترامي الكامل لحضرتك طبعا .
سلطان : هي فعلا عندها حق في اللي فات ، لكن ليه مش عايزة تديني الفرصة اصلح غلط زمان واعوضها عن كل اللي فات ؟!!!
غرام : ده رأيها يا بابا ، وبليز بعد اذنك تحترم رأيها وتبعت قسيمة الطلاق .
سلطان ” بأسف ” : حاضر يا غرام ، الظاهر ان احيانا الواحد الفرصة مش بتجيله يصلح اخطاؤه !! هطـ,ـلقها رسمي وابعتلك قسيمة طـ,ـلاقها .
بعد ايام
تذهب منار بعد انتهاء عملها الي غرام في شقتها .
غرام ” تضحك ” : اهلا اهلا بصحبتي الوحشة ، ولا اقولك يا مرات اخويا .
منار : وحشتيني قوي يا غرام .
غرام : لو وحشتك بجد كنتي جيتي تزوريني .
منار : انا جيت ازورك اهو ، انتي بقي اللي مفيش حد شافك !!!
غرام : الحمل يا منار تاعبني قوي .
منار : تقومي بالسلامة يا قلبي .
غرام : عقبالك انتي ونور .
منار : يارب ، اخوكي من ساعة ما عرف انه ممكن ميخـ,ـلفش وهو اتحول وبقي انسان تاني خالص .
غرام : هو ممكن ميخلفش ؟؟
منار : ممكن ، ولو هيخلف محتاج وقت وعلاج كتير .
غرام : وانتي ناوية تعملي ايه ؟ هتكملي معاه ولا ؟؟؟
منار : هقولك نفس الكلمة اللي قولتها لحماتي ، انا لما وافقت علي نور وافقت علي انسان اكمل معاه حياتي مش مجرد اب لأولادي وبس .
غرام : برافو عليكي يا منار .
منار : لكن للأسف اخوكي مش مقدر ده خالص .
غرام : ازاي ؟؟
منار : تخيلي ، اني عرفت من مامته ان بسام ابن خالته النقض اللي مقدمه اتقبل و هتتعاد محاكمته وممكن يخرج طلعت علشان اقوله واخرجه من حالة الحزن اللي هو فيها رد عليا وبيقولي وانتي فرحانه كده ليه !!! وانا هفرح ليه !! ما يخرج ولا حتي يقضي عمره كله في السجن ، انا يخصني ايه !!!!!
غرام : واضح انه بيغير من بسام !!!
منار : بيغير منه وهو جوه السجن ؟!! اومال لما يخرج هيعمل ايه ؟؟
غرام : هو مش ناسي ان بسام كان عينه منك لما عاكسك في الكافيه ، وياريت بقي تخلي بالك من الموضوع ده .
منار : كلميه انتي يا غرام ، يمكن يقتنع بكلامك .
غرام : انا !!! انتي عارفة ان علاقتي بنور سطحية جدا !! ده احنا معرفناش بعض الا من قريب !!! وحتي لما عرفنا بعض مفيش اي كيميا بينا .
منار : طيب ، اتحمله وامري لله ، وربنا يقويني عليه .
في احد الكافيهات
يجلس فارس مع جميلة التي يبدو عليها الحيرة والارتبـ,ـاك …
جميلة : انا معرفش لازمته ايه نقعد كده زي العيال الصغيرين ؟!!
#ألف_قصة_و_قصة
#للكاتب_عادل_عبد_الله
فارس : لازمته انك وحشتيني .
جميلة : قولتلك بلاش الكلام ده .
فارس : انتي عارفة حقيقة مشاعري من ناحيتك ، يبقي ليه اخفيها ؟؟!!
جميلة : ايوه عارفة ، لكن احنا مش صغيرين .
فارس ” يضحك ” : لأ انتي صغيرة وسكر وعسل وزي القمر .
جميلة ” تضحك ” : ايه اللي بتقوله ده !! انا بعد كام شهر هبقي جدة !!!!!
فلرس : لكن كلك شباب وحيوية و مشاعر واحاسيس،.
جميلة : وانت عرفت مشاعري واحاسيسي ازاي ؟؟!!
فارس : بقلبي .
