الحلقه الحاديه والاربعون حتى الحلقه الخمسون حصريه وجديده وكامله جميع الفصول
فاتت 3ايام مورا عملية تاع احلام ختي مانكدبوش عادل اكثر واحد وقف معاها حتى فدراهم حلف هو يخلص بصح ماما ماحبتش هو يقولها حلفت وهي تقوله حلفت مع تالي دفعو نص نص ماما باعت سلسلة كان عاطيهالها بابا من وقت كنت صغيرة ماشفتهاش نحتها من رقبتها ليوم عيطولنا قالولنا احلام فطنت ماكانوش يخلو لي يدخل عندها لبسنا و روحنا ديت معايا ولدها كي جينا داخلين حبسونا قالك لمرض راه داخل ومادخليش لطفل من زهري قعدت بيا بيه برا وقلت لمااما تعيطلي كي تدخل عندها . قعدت براا فوحد لكرسي مجمعة نستنى وماما طولت داخل وهو بدا يبكي حتى نشوف في عادل داير دورة ڨارة ونزل جاي عندي…. شا راكي ديري هنا… مارديتش سكت… ني نهدر معاااك كيفاه قاعدة هنا مقابلة رجالة شاااراكي ديري هنااا.. واش تشوف فياااا ندير ني قاعدة فلكرسي نستنى يجو يربطولي لحنة راني هنا قاعدة باسكو ماخلااونيش ندخل بسباب طفل … هاتي نحطه فلوطو اصلن شمس عليه هذا وين راه بوه كيفاه مخلي ولده مولاا شهرين ولا 3 … سكت مارديتش كون يسمع بلي بوه بنفسه كي عيطتله ماما قاتله على احلام قاالها الله يسهل وربي يجيبلها شفى هدرت معاه قالت يخاف عليها ولا بصح نخلعنا من ردة فعله وبزيادة قالها انا مانحكمش لولااد عندي راك من بعد نرسلهم عايراته حتى شبعت مديتله طفل حطه فلوطو كان راقد مسكين سقمته مليح كي تاكدت بلي ما يطيحش بلع لوطو دخلنا حتى حبستني فرملية عيييييت معاها ندخل نشوفها قاتلي لا ممنوع طبيب وصانا كثر من واحد مكانش يدخل واحد يطل ويخرج .. روحت عند حيط حتى جاتني مرة خرا.. ني نقولك ممنوع ختي ديك راهي دايؤة عملية صعيبة… صااااي فهمناااا بغيتي تاكليني ني نستنى في يما تخرج … خزرت فياال بغات تقلعها معايا حتى حكمتها صحبتها ودارت عندي….يماك لي كانت عندها.. ايه هيااا… ماهيش عندها لا دخلت قبيل وداخت عندها راهي في ديك لبيت بصح راهي مليحة ماتخافوش.. ماخليتهاش تهدر وتكمل روحت نجري لقيتها تلبس فرجليها وخارجة… مالكي ماما راكي مليحة… حمد الله مانجمتش نشوفها في ديك حالة حوجي غاضتني بنتي صغيرة عطيتهاله كي لوردة رجعهالي بلقلب ياااربي راهي مسامحة من عندي ديك بنتي وكبدتي ياربي راهي مسامحة غير شوف في بنتي… ماما راك تبرااا وترجع حمدالله ماديريش في روحك هاك والله غير خلعة تاعها بزااف عليااا حنا نهدرو حتى دخلت ختي كبيرة قتـ,ــ,ـلها قبل لا نجو بلي احلام فطنت .. ماخبرتهاش على ماما بصح قـ,ــ,ـتلها ممنوع لي يدخل عندها ولااازم راحة سيرتو كي عاد راهي غير كي فطنت دارتلي براسها زعم ماما مالها درتلها.براسي والو هزت راسها وخرجنا من سبيطار كي طردونا شافت فياا ماما.. وييين راه طفل… نسيته قاع روحت نجييه فتح عليااا لباب… هودت باه نرفده… كي رفدته وجييت دايرة حكمني … شفت فيه .. حكمي هادو وعطاني دراهم… ماعندي مانحكم صحيت ماخصنيش.. شا دخلك نتي بسيف عليك تحكميهم. عيطتلي ختي حكمتهم مين رفدت طفل خيماري قاع نجبد. معاه قعد يسقملي فيه
42
روحنا مع ختي فلوطو وصلتنا لدار دخلنا قلعنا وفتنا لصالة.. نطقت انا.. ماما مين فطنت لازم ندولها فطور ياك.. لا لا طبيبها قالي ممنوع تاكل دروك ومن بعد قالي راك نعطيك شا تجيبولها بصح دروك مزال ماتبدا تاكل قالتها وقنطت صونا تلفون ختي هدرت من بعد قطعت…. هيااا انا نروح وحشية نولي لولاااد راهم دايرين حالة كي جينا نردو عليها دخل بولحية.. شااف فينا قاااع وخزر في ماما وحدة خزرة وفات.. ناضت هي لبست وراحت … نطقت ماما.. راني نخمم فيها كي تخرج يليقلها سكاات وراحة والله يخرجها منها( على بولحية تحكي) قعدت غير ساكتة ونخمم كون نطلق انا وتزيد احلام احلام راهي باينة فيها فيها طلااق ولمشكل لا رسللها ولااها هما الله يبارك خمسة ولي في حجري 6 وبسلامتهم كي يجو دار يقلبوها على نهار يحاوزهم بولحية ويكشف ماما فما بالك طول عنده كون جا بونا حي ولا عندنا خونا والله العظيم ما يصرا فينا هاك مهما كنا واقفين ومبينين بي ريح ما يهزناش مع اخير حنا نساااا ويليق راجل في كتافنا … فيقتني ماما من تخمامي… مالكي ني نهدر معاك لا… والو غير كنت نخمم فيها مسكينة
.. ريحان بنتي غادي نقولك حاجة وما تزعفيش مني… واش كاين ثاني… دار صاي راحت محاال تولينا… كيفاااه زعم… قالي باه نردها عليكم فإسمكك تعطيني 200 مليون حق ما غادي نريسكي وانا معنديش… رااااكي منيتك… ملي سمعت هدرته وقلبي باقيله ضـ,ـربة ويحبس ني نخمم غير فيكم نتي وختك هذا والله ما يخليكم توصل بيه حتى انا يخرجني معاكم ما قالهاش خطرة ماقالهاش زوج … ماما وين بغيتي توصلي بهدرتك على بالي من مورا دي هدرة كاين حاجة وحدخرة…. رجعي لراجلك… نوضت وقفت… عرفتهااااا كاين حاجة مع تالي ريحان هي لي الله يسهل عليها نولي راجلي نولي مكانش مشكل بصح راكي حاسبة كي يجيه طفل غادي يتفكرني غادي يتفكر وحدة سموها ريحان نقولك شا غادي يصرااا نشوف بعيني ونموت بقلبي هو يلتهى بمرته وولده وانا بشوية بشوية حتى نولي مكااانش ولا جاه ولد زاوج هااا قوليليي نقـ,ــ,ـتل روحي وخلاص شا نقعد ندير …. ماقتـ,ــ,ـلكش قعدي عنده تنذلي شوفي فرق بين راجلك وراجل ختك وصلت للموت وقالي ربي يسهل عليها ونتي عااااد ديك ختك ماخلى طبة ماخلى دراهم يجري من ومن يعيط يحاول وين ماندور نلقاه مورايا هادي ختك ودار هاك نتي بعيد شر شا يدير على جالك ملي طاحت ختك مزال مايقولي قولي لريحان تولي معايا يقولي غير قوليلها تسمحلي قولها تسمحلي ومانيش واقف معاك على جالها نسيب بمثابة لولد والله لا راجل باين في عينيه يبغيك كون عينه فزاوجة راكي بعيدة عليه والله ما يسقسي ولا يحوس عليك نتي لي بغيتي تروحي وكون ماعينهش فيك والله نهار رسلتيله لورقة بديك حرارة لي فيه ديك دقيقة يطلقك مشي يجي يحاول ماتوليش دروك ولا وليتي ديري شروطك ونتي حرة راجل والله غير ماشاء الله من غير شي لي داره يخليك تدي عليه نظرة مشي شابة وخمي انا كون جات داري والله نلمكم فيها قااااع وراجل يقدم ويمس وحدة من بناتي وانا بعيد شر تصرالي حاجة شكون بيكم كي طحت قبيل نتي وخوتاتك جيتو في بالي مرات نسقسي روحي كيفاه سعدكم جا كيما سعدي مسود مانش نخمم في روحي مانيش باغي نخليكم مغبونات من مورايا .. ديك دقيقة مانجمتش نشد روحي رفدت داك طفل وروحت لبيتي بكيت بكيت لبكى لي بكيته واقيلة ما بكيتهش كي خدعني عادل خممت خممت وقلت راك لا ربي يشوفلس فيها خير يورييلي يا لوكان ب اشارة صغيرة انا ما كملتش دعوتي ويصوني تلفوني لقيته هو … مارديتش لولة زوجة رديت… الو… واه ريحان كي راكي… مممم مليحة حمدالله… يماك كي راهي… راهي حمد الله في قلبي راهي ك أي أم محروقة على بنتها وزهر بناتها… سكت من بعد نطق… وانا… مالك نتا.. بصح انا مانيش مليح ريحان… شا بغيتني نديرلك نتا علاه ماراكش مليح شا خصك لا لولد راه جايك … والله ماخصني دروك كون على بالي دا طفل غادي نخسر في جرته اكثر حاجة عزيزة عليا والله ما نخمم فيه مانيش نقولك وليلي دروك على بالي دا لوقت تكوني مع يماك واقفة على دي مابغيتش قاع نزيد نقلقك وخليتك فراحتك بصح من بعد حتى انا ويااك نديرو حل
43
خصك حل قتـ,ــ,ـلي… ايه… راك باغي نولي معاك… هذا ما راني متمني والله … تقبل بشروطي.. قولي وراني قابل… اول حاجة ولد ختي صغير لي راهي عندي غادي نجيبه عندي… جيبيه وانا نربيه من دروك راه ولدي … مانقعدش مع يماك وتخرجني بداري وحدي … صحا والله نكريلك وحدك بصح صبري عليا غير شوية قد ما نعمرها.. بغيت يماك روح عندها بصح باه تخطي خطوة لداري غير قلعها من مخك لي دارته فيااا مشي قليل .. سكت من بعد نطق. صحاا قابل من بعد ونديرو حل ليك وليها زيدي… كيما كنت قبل لا تتزوج بديك تقعد معايا تاكل فدار تشرب فدار ترقد فدار حرز نقولك حاجة وتقولي ماعنديش اسم مرتك ويماك مانسمعهش ف دار. ستغفر من بعد نطق… زيدي تشو.. وتالية قاع ماتتبدلش معايا اذا جاك طفل وتعطيني وعد تاع رجال مشي كيما خلفت بيه مرة لي فاتت .. غير هادي لي ما نجمش نديرها كون يجيني الف ولد نتي ماراكي عارفة والو على دي ماتقوليش قاع نتبدل معاك… الله يسهل هدو شروطي وراك لا تفكرت نزيد نقولك .. ريحان… واه… توحشتك اقسم بالله… هيااا هيااا من بعد من بعد عطيتك وجه وندمت كوبيت عليه وحطيت داك طفل في بلاصته انا ماقالتهاليش احلام ختي. بصح ماما قاتلي.. احلام بغات تعطيك ولدها هذا تربيه هذا طفل لي ناض لعياط عليه مابغاهاش كي رفدت يديرو رايهم من بعد كي تطفر يردو كل شي فلمراا سبحان الله والله ناس مشتاقة ولااد وناس تتقلش على رزق ربي
44
محال كنت نخطي دي خطوة كون ماخممتش فيها اخر امل كان عندي دار تولينا بصح فقدتني ماما امل وزاد شفت حالة كي راهي تزيرت بزااااف ماعنديش حتى لافامي كي ناس وعايلة تبغيلك الخير غير لي يزيد يقـ,ــ,ـتلك ويدفنك فلحياة بصح كاين ربي
فاتت 15 يوم على داك نهار لغدوة خرجت ختي من سبيطار وطبيب غير يوصي على راحة ماما قعدت فدار جبتها انا وختي وهو جا معانا كي وصلنا لقينا لعييياااااط واصل حتى لبرااا عادل شاف فيا وشفت فيه حشمت حلينا لباب كي شفت ولاد ختي عرفت سبب عياط داك كلب جا رمى لولااد كي شافو يماهم جاو يجرو حكمتهم كانت شوية مضرارة وبدات غير راسي راسي بولحية كان جاي مقلع لينا كي شاف عادل بلع فمه وجا يسلم عليه عوناها دخلتها لبيتي كنت فرشتها قبل خليتها تريح وبلعت لباب عليها تلاقيت ب ماما فهمت منها بلي جا راجل احلام ورمى لولااد بورقة طلااق.. وكي جا بولحية ولقاهم قالها بناتك ما يقعدوليش في زوج هنا وكبرت بيناتهم وعلى حساب خد ماما جاتني راه ضاربها خدها راه حمر ومنتفخ جا عندي ولد احلام… طاطا تكلمي عمي عادل .. خليتها وروحت عنده. كان وحده فصالة… واه عيطتلي… بغيت نهدر معاك.. واش.. علاه راكي مبعدة قدمي.. نسمع من تماك… ريحان باغي نهدر معاك مانيش باغي وسكت… قعدت.. واه هاني نسمع .. لقيتلك باطيمات وكريتهاالك خلصته قد عام راك منا للقدام نلم ونشروها اصلن هدرت معاه عاودت طليت حيطان بنترت ونقيت ديك بنتروة من لرض وشي سوالح عاودتهم قاع في ديك دار بقا نتي تجي وتسيقيها ومنها تشوفيها كبيرة وواسعة f5 وتشوفي كاش حاجة ماعجباتكش… اممممم منعرت.. ني نهدر معاك مانيش نتمسخر لي راكي تقولي فيه ني ندير فيه بشوية علياا… واه صاي سمعتك وجيت نايضة… وقف ريحااان راكي زعفانة مني فهمت بصح ما تتجاهلينيش ني عاااي ونهار لحد نديك تشوفيها…. شفت فيه هي صح يبان قااع عاااي.. ان شاء الله…
سمعي.. واه.. جيبيلي نشوف تاج… علاه… كيفاه علاه نشوف ولدي… سكت روحت جبتهله . سلم عليه وقالي نديه معايا حشية نجيبه كيما درت معاه مابغاش داه داه أمن سيد بلي ولده… كي شفته طول وليل ماجابهش عيطتله قالي. بويا مابغاش يطلقه من موراه بساعة جابه وراح بعد غدوة ختي ولت تهدر نورمال وقاع قاتلي على تاج نديه نربيه كي سمعتها منها فرحتي ما نعطيها لحد فرحت فرحت فرحت سلمت عليها كليتها حتى ضريتها رقدته عندي كي لعادة يعني واخيرااا غادي يولي عندي ولد تاعي وانا نديرله كل شيء نرقده نرضعه نبدله نسهر عليه هبلت بفرحة كي تخيلته يقولي ماما ويدور قدامي وليت نضحك وحدي ونتخبط وما كذبوش لي قالو أم لي تربي مشي لي تولد
45
فاتو يامات وليوم روحت سيقت دار صراحة الله يبارك شابة وعجبتني كي دخلت ليها رتاحيتلها درت سورة بقرة وقعدت نقي جات معايا ختي ومروى عاونوني حكينا حيطان تاع كوزينة وقاع لي لاازم يتنقى وهو دخل حطنا ناكلو وراح بدينا 10 كملنا 7 مشي تقولو كنا غير نقو لا دقيقة نخدمو و3 سوايع نهدرو يومين كنا كل شي مكمليناه خصه غير هو يجي ينقل ختي جا داها راجلها وانا وصلني وراح يوصل مروى من موراها ب ساعتين صونا تلفوني لقيتها مروى.. رديت عليها . الو.. واه معايا ريحان.. ايه شكون .. انا خولة… واش حبيتي… حبيت نباركلك على سكنة فرحتلك وتالمو فرحت بغيت ندعيلك ربي وان شاء الله تدخليها بلهم ومشاكل وبغيت دموعك ما ينشفوش في ديك دار زعم واش كي شرطتي عليه دار خفتي نديه عليك مانجمتيش تشوفيني ندور قدامك بصح صبري نقولك حاجة ماتنسيش عادل تزوج على. جال لولااد وديري لي ديري عادل يوليلي ولي في كرشي يجييه ليااا كي مانجمتيش تولديله جبتيله ولد ناس يبربيه ضحكتني والله وعقلي مليح على هذا نهار وكيما قتـ,ــ,ـلك تدخليها بشر ان شاء الله هيا تهلي فروحك… خولة… مالكي… خلينا في زوج نعقلو على هذا نهار ما تحصيش شا يصرا من للقدام وديك دعوة ان شاء الله بغيتها تخرج فيك كيما فولتيلي بشر وكوبيت عليها عاودتلي مروى رديت… والله ما حسبتها تقول هاك قاتلي عطيني نبوركلها سمحيلي حمبوك. نورمال عمري ماصرا والو هدرتها قا قاع ما تأثرش فيااا مروى نخليك دروك ني عيانة والله.. صحا ختي تهلي فروحك وكوبيت قلقتني بزاف والله نخاف من دعاوي بصح مادامني مانيش غالطة ربي يسهل على كل واحد وكيما كان الحال هو لغدوة بدا ينقل فسوالح شومبرتي وفراشي حاجة ما داهاش من دارهم على حساب هدرة مروى عجوز دارت حالة عليه لي بغا يخرج حسبت زعم تاليتها طلااق بيناتنا باع لوطوته.زاوجة لي كان يقولي نديرلك پارمي ونعطيك دوري بيها وشرا كل شي جديد لدار كي دخلت لداري لقيته داير بيت صابغها ب لزرق تاع ولاد خزنة معمرة من فوق لتحت غير قش ل تاج العاب سرير صغير ومعلق وحد ملصقات فلحيط هي لبيت لولة لوحيدة لي بدا بيها سڨمها وعدلها وبلعها ماخلااانيش نشوفها قاع حتى كملنا قااع لبيوت باه فتحها ورهالي كانت تهبل تهبل كل شي عدلته وستفه معايا يد بيد ليلة لولة لي دخلت فيها جات ختي باتت معايا ماما كانت مع احلام.لاااهية حلفتلي من بعد تجي جاب من كل خيىر كي جات ختي جابت زوج ولادها ولخرين قعدو عند بوهم رفدهم ودخلهم عنده لشومبرة وخلااهم معاه ولا خرج يديهم معاه باتت ليلة وغدوة حشية شورت قعدت انا وهو وتاج فدار والله دا ما كنت متمنية دار وعايلة صغيرة…..
#الحلقات46_50
#الحلقة46
كنت قاعدة نبدل ل تاجو سمعت لباب كي نحل جا ديراكت دخل قال سلام وفات رفده سلم عليه ويقوله توحشتك .. جيب هنا خليني نبدله راك يضـ,ـربه ريح .. صبري نسلم عليه توحشته… عااادل ما تسماطش جيبه هنا… قـ,ــ,ـتلك صبرري..سكت وخليته شوية ومدهلي كملت بدلتله صونا تلفونه رد. واه بابا خير…لا مكان والو حمد الله…. بدا يضحك… تأمني انا ومابغاتنيش نرفده بغيت نسلم عليه كلااااتني ونتا تقولي جيبلي نشوفه .. روااح مرحبا دار دارك … صحااا هيا نقارعلك… وكوبا.. شفت فيه زعما تاع انا ما بغيتكش ترفده .. بابا راه جاي يتعشااا عندنا قوليلي واش خص فدار نجيب .. ماتجيب والو كل شيء كاين جيب معاك غير الخبز… راكي نيشان… واه قتـ,ــ,ـلك غير الخبز.. راح خرج وانا حطيت تاج في بلاصته وروحت نشوف ونخمم شا ندير للعشا خطرته لولة راه جاي ضـ,ـربت لمروى تجي معاه فرحت قعدت نطيب ونوجد هو جاب لخبز.وفاكية وعاود خرج شعلت عليهم وبديت ندور فلكوزينة انا شيخي نحتارمه ونعزه ونقادره ماذا بيا نفرحه بديت بكري ووجدت صني تاع قهوة قتـ,ــ,ـلهم رواحو قبل لعشاا باه نجمعو شوية شوية وصونا لباب لقيتها مروى فرحت بزااف عنقتها ودخلت لصالة قعدت معاها قاتلي شيخي شوية هاك يجي ولعجوز دارت حالة على لي ما عرضتيهاش … خليني منها خصني لا نعرضها ناض تاج يبكي روحت جبته وعطيتهلها سلمت عليه حطيتلها لقهوة ورانا مقصرين هااا جا شيخي مع عادل ملي دخل وهو رافده ماطلقهش قاع… كنت مجمعة معاهم على دي بديت بكري طياب غير سوالح لقلي خليتهم توالى مروى هي لي حلفت تقلي ودارت سلاطة
47
بعد ما تعشو عييييت في شيخي قعد ماحبش قالي حتى مرا خرااا وبدا يطلبلي في ربي مروى حكمتها باتت عندي تعاونا فلماعين و جبنا قاع ليل مقصرين قاع لي صرا في غيابي حكاتلي عليه وخولة لي ولت من بلاصتها ماتنوضش وتتشرط وتتقلش على لعجوز قشها تالي ماتغسلهش تقولها غسليه معاك مانجمش تقول دايرة انجاز وهي اول وحدة رفدت لكرش وحد الخير تجي عندي تقولي نتي راجلك باين فيه متزوج وبولااده محاال يستناك روحي نتي ثاني عيشي حياتك هو ما غادي يجي.كل شي كل شي طلقوه عليااا وبزاف سوالح حسيته حابة تهدر وتفرغ خليتها غير تهدر وانا نسمعلها مرات نحتاجو انسان يسمعلنا وحنا نهدرو بلا ما يجاوب ديك ليلة فوتناها كيما حصة افتح قلبك ل 4 تاع صباح وحنا نهدرو حتى رقدنا
صباح نوضت قضيت سوالحي وطيبت قهوة وجدتها ناض هو لول فرغتله سلم على تاج وخرج وانا نوضت رضعت تاجو بدلتله وخليته يلعب في بلاصته مارقدناش بكري خليتها ترقد وتريح حوجي علاه قليل ما هدرت يامس مسكينة كانت معمرة 10 ناضت دايخة مسكينة لقاتني ندير فلفطور … صباح الخير.. صباح النور والله لا رقدت.. كون زدتي.. لا صاي وين نزيد راهي قريب 11 فرغت شربت من بعد ناضت غسلت كاسها وقاتلي نعاونك حاوزتها تقول انا ضيفة عندها
كملت مسحت يديا وقعدت معاها جبدنا على ختي ها صونات ماما هدرت معاها وسقسيتها على احلام حتى فوتتهالي فرحت كي وقفت على رواحها قاتلي يطلقني وبسيف عليه يكريلي ويخلص نفاقة تاع خمس غراوين ولا ماكرهتلهش حياته مانيش مرااا… احلام ختي نستعرف بيك برااافو بصح ماتتحمسيش بزاف قلبك يا ختي قلبك
طردقت بضحك.. حي على داك قلب كي دارولي عملية عندهم مالقاوني رافدة فداك لقلب.. عرفتها مزالها مضرارة مسكينة قلبتهالها ضحك.. .. شا يلقوك رافدة حمبوك طرف لحم وزوج عروق وقطرة دم ودقة قلب دير طك طك وصاي… روحي روحي عليااا ريحان نتي لي غادي تحبسيهلي من ضحك … قوليلي بولحية ماراهش… لالا كونك هانية راه يخلص على دي راه ساكت هدرنا شوية وقطعت كملنا نهدرو عليها انا ومروى من بعد جا عادل جاب خبز فطرنا في رحبة وراح يخدم وهي 5 خمسة شورت قاتلي بنتي وحتى مرة خراا نولي ان شاء الله قعدت وحدي مع ولدي العمر تاعي كي لحق لمغرب دخل عادل درت غير حاجة خفيفة تعشينا هو راح يتفرج وانا غسلت ماعين مسحت كوزينة وخرجت روحت لدوش غسلت يديا ووجهي دخلت لشومبرة لقيته يلعب معاه بدلت ودخلت لبلاصتي رقده هو وناض حطه في بلاصته جابله سرير تاعه جبناه عندنا .. وجا دخل لبلاصته وبدا يخرب فتلفونه دورت وخليته باغية نرقد حط تلفون. ونطق.. شوفي نتي اقسم بالله وينوض جدي الله يرحمه من لقبر ماراني طالقك ليوم وماراكي هاربة ماجيت ندور نشوق ماله لقيته مستعد الهجوم وهااا لقد بدات لحرب❌❌❌❌❌❌❌❌❌❌❌❌❌❌❌
48
فاتو شهرين كنا راقدين وتاج فوسطنا حتى بدا تلفون عادل غير يصوني على خمسة تاع صباح نوضته.ريبوندا بلا مايشوف حتى وقف دار فيسنا فوقه وخرج. لحقته.. شا كاين وين رايح.. خولة راه يطيح منها دم مكبد.. حوووجي الله يحفظ ويستر عيطلي لا كاش حاجة هزلي براسها وخرج ما منتمناش حاجة لطفل تفكرت نها دعيت عليها انبني ضميري بصح ماقلتش ولدها انا ياربي مايكون غير الخير ستنيت ستنيت مارقدتش قيس 11 جااا مين كنت نعيطله ماردش قاع . كي دخل حكمته .. واش غير الخير… شفته سكت ووجه مزير… خليته عرفت كاينة حاجة خليته ماهدرتش معاه.. حطيت فطور قلت نروح نشوفه.. لقيته قاعد ويلعب بيدين تاج… عادل وروحت قعدت حداه .. شاف فيا.. حطيت يدي على كتفه .. مالك… خولة طيحت لي في كرشه.. بلعت فمي ديراكت خلعني كي شغل.. وهي كي راهي… ماشفتهاش قاع خليتها راقدة غير يما قاتلي عليها اصلن من لول هذا طفل جا فسر وراح فسر كان ميت من قبل وهي كان يجي لوجع وخطرة قدامي قالت وجع بصح ماما نطقت قالت راكي غير كي روحتي لطبيبة ومكان والو وجع نورمال داك على دي ما ديتهاش حتى قبيل صباح قواا عليها ولقات تحتها دم… بصح كيفاه تغفل على حاجة هاك ويماك دير فيها تعرف كون داتها قبل… صاي دروك هو راح…. راه فلجنة على بالي راك محروق عليه بصح حاجة تاع ربي… تنهد ومن بعد نطق… كيما قلتي ربي جابه وربي داه هياا انا نروح دروك راك من بعد ونجي ولا ما رديتش ما تتقلقيش علياا… صحا ولا كاش حاجة عيطلي.. هزلي براسه وخرج فطرت ولميت كوزينة عيطت لمروة نسقسي مشي حباا فيها لا هادي هي حالة لي دايمن قاعدة تزوخ بكرشها مافرحتلهاش حاجة تاع ربي دي هدرت معاها قاتلي لعجوز راهي تمشي واسمك في فمها حتى مين دخل عادل قاتله عين تاع مرتك طردقت فيها مكان عليا نقول غير الله يهديها ماجاش حتى مورا لمغرب حطيتله تعشا نورمال حتى تاج لي موالف يلعب معاه ماراحش عنده دخل ديراكت رقد خليته على راحته هدرت مع ماما وختي من بعد روحت رقدة تاج رقدته في بيته وفت لشومبرة حسبته راه راقد دخلت غير بشوية لقيته مطفي ضو وريحة دخان تقـ,ــ,ـتل شعلت ضو.. عاادل. واش دي ريحة . جيت نحل تاقة نطق. خليهااا مبلعة.. ريحة.. خليها قـ,ــ,ـتلك.. ستغفرت وروحت جبدت قشي نبدل عمرك ماترقدي بقشك لي كنتي دوري بيه فدار مع راجلك نصيحة دي درت شوية ريحة في يديا ومسحت بيها رقبتي وفت لبلاصتي.قدمت عنده..عادل والله غيرحاجة تاع ربي هادي ….. كان كي شغل يخمم في حاجة ماردش عليا قاع غير شاف فيااا وتبسم وحط يده على خدي…. نحتاجك.. فواش.. شوفة لي شافها فيا فهمته شا بغا من اول قصة حكيتلكم بلي قد ماهو حنين قد ماهو عنيف بصح دي لمرة كان حاجة خلاااف هبل قاع حتى دمرته…. عاااادل.. شاف فياا. وشبيك… راك في عقلك نتاااا.. سمحيلي ماعبيتش… عندي ساعة نهدر معاك ونتا غير تزيد مشي قااع هاك عادل هبلت . سمحيلي صاي جبدت عليه ولبست.. هو لبس وناض…. فهمنا راك محروق عليه بصح ماتجيش تخرج فيا انا… خبط كاس لي كان حداه … مشي ولدي مشي ولدي ولدي ني عارف راه في بلاصة لي يستاهلها راه فلجنة شفت فيه… مين مشي ولده ماله هذا… ملي ندخل وهي مرتك مرتك مرتك مرتك مرتك مرتك وتدعي تدعي تدعي تدعي تدعي اوووو بزااااف وزاد ليوم مات طفل صاااي رداتك كل شي نتي سبابه وماخلت مادعات عليك … شكون دي واش راك تحكي… يما شكون من غيره وليت نكره ندخل ديك دار .. روحت وقفت عنده… عادل كل شي بيد ربي لي كاتبه ربي هو لي يصرا وخلي يماك تدعي .. روحي ترقدي روحي … ونتا وين رايح… غير هنا عند تاج… خليه راه راقد هو رواح نتا ريح شوية شاف فيا ودخل لبلاصته قعدت نخربله فشعره مسيت حاجة قاصحة حسبتها ڨملة ماكنتش قاع نعرفه كي دخلت بنت مروى تقرا جابته من ليكول ولينا نمشو بلخيمارت بسبتها بديت نجبد فيها حتى ناض… اوو شعرري مالكي نتي.. عادل راك مقمل وترقد معايا… رقدي حمبووك … هات ضو تاع تلفونك ومنيتي حاكمة ديك بلاصة خايفة لا تهرب سيد امن وشعل تلفونه انا شفت وانا نلقى شعره داك كي كان داير جال قصاح كيما هاك…. شفت فيه. هاه كاش مالقيتي… كانت وهربتلي قتـ,ــ,ـلك ما تتحركش. راكي منيتك… واه بصح صاي راحت. وين راحت… راحت لجيهة زاوجة… خزر فيا وخطفلي تلفونه…جبدتيها من شعرك ودرتيها فيااا غمى روحه ورقد… وانا بديت ميتة بضحك سكيمي كان خصني غير لقمل دروك ستغفر الله حتى انا سقمت روحي ورقدت
49
من موراها يا ربي شهر عجوز بدات تخرب من جيهة عادل ورجعنا لنفس موضوع من جديد شيخي دار عرضة وقاله جيب ريحان نزعف كون ماتجيش جاني قالي تروحي عيب ومنا ومنا ماتكونيش كيفها صفي قلبك وروحي وني معاك لبست و لبست تاج وقلعنا وانا قاع مشي عاجبني الحال بصح خلي تقول كلمة ني موجدة صرف شبابب بزاف دخلنا جات مروى تجري سلمت عليا وستقبلتنا ولعجوز قلبت وجها كي شافتني خولة مكياج طابلو وبدات رايحة جاية قعدت نورمال كانو تماك وحدين فاميلتهم بدات تهدر عجوز وتمعني عليااا وانا غير ساااكتة ساااكتة فلعشا كي حطو مابغيتش ناكل عياااات فيا مروى مابغيتش كنت شبعانة كليت شوية ونڨهمت عيطتله يجي يديني شوية وجا دخل قدامهم هياا بغيتي تروحي.. ايه .. نطقت مروى.. جبتها باطل والله ما كلاات.. شاف فيا.. علاه ما تعشيتيش… ني شبعانة.. بغيتي تجوعيلي ولدي ديريلها نديه معايا كي نروحو تاكل … نطقت عجوزتي.. تجوعلك ولدك علاه هي ترضع باه تجوعه… نطق هو ان شاء الله كي ليوم راهي اونسانت عندها شهر وسيمانة ماكوناش باغيين نهدرو العين راهي حق ومرات تجي من لقريب.. شيخي ضرس لعقل بانتله مروى كان على بالها لعبتها ماتعرفش عجوزتي قعدت في حالة صدمة غير عينيها يتحركو ولي عايرتني عندهم نفسهم كانو هنا وسمعو بلي ديك لمرا عاقر راهي بالكرش وغادي تجيب ولد..،(تقصدت مانهدرش فلحلقات خليتكم تعرفو كيفكم كيفهم باه تفرحو في رحبة.) قاع فرحو وناضو يباركو من غير خولة وعجوزتي لعجوز كي جات جاية لجيهتي دورت راسي وزيرت يد عادل شافت فيا نتشعت انا جبدت روحي قتـ,ــ,ـله ني عاااية ونعسانة بلا تخمام قالي ايا نروحو نهااار لي قتـ,ـرله على حملي هود سلم على رجليا عينيه نكدب نقول ما بكاش هبل بلفرحة.. كي ركبنا . نطقت… عادل واش قـ,ــ,ـتلي على خولة… والله لا هدرت معاها وفهمتها وقاتلي صحا خلعتني كي لقيتها لاابسة ومعدلة… ونتا وين شفتها … كانت لابسة لصفر لعمى يشوفها …. شفت فيه وقلبت عينيا وهو كمل يسوق وانا قعدت نلعب مع تاج
50
من موراها ب خمس شهر كنت داخلة في شهري سابع ب يامات مشي بزاف كنت واقفة فلكوزينة ندير فلعشا نصبته ومسحت يديا كنت وحدي فدار هو كان خرج معاه تاج عيطتله قالي ني جاي روحت قعدت نتفرج كنت متبعة وحد مسلسل رووعة هذا قيسه لي يبدا فيه بعدا غير قعدت بدا فنص لفلم دخل عادل سمعت صوت تاج يبكي .. ريحااان.. واه روااح راني فصالة.. جا دخل رافده يبكي.. ماله يبكي… مابغاش كي دخلنا … ولفته زونقة ولا مايحبش قاع يقعد فدار شفت كي ولفته….حق ماراني نخرجه عليك ومريحك منه… جيبلي هنا ولدي جيبلي… وين نجيبه مشي مليح ليك ترفديه لتهي غير بكرشك لي راهي عند فمك بزاف عليك… راك تعاير فيااا… ني متشوق نشوف ولدي زاوج.. كنت حابة طفلة بصح ربي كتب طفل… مهيم يجي بصحته … عندك الحق هذا الحمل ماجاش بساهل عندي ما سمعت بسبته بصح لي في كرشي بلع فم كل واحد هدر فياا وربي يرزقك كل محرومة ان شاء الله ماعلينا قعد مقصر معايا ويحكيلي شا صرا معاه ليوم حتى صونا تلفونه لقاه خوه…الو… حمدالله ونتا…. قول ني نسمع ماتخلعنيش برك….. راك تزعق عليااا….. مكااانش منهااااا…. ان شاء الله ان شاء الله خبرت دار…… ههههه هياا صحا والله لا فرحتني على بالك طريق السلامة لعزيز…. وكوبا… واش كاين.. حرزي تخبري.. والله مانخبر قولي… خويا غدوة راه جاي ماتقوليش لمروى…. ويااااا عمري غادي تهبل بلفرحة بااااااينة …. ايه… وينتا يجي…. قالي غدوة 10 تاع صباح ان شاءالله نكون هنا… ان شاء الله…. ايه تسمى نرقد بكري باه نروح نجيبه…. ديني معاك حمبوك.. شاف فيا من لفوق لتحت بصح شكون انا نسيتو واقيلة انا ريحان مابعدت عليه حتى خليته يقبل يديني معاه تعشينا وحكم بلاصته هو وانا وجدت قشي لغدوة بلكشفة باه لقيتي حاجة قنعتني خزنتي قاع قلبتها حطيتهم على جيهة ودخلت نرقد كنت عيانة سيرتو كي دخلت فشهر سابع وليت ننضر مرات حتى نولي نبكي بسطر غمضت عينيا ورقدت توحشت رقدة على كرشي دروك نرقد غير على جنبي وما نجي ندور حتى بلكشفة شفت فيه راقد على كرشه والله لا غيرني قلت والله غير مين نوضه…. عادل.. عااادل.. احبي نوض.. كي هذا وين رقد فطن بلخف… شاف فيا واش… خليني نرقد عندك… راكي منيتك تنوضي فيا على جال باه ترقدي عندي… علاه شا فيها لا رقدت عندك صاي كمل رقدتك هادي رقدة درت عليها غدوة نقولك شوية من دمك تموتلي واقيلة لاطيف الله يستر….ستغفر وسقم روحه.. فوتي… صاي صاي كمل رقدتك كمل….خزر فيا… ايا روحي قودي وبغا يكمل رقاده … غير مين راك تحاول فيا غادي نجي وما انا مانجيش… هو ما حاولني ما ولو لزيت روحي… رفدتله يده ودخلت.. انا ماحاولتكش جيتي وحدك….. هاااا صاي تعرفني نحشم كي تحاولني هاك.. الله يشافيك والله… على بالي حتى انا نموت عليك …. رقدي رقدي راه ليل رقدي…. غمضت عينيا ورقدت مسكين حسبني رقدت عنده حباا فيه ماعلى بالهش بلي غير باه يرقد كيفي على جنبه…..
يتبع
